Efeso 4
4
1Mumu nenga, wakukungika pa Bambo, niwapembesa mugendegende mwakulinganila kakemeleko aka mukakemaliki nako, 2pamonga na kwiselesa kwoha nu uwololo nu kuyufwana mahumbuso, kuhegelelana pa kiganano; 3wakulalukila pa kugoha umonga wa Roho pa kikungilo kya kindamba. 4Uyili mbili umonga, nu Roho yumonga, ngati umu mwakemaliki pa kihuwalilo kimonga kya kakemeleko kinu; 5Bambo yumonga, kiyitakiso kimonga, ubatiso umonga, 6Mulungu yumonga nu Dadi wa woha, uyu ayii panani pa fyoha, na pa fyoha, na mgati mwa fyoha. 7Koma kwa ayi yoha wa tenga yipeliwi neema kwa ndingo wa kya waka kyake Kristo. 8Kwa iki ajowa,
Pakakweliti panani, akatondwili mateka,
Nakapili fya waka kwa wandu.
9(Leka iki, Akakweliti, kiki kiyii lema kukita akaselili pa fina fya ndima? 10Uyu akaselili yuyu ayii uyu akakweliti kunani, panani pa mafundi goha, nausi afwilanise fyoha.) 11Leka akapeliki wangi maapostolo; na wangi wakulweta; na wangi wa kuwandisa evangel; na wangi wakudima na walimu; 12kwa kuwafwilanisa wawalafu, kwa lihengo lya kutumakila, kwa kuujengela mbili wa Kristo: 13mpaka tiufikila umonga wa kiyitakiso, ni pa kumanyisa Mwana wa Mulungu, mpaka pa mundu wakumalakilana, mpaka pa ndingo wa ntunda wa kifwilanilo kyake Kristo: 14nausi tisiya wana, wakuweweluka na mayiga na kutoleka uku nu uku ni mbepo iyi yoha ya mayigaliso, pa kukonga kwa wandu, pa uchenjefu, kwa ndingo wa malango ga kusowesa; 15koma pakukita fya chakaka, pa kiganano, tikule pa yombe pa fyoha, uyu ayii mutu, yuyu Kristo; 16kipitile pa uyu mbili wa mfilimila wakukungika ni wakukangamasika pamonga wicho pa kifundu kiyi kyoha, kwa ndingo wa kuhenga pakulingila lilundu liyi lyoha, likitila kwiyonjakesa mu mbili mpaka pa kwijengela kwene pa kiganano.
17Mumu nijowa iki, ni nilasa ulungamakiso pa Bambo, musigendagenda kawili ngati umu wa Mihuku wagendela, pa mfuki wa waka wa maholo gawe, 18wakulekaleka lwisi pa malango, wakukangichana nu kulama kwake Mulungu, kwa ndawa ya kyangali kumanya kula kuyii pa wombe, kwa ndawa ya kunonopa kwa mwoyo wawe; 19awa nuwombe pakuya wakuwola nyamhope, wakifumbulisi kwa luku, kukita wafu woha nu lulyo. 20Leka mwenga nukwiwula wila Kristo lepa: 21wona mukanjufwini, ni mukawuliki pa yombe, ngati umu fya chakaka fiyii pa Yesu: 22kukita mufulile ngani, kwa ndingo wa matamilo ginu ga mwandi, umundu wa mwandi, wula uyanangike kwa ndingo wa manyonyelo ga kukongesa; 23ni kukita mulamasike pa roho ya maholo ginu, 24ni kwifwatakisa umundu wa lilino, wula kwa ndingo wa Mulungu upangiki pa ugolofu nu uwalafu wa fya chakaka.
25Kwa iki, kufula mageya, mulongelaye fya chakaka mundu ayi yoha nu mwenesi wake: pakuya tiyii fipingili fya wayitu. 26Mudade ni musikita sambi: lijuwa lisiwayiwilila nu kudada kwinu: haka musimpela diabolo pandu. 27Uyu ayiweye asiyiwa kawili: 28koma mbanga ahenge lihengo, kuhenga na mawoko gake kinofu, nausi aye ni kindu kya kumhapulila yula kinsowa. 29Lilowe liyi lyoha lya waka lisipita pa ndomo pinu, koma lila liyii linofu kwa kujengela umu ilondeka, nausi liwapelekela neema wala wayufwana. 30Ni musiniongonesa Roho Mbalafu wa Mulungu, pa uyu mukakomaliki kwa ligono lya uyokosi. 31Kuywawa kwoha, ni kufyoma, ni kudada, na njwawila, na maligo, gawusike pa mwenga, pamonga na kuwipa kwoha: 32na muye wa lukolo yungi nu njini, wene mwoyo wa lipyana, kulekelekesana, ngati umu Mulungu nuyombe mwa Kristo awalekelakisi mwenga.
Currently Selected:
Efeso 4: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
