Roma 13

1Wumi uyi woha uwikike pasi pa machengo ga kukula ntunda: pakuya pa waka chengo lema kya kuwikika nu Mulungu; leka gala gayili gawikiki nu Mulungu. 2Mumu wakukipindika chengo, ayima kupindika lipaulo lya Mulungu: na wala wapindika yawaye nu mhalo. 3Pakuya wakupaula nukuya wakuyogofya kwa lihengo linofu, leka kwa liwifu. Wila ulonda kuya wangayogopa chengo? ukita kinofu, ni yauye ni malumbo kipitile pa kila: 4pakuya ayii wakutumakila wa Mulungu kwako kwa kinofu. Koma wona ukita kiwifu, uyogope; pakuya atuwula lepa upanga waka: ndawa ayii wakutumakila wa Mulungu, wakunkilawusila kiwifu yula akiteye kiwifu kwa kudada. 5Kwa iki yaulekeke lepa kwiwika pasi, si ndawa ya kudada kwakape, koma ndawa ya chengo kya pa mwoyo kawili. 6Kwa ndawa iyi mulipa nsongo kawili; pakuya wayii wakutumakila wa Mulungu, kutafukila pa kindu kikilakila. 7Mumu muwalipile woha fila fiwalinganila: kwa yula wa nsongo, nsongo: kwa yula wa nsigilo, nsigilo; kwa yula wa woga, woga; kwa yula wa liginiko, liginiko.

8Musiya ni nsigilo kwa ayi yoha, lema kuwagana wayinu: pakuya yuangana yungi afwilanisi torah. 9Pakuya iki, Usikita ukeme, Usikoma, Usiyiwa, Usigana fya njinu, na wona luyii luwimbi lungi, siwunganiki pa lilowe ili, kukita, Unganaye mwenesi wako ngati wa mwene. 10Kiganano kimhengela lepa mwenesi wake kiwifu: mumu kiganano kiyii kya kufwilanisa torah.

11Na iki, kulumanya lukumbi, kukita saa hino yiyii kwa mwenga kuyimusika pa lugono: pakuya hino uyokosi uyii papipi na tenga kulutila pala tikayitakili. 12Kilo kilutiti, musi uwandamili: mumu tifule makitiko ga lwisi, tifwatike ni fya ngondo fya lulangalila. 13Tigendegende nu mwoyo umonga, ngati pa musi; nukuya pa mautofi ni kugala ugimbi, nukuya pa fiyaka nu kuhulachuku, nukuya pa kutumbulana ni pa wifu. 14Koma mwifwatike Bambo Yesu Kristo, ni musiyiwikilingani kwa nyama, kwa manyonyelo gake.

Currently Selected:

Roma 13: MGS1937

Highlight

Copy