Makitiko Ga Maapostolo 27

1Leka baha na baha kukapawuliki kukita tibite na matanga ku Italia, wakampeliki Paolo na wangi kawili wa minyololo kwa Kenturion, lihina lyake Julius, wa libanja lya Augusto. 2Na pakuyingila pa liboti lya Andramutio, lila likalonditi kubita na matanga pandu pa Asia, tikakulwili, ni Aristarko, mMakedonia wa Thessalonika, akayili nu tenga. 3Na ligono lingi tikachiti ku Sidon: ni Julius akaniambiti mwoyo kwa Paolo, akanjitakili abite mwanja kwa wakosi mundu apate kukemeleseka. 4Leka tikakulwili kuku, tikabiti na matanga kuhyeto ku Kupro, ndawa mbepo sikayili mlongolo. 5Ni apa tikalutiti ni matanga pagati pa nyanja iyii yiyii papipi ni Kilikia ni Pamfulia, tikachiti ku Mura, wa Lukia. 6Ni kuku kenturion akakolili liboti lya Aleksandria lyakubita na matanga mpaka Italia; na akatipakili mumu. 7Leka apa tikabiti pachokopachoko magono mingi, ni mwakukangamala tikachiti pa kipula ni Knido, apa mbepo yikatiyitakili lepa kawili, tikabiti kuhyeto ku Krete, pa kipula ni Salmoni; 8ni kugenda lwasi umu mwakukangamala tikachiti pandu pakukemeleka Lilowoko Linofu; papipi pake payii likaya lya Lasia.

9Leka apa lukumbi lukalutiti lungakepa, ni mwanja wa hino ukayili ulugu, ndawa Lukumbi lwa kwinota kyakulya lukalutilingani, 10Paolo akawakiliti, kuwajowela, Wagosi, nilolalela kukita mwanja yautame nu kuyananga ni kutagika kukulungu, nukuya kwa mpako ni liboti lyakape, leka kwa mawumi gitu kawili tawete. 11Leka kenturion akakongiki ni wakukamula lipingilo ni mwene liboti, nukuya na aga Paolo akalongili. 12Leka pakuya lilowoko ili nukuya linofu kutama baho pa lukumbi lwa kipepo, wingi wakalonditi kukulula kuko, wona kwali wakahotwili kuyicha pa Foinike, ni kutama baho kipepo, ili liyii lilowoko lya Krete kulasa kunkachi ni ku lulinga. 13Leka pakupepeta nkachi apa wakaholiti kukita wakapatili umu wakalondili, wakakwesiti nanga ni kugenda lwasi pa Krete. 14Leka panyuma pake pachokope mbepo kihwanakiso kya limbupulu, lihina lyake Eurakwilo, 15yikapepiti kuku: leka apa liboti likatoliki ni makakala, nakuhotoleka lepa kuyingila pa mbepo kulasa pa makigi, tikakotwiki kwipindika na tikatoliki waka. 16Leka kugenda lwasi kuhyeto kwa kilumba kya kukemeleka Kauda, tikahotwili mwakukangamala, kukakungisa kaboti: 17ni apa wakakwesiti, wakatumili fya kutangatila, wakakungiti liboti kuholosya migoyi pasi pake; na pakuyogopa wasigwa pa Surtis, wakaselisi findu fya liboti, na wilawila tikatoliki waka. 18Leka apa tikatopeliki nyahope ni limbupulu, lukela lwake wakatumbwili kutaga findu kunja; 19ni ligono lya kadatu na mawoko gawe wene wakatagiti misigo ya liboti. 20Leka apa haka lijuwa haka ndondwa nakuwala lepa magono ga mahele, ni limbupulu likulungu likatigwilili, kihuwalilo kyoha kya kukita yatiyokoleke kikatagiki ngani hino. 21Ni apa wakayili ni njala nyahope, bahalapala Paolo akayimi pagati pawe nakajowiti, Wagosi, mwalinganili kuniyufwanila, nukukulula lepa kuhumila Krete, ni kupata ulugu uwu ni kutagika. 22Ni hino niwakila mwenga muye nu mwoyo: pakuya yakuye lepa kutagika wumi wa mwenga, lema liboti lyakape. 23Pakuya kilo iki malaika wa Mulungu uyu niyii wamwene, uyu kawili nintumakila, 24akayimi pa nenga, kujowa, Ukotoke kuyogopa, Paolo; ulinganila kuyima pa chengo kya Kaisar: na lola, Mulungu akupili kwa neema woha awa wakukulula pamonga na wenga. 25Ndawa iyi, wagosi, muye nu mwoyo unofu: pakuya ninkela Mulungu, kukita yakitame wilawila umu kikalongaliki na nenga. 26Leka tilinganila kutagika pa kilumba kinunuyu.

