Mafunukuliko 1
1
1Mafunukuliko ga Yesu Kristo, aga Mulungu akampili nausi awalase wawanda wake, findu ifi yafipate kuya baho nyata: ni pakatumiti kwa malaika wake akandasiti mbanda wake Yohana pa fiwalalilo; 2uyu akalasiti ulungamakiso wa malowe ga Mulungu, ni wa kufumbula kwake Yesu Kristo, fiyi fyoha ifi akafiweni. 3Wakusengwa uyu wakusoma ni wakuyufwana malowe ga kulweta uku, ni wakufigoha ifi filembiki mumu: pakuya lukumbi lwake luyii papipi.
4Yohana kwa makanisa mhano na gawili aga gayii pa Asia: Neema kwinu ni kindamba, kuhuma pa yombe uyu ayii ni akayili ni ayii mu kuhicha; ni kuhuma pa roho saba isi siyii palongolo pa kitihu kyake; 5ni kuhuma pa Yesu Kristo, ndungumakiso wakukeleka, wa kiwele wa wala wakufwa, ni wakutumbulisa wa watwa wa ndima. Kwa uyu atigana, ni akatiwopwili pa sambi situ nu mwasi wake; 6ni akatikitili utwa, ni makasisi kwa Mulungu ni Dadi mundu; kwa yombe kukwisika ni kuyangala kwa miaka ni miaka. Amen. 7Lola, ayicha ni mafundi; ni liho liyi lyoha yalimbone, na wala nuwombe wakamhomiti; ni mitangilo yoha ya pa ndima yayipumunde pa mioyo ndawa ya yombe. Ena, Amen.
8Nenga niyii Alpha nu Omega, ajowa Bambo Mulungu, uyu ayii ni uyu akayili ni uyu ayii mu kuhicha, Mwene mbafu syoha.
9Nenga Yohana ndongo winu, ni wakuhasangana nu mwenga pa mahumbuso ni utwa ni luyumalakilo mwa Yesu, nikayili pa kilumba kya kukemeleka Patmos, kwa ndawa ya malowe ga Mulungu, ni ya ulungamakiso wa Yesu. 10Nikayili mwa Roho pa ligono lya Bambo, ni nikayufwini panyuma pa nenga njwawila ngulungu, 11ngati mbata, kujowa, Iki ulola, ukilembe pa kitabu ni kuchipeleka pa makanisa saba; ku Efeso, ni ku Smurna, ni ku Pergamo, ni ku Thuatira, ni ku Sardis, ni ku Filadelfia, ni ku Laodikea. 12Ni nikang’anamwiki kulola njowelo iyi yiyii mu kulongela nu nenga. Ni pakung’anamuka nikaweni pakuwikila nyali saba pa zahabu; 13ni pagati pakuwikila nyali wakuhwanangana ni mwana wa adam, afwatakiki ni mwingila mpaka mu njayo, ni waniengiki mu mawele nu lukoto lwa zahabu. 14Leka mutu wake ni mayunju gake gakayili mawalafu ngati lwagi lwa limbelele liwalafu, ngati theluji; ni miho gake gakayili ngati lilambe lya mwoto; 15ni njayo syake sikahwanangini ni ngenge yakuguyulika, ngati yakulilika pa litende lya mwoto: ni njowelo yake yikayili ngati njwawila ya machi mingi. 16Ni akayili ni ndondo saba pa kiwoko kyake kya kigosi: ni kipitile pa ndomo pake upanga wa mawugi gawili gakutema: ni kyene kyake kikayili ngati umu liwonakela lijuwa pa mbafu yake. 17Na pala nikambweni, nikagwili pa njayo syake ngati wakufwa. Ni akawikiti kiwoko kyake kya kigosi pa nenga, kunijowela, Usiyogopa; 18nenga niyii wakutumbula ni wakumalakila, ni Wakulama; ni nikayili wakufwa, ni lola, niyii wakulama kwa miaka ni miaka, ni niyii nasyo funguo sya kifwa ni sya Pandu pa mahoka. 19Mumu ulembe ifi ukafiweni, ni ifi fiyii baho, ni ifi fiyicha panyuma; kya kuhyetu kya ndondo saba sila ukasiweni pa 20kiwoko kyangu kya kigosi, ni pakuwikila nyali saba pa zahabu. Ndondo saba siyii wakamalaika wa makanisa saba: ni pakuwikila nyali saba payii makanisa saba.
Currently Selected:
Mafunukuliko 1: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
