II Thessalonike 2
2
1Leka tiwapembesa mwenga, walongo, panani pa kuwoneka kwake Bambo witu Yesu Kristo, ni kuwunganika kwitu kwa yombe; 2kukita musidigadisika nyata pa maholo ginu, haka kusyungutila mutu, kwa roho, pangi pa malowe, pangi pa epistola ngati kuluta pa tenga, ngati kukita ligono lya Bambo liyimiti bahapa; 3mundu asiwakongela kuyi kwoha: pakukita kwa waka, wona kulemiti kuhanguka palongolo, ni kufunukulika mundu wa sambi, mwana wakutagika, 4yula wakwiwikila pa kipula na wakwikwesa panani pa kiyi kyoha kikemeleka Mulungu pangi kigwilika kimbo; mpaka kwitamisa pa hekalu ya Mulungu, kwilasila ngani mwene kukita ayii Mulungu. 5Mukumbukila lepa ati, kukita pala nikayili pamonga na mwenga, nikatawalili findu ifi? 6Na hino mumanya kila kyakusiwilakisa, nausi afunukulike pa lukumbi lwake mwene. 7Pakuya kya kuhyetu kya pangali torah kikitila hino, kwakape ayili wakusiwilakisa hino apa, mpaka awusike kuwuka baho. 8Na bahalapala yaafunukulike yula wangali torah, yula Bambo Yesu yankome nu mfuki wa pa ndomo, ni kumbusa pa kulasika kwa kuwoneka kwake; 9kuhicha kwake kuyii kwa ndingo wa kukita lihengo kwake Shetani ni mbafu yoha ni fiwalalilo ni finyantiti fya mageya, 10ni pa kukonga kuyi kwoha kwangali ugolofu kwa wombe wayii mu kutagika; ndawa wakayupiti lepa kufigana kwake fya chakaka, nausi wayokoleke. 11Na kwa ndawa iyi Mulungu awatumila kuhengela kwa kusowesa, wakele mageya: 12nausi wapaulike woha awa wakakeliti lepa fya chakaka, koma wakiganili pa fyangali ugolofu.
13Leka tenga tiyii ni misigilo magono goha kunsengusa Mulungu ndawa ya mwenga, walongo wakuganika nu Bambo, pakukita Mulungu awahagwili mwenga kitumbulile pakutumbula kwa uyokosi pa kuwalasa kwake Roho ni kukela fya chakaka: 14pa kila akawakemili pa evangel yitu, kwa kwipatila kukwisika kwake Bambo witu Yesu Kristo. 15Mumu, walongo, muyimaye kiyimile, ni mukangamalaye pa mawungu gala mukayigilasiwi nago, pangi kuluta pa lilowe, pangi pa epistola yitu.
16Leka Bambo witu Yesu Kristo mwene, nu Mulungu Dadi witu uyu akatiganiti ni akatipili kunyamasa kwa miaka ni kihuwalilo 17kinofu pa neema, ayinyamase mioyo yinu ni kuyikangamasa pa lihengo liyi lyoha ni lilowe linofu.
Currently Selected:
II Thessalonike 2: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