27Leka apa kilo kya kumi na ncheche kikachiti, na tenga kutoleka uku na uku pa Adria, pagati pa kilo wandu wa deck wakaholiti kukita wawandamila ku ndima; 28ni apa wakatumalili lead, wakapatiti mikwamba makumi gawili: leka kugenda kawili pachokope, ni kutumalila kawili, wakakolili mikwamba kumi nu mhano. 29Na pa kuyogopa tisigwa pandu pene maganga, wakatumalili kumbingo nanga ncheche, wakaluwiti utame musi. 30Leka apa wa deck wakalonditi kukimbila pa liboti, na wakaselisi kaboti pa nyanja, kihwanakiso kya kulongosa ni nanga pa kilomo, Paolo anjowili kenturion na asikari, 31Wona awa walemiti kuhwela pa liboti, mwenga nukuhotola kuyokoka. 32Bahalapala asikari wadumwili migoyi ya kaboti, na wakalekiti kuweweluka. 33Leka apa yikayili papipi nu musi, Paolo akawapembisi woha walye kyakulya kujowa, Lilino ni ligono lya kumi ni ncheche mumalikilana kulolalela ni njala nukuyupa lepa kindu. 34Ndawa iyi niwapembesa mwenga muyupilane fyakulya, pakuya ifi fiyii kwa uyokosi kwinu: pakuya nukuya mundu wa mwenga liyunju lya mutu wake yalitagike. 35Leka apa akajowiti aga, ni akatoliti nkate, akansengwisi Mulungu pa miho ga woha: na akametwili, na akatumbwili kulya. 36Leka woha wakasangalwiki, na wakatoliti kyakulya nawombe kawili. 37Leka tikayili pa liboti woha wandu mia mbili na makumi mhano na gawili na sita. 38Leka apa wakatupili kyakulya, wakayuyusiti liboti, kutaga trigo pa nyanja. 39Leka apa ukayili musi, wakamanyiti lepa ndima: leka wakaweni kalowoko ni mhanga wake, na wakapangini wahotole kwali kukangisya mumu liboti. 40Ni kuwopola ngani nanga, wakasilekili pa nyanja, ni wakawopili kawili migoyi ya kukunga sigilo; na kukwesa tanga lya kulongolo kwa mbepo, wakagenditi kuyingila pa mhanga. 41Koma pa kugwila pagati pa pandu pa kuputingana nyanja siwili, wakayingisi ngani liboti ku ndima; ni kilomo kyake kikayingili kwa makakala, ni kikatemi kyanganyukanyuka, koma mbingo yikakaywiki kwa makakala ga mayiga. 42Leka luhala lwa asikari lukayili kuwakoma wa minyololo, asisugila yumonga ni kukimbila. 43Leka kenturion, pakulonda kunjokola Paolo, akawakanisi kwa luhala lwawe; ni akapawili kukita awa waho tolakusuga wayitage kulongolo, kufuwuka ku ndima: na wakusigala, 44wangi pa mapondo, na wangi pa findu fya kuhumila pa liboti. Na wilawila woha wakayokwiki ku ndima.

Currently Selected:

Makitiko Ga Maapostolo 27: MGS1937

Highlight

Copy