Makitiko Ga Maapostolo 26

1Leka Agrippa akanjowili Paolo, Kiyitikalika ujowe wamwene pa mhalo wako. Bahalapala Paolo, pakatambaswili kiwoko, akayihigili kukita,

2Nisengusa kukita lilino yanihigile pa chengo kyako, mutwa Agrippa, ya fyoha fila nilungamakasika nafyo ni waYehudi: 3pakuya wenga wakumanyisa mikuwu yoha ni makoto ga waYehudi: ndawa iyi nikuluwa uniyufwanile mwakwisinga. 4Mumu matamilo gangu kitumbulile uchoko wangu, aga gayili kitumbulile pakutumbula pa mhuku wangu, na pa Yerusalem, wamanya woha waYehudi; 5pakuwalalila ya nenga kitumbulile mwandi, wona walonda kulasa ulungamakiso, umu ndingo wa kapatuliko kakulutila ka dini ya tenga, nikalamiti mFarisayo. 6Na hino niyima apa nipawulike pa mhalo wa kihuwalilo kya kilago kila kyakitiki nu Mulungu kwa wakadadi witu; 7kukulakula mitangilo yitu kumi ni yiwili, pakutumakila kulutila musi ni kilo, wahuwalila kufikila. Ni ndawa ya kihuwalilo iki nipelewa mhalo na waYehudi, Mutwa! 8Wuli kipawulika kwinu kyangakeleka kukita Mulungu asyusa wakufwa? 9Chakaka kukaniwonakili wicho namwene kukita nilinganila kukita fingi fyakupindika lihina lya Yesu wa Nazareti. 10Na iki kawili nikakiti pa Yerusalem: leka nikadinditi pakukungika wa mahele wa walalafu, apa nikayupiti chengo kila kwa makasisi wakulungu, na kawili, pakukomeka awa, nikayitakili mumu. 11Na pa masungoge goha pangi‐pangi kuwayambulisa pingi, nikayili kuyumalakila wajowe blasfemia; na pakulutila kuya nu lupengo pa awa, nikawahyungiti mpaka haka makaya ga kigeni. 12Mumu, pakubita mwanja ku Damasek, ni chengo nu luwimbi lwa makasisi wakulungu, 13lijuwa pa mutu, Mutwa, pa ndila nikaweni lulangalila kuhumila kunani, kulutila kumulika kwake lijuwa, ni lukamuliki kunisyungutila nenga na wala wa mwanja pamonga nu nenga. 14Na apa tagwili tawoha pasi, nikayufwini lilowe kunijowela pa ki Hebrayo, Saul, Saul, unikimbisila kiki? kinono kwa wenga kufyatila fyakuhongoleka. 15Leka nenga nikajowiti, Uyii nani, Bambo? Na Bambo akajowiti, Nenga niyii Yesu uyu unihyunga. 16Leka uyime, ni uyimaye pa magulu gako: pakuya nakuwonakili ndawa ya iki, kukukamusa uye wakutumakila nu ndungamakiso wa ifi uniweni mumu, ni wa ifi yanikuwonakile mumu; 17kukuwusa pa nsafi ni pa Mihuku kwa wala nikutuma kwawe, 18kuwadindula miho gawe, ni kuwang’anamusa kuhuma pa lwisi kiyingalile mu lulangalila, ni kuhuma pa mbafu ya Shetani kwa Mulungu, nausi wayupe kulekelekesa sambi ni lilundu pagati pa wala wakuwalasika pa kiyitakiso kiyii pa nenga. 19Mumu, mutwa Agrippa, nikayili lepa wangayufwana lingumbisi lya kunani: 20leka pa wala pa Damasek pakutumbula, ni pa Yerusalem kawili, ni pa ndima woha waYehudi, ni pa Mihuku, nikawandisi kupela ni kunkilawukila Mulungu, pakukita ifi fyakulinganila kupela. 21Kwa ndawa iyi waYehudi akanikamwili pa kawili, ni wakalonditi kunikoma. 22Mumu pakupatila matangataliko kuhuma pa Mulungu, mpaka lilino ili niyima kulasa ulungamakiso kwa nchoko nu nkulungu, nukujowa kandu lepa lema aga wakulweta wakalongili nu Musa kukita yagayiche; 23kukita Kristo uyu ngahumbusiki, nu kukita pakutama wakutumbula pa kusyuka kwa wakufwa yawandise lulangalila kwa nsafi ni kwa Mihuku kawili.

24Leka pakayihigili aga, Festo akakwesiti lilowe kujowa, Uyii nu lupengo, Paolo; kumanya kwako kungi kung’anamusa wenga kwa lupengo. 25Leka Paolo akajowiti, Nukuya lepa wa lupengo, Festo nnofu kulutila, koma nipisa malowe ga chakaka ni ga luhala gangayumbatika waka. 26Pakuya mutwa awalalila ga findu ifi, ni kwake nilongela pa ukamba: pakuya nenga nukukela lepa kukita kandu ka findu ifi kafihiki kwake; pakuya kindu iki kikitiki lepa kuhyetu. 27Mutwa Agrippa, uwakela wakulweta? Nimanya kukita ukela. 28Leka Agrippa akanjowili Paolo, Pa kyakichoko uyii mu kunikonga nenga nikitike mKristo. 29Leka Paolo akajowiti, Wona nikaganiti kwa Mulungu, kukita haka pa kyakichiko haka pingi, nukuya wenga wakape, koma woha awa waniyufwanila lilino nawombe kawili, wakitike kimonga‐kimonga ngati nenga namwene, lema kwa minyololo. 30Nu mutwa akayimiti, ni nduna, ni Bernike, na awa wakutama nawo: 31ni apa wakawukiti, wakajowini kukita Mundu uyu nukukita lepa kandu kakulinganila kufwa haka minyololo. 32Leka Agrippa akanjowili Festo, Mundu uyu ngahotwili kuwopoleka, wona akankemili lepa Kaisar.

Currently Selected:

Makitiko Ga Maapostolo 26: MGS1937

Highlight

Copy