Mafunukuliko 3
3
1Ni kwa malaika wa kanisa lya pa Sardis ulembe;
Aga ajowa uyu ayii ni Roho saba sya Mulungu, nu ndondo saba: Nimanya makitiko gako, kukita uyii ni lihina kukita ulama, ni uyii wakufwa. 2Uye wakutama miho, ni ufitamise ifi fisigala, fila fikalonditi kufwa: pakuya nikolili lepa makitiko gako gakufwilanika palongolo pa Mulungu wangu. 3Mumu ukumbukile umu ukayupiti ni umu ukayufwini; ni ufigohe ni kupela. Mumu wona ulema kutama miho, yanihiche ngati mwifi, ni yaumanye lepa saa wuli yanihiche pako. 4Koma uyii ni mahina gakuwalangika pa Sardis, gala gakabakisi lepa mingila yawe nu uwafu: ni yawagende‐gende nu nenga pa fifwato fiwalafu; pakuya wayii wakulinganila. 5Uyu wakuhotola wiwila yafwikike ni mingila miwalafu; ni yanisimise lepa lihina lyake pa kitabu kya kulama, ni yanilifumbule lihina lyake palongolo pa Dadi wangu, ni palongolo pa wamalaika wake. 6Uyu ayii ni lukutu, ayufwe iki Roho agajowela makanisa.
7Ni kwa malaika wa kanisa lya pa Filadelfia ulembe,
Aga ajowa mbalafu, wa chakaka, uyu ayii ni funguo ya Daudi, uyu adindula ni payilepe wakudinda, ni adinda ni payilepe wakudindula: 8Nimanya makitiko gako (lola, nipeliki palongolo pako ndyango udinduliki, uwu payilepe wakuhotola kuudinda), kukita uyii ni mbafu njoko, ni ukaligohiti lilowe lyangu, ni ukalikaniti lepa lihina lyangu. 9Lola, nipeleka wa pa sunagoge lya Shetani, wala wajowa kukita wayii waYehudi, ni wayilepe, koma wadeta; lola, yaniwakite kuhicha ni kugwilakimbo palongolo pa njayo syako, ni kumanya kukita nikuganiti. 10Pakuya ukaligohiti lilowe lya kwisinga kwangu, nenga nani yanikugohe pa saa ya kugeseka, iyi yilonda kuhicha pa ndima wa mfilimila, kuwagesa wala watamasika bahapa pa ndima. 11Nihicha nyata: kikangamakile iki uyii nakyo, nausi mundu asinyaka kikupiku kyako. 12Uyu wakuhotola, yaninkite lipanda pa hema ya Mulungu wangu, ni yapite kawili lepa kunja kuku: ni yanilembe pa yombe lihina lya Mulungu wangu, ni lihina lya likaya lya Mulungu wangu, Yerusalem wa hino, uwu uselela kipitile kunani kuhuma pa Mulungu wangu, ni lihina lyangu lila lya hino. 13Uyu ayii ni likutu, ayufwe iki Roho agajowela makanisa.
14Ni kwa malaika wa kanisa lya pa Laodikea ulembe,
Aga ajowa Amen, ndungumakiso wakukeleka, ni wa chakaka chakaka, kutumbula kwake mapangiko ga Mulungu: 15Nimanya makitiko gako, kukita uyii nukuya wakusisima haka wakuwila: mbanga ngauyili wakusisima pangi wakuwila. 16Wiwila pakuya upyupa waka, nukuya wakusisima nukuya wakuwila, nilonda kukutapika pa ndomo pangu. 17Pakuya ujowa, Nenga nkafi, ni nitopela, ni nakulemuka kandu; ni umanya lepa kukita uyii wakuhumbusika, ni wakulonda lipyana, ni ngaju ni wakukoyoka miho ni wa ukengele: 18nikupangila luhala uhemele kwa nenga zahabu yakuguyulika nu mwoto, nausi uye nkafi; ni mingila miwalafu nausi wifwatike, ni lihamu lya ukengele wako lisiwoneka pa lulanga: ni mitende kubakasa miho gako, nausi ulole. 19Woha awa niwagana, niwakila ni kuwayambulisa: mumu ukite ukiki ni kupela. 20Lola, niyima pa ndyango ni kukung’unda: mundu wona ayufwana njowelo yangu ni adindula pa ndyango, yaniyingile kwake, ni yanilye nuyombe, nuyombe pamonga nu nenga. 21Uyu wakuhotola, yanimpele kutama pasi pamonga nu nenga pa kitihu kyangu kya kiutwa, umu nenga nani nikahotwili, ni nikatamili pasi pamonga nu Dadi wangu pa kitihu kyake kya kiutwa. 22Uyu ayii ni likutu, ayufwe iki Roho agajowela makanisa.
Currently Selected:
Mafunukuliko 3: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
