Filipi 1
1
1Paolo nu Timoteo, wawanda wa Kristo Yesu, kwa wawalafu woha mwa Kristo Yesu wala wayii pa Filipi, pamonga na maaskofu nu mashemasi: 2Neema kwinu ni kindamba kuhuma pa Mulungu Dadi witu nu Bambo witu Yesu Kristo.
3Ninsengusa Mulungu wangu pakuwakumbukila mwenga kuyi kwoha, 4magono goha pa liluwo lyangu liyi lyoha pa mihalo ya mwenga mwawoha kiluwile pa kuhekelela, 5ndawa ya kuhasangana kwinu pa kuwandisa evangel kitumbulile ligono lya kutumbula mpaka hino; 6kitamile pa kihuwalilo iki, kukita uyu akatumbulisi likitiko linofu pa mwenga yalifwilanise mpaka ligono lya Yesu Kristo: 7umu kuyili kugoloka kwa nenga kuya nu mwoyo uwu panani pa mwenga mwawoha, ndawa niyii namu mwenga mwa mwoyo wangu, pakukita muhasangana mwawoha nu nenga pa neema, pa migoyi yangu ni pa kuyiyimalila evangel ni kuyikangamasa. 8Pakuya Mulungu ayii ndungamakiso wangu, umu niwaganila mwawoha pa mayuyulu ga Kristo Yesu. 9Na iki niluwa, nausi kugana kwinu kufuluke kulutila pakumanya na pa kuwalalila kwoha; 10kukita mulinganise fyakulekana; nausi muye wa chakaka ni pangali kukuwasika mpaka pa ligono lya Kristo; 11muye wakufwilinasika ni kipambiko kya kugoloka, kila kihuma pa Yesu Kristo, kwa kukwisika nu kulumba kwake Mulungu.
12Nilonda kukita mumanye, walongo, kukita fila fikitiki pa nenga fikapatiti kugendesela evangel; 13mpaka migoyi yangu yikalasiki pa Kristo pa libanja lyoha lya Kaisar, ni kwa woha wakusigala; 14ni kukita wingi wa walongo pa Bambo wakuhuwalila pa migoyi yangu, wasindimala kiyolokile kujowa lilowe lya Mulungu pangali kuyogopa. 15Wangi nawombe wawandisa Kristo ndawa ya kuwinisa mwoyo ni kutumbulana; na wangi kawili nu mwoyo unofu wambwandisila Kristo: 16wala kipitile pa kiganano, pa kumanya kukita niwikiki pa kuyihigila kwake evangel; 17koma wala kipitile pa kutumbulana, nukuya manofu wambwandisa Kristo, pakuhola kukita yawaniwusile mahumbuso pa migoyi yangu. 18Mumu kiki? Lema kukita payi poha, haka pa kwikangalakisa haka pa fya chakaka, Kristo awandasika; na pa iki nihekelela, ena yanihekelele. 19Pakuya nimanya kukita iki yanking’anamukile kiyingilile pa uyokosi wangu, pa kuluwa kwinu ni kuyenesela kwake Roho wa Yesu Kristo, 20kwa ndingo wa kulolalela kwangu ni kihuwalilo, kukita yaniye wakulekaleka lihamu lepa pa kindu kiyi kyoha, koma ngati magono goha, wiwi hino, pa kusindimala Kristo yakwisike pa mbili wangu, pangi pakulama, pangi pakufwa. 21Pakuya kwa nenga kulama kuyii Kristo, ni kufwa kuyii mbendo. 22Koma wona kulama pa nyama, — iki kiyii kipambiko kya mahengo gangu, iki yanihagulile nimanya lepa. 23Leka nifutiki pa ifi fiwili, pakuya nu mwoyo wa kulonda kuwuka ni kutama pamonga nu Kristo; ndawa iki kiyili kinofu kulutila: 24leka kuhwela baho mwa nyama kilondeka ndawa ya mwenga. 25Ni pakuya ni kihuwalilo iki, nimanya kukita yanihwele baho, ena, yanihwele pamonga nu mwenga mwawoha, kwa kulongosa kwinu ni kuhekelela pa kiyitakiso; 26nausi kwilumba kwinu kuyoloke mwa Kristo Yesu pa nenga pakuya baho nenga kawili pa mwenga. 27Koma matamilo ginu mu likaya galinganile evangel ya Kristo: nausi wona niyicha kuwawona, pangi niya pangi, niyufwane ndumi sinu, kukita muyima ngani pa roho yimonga, pakukita makani nu wumi umonga kukangamisa kiyitakiso kya evangel; 28wangali kuyogopa pa kindu kiyi kyoha kya wakupindika: iki nakyo kwa wombe kiwalalilo kya kutagika, leka kya uyokosi winu, uwu uhuma pa Mulungu; 29pakukita kwa mwenga ipelakiki pa mhalo wa Kristo, kwangali kunkela kwakape, koma kawili kuyufwana mahumbuso pa mhalo wake: 30wene kugima kukulakula mukakuweni pa nenga, ni lilino muyufwana kukita kuyii pa nenga.
Currently Selected:
Filipi 1: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
