I Timoteo 1
1
1Paolo, apostolo wa Kristo Yesu kwa luwimbi lwa Mulungu Njokosi witu, nu Kristo Yesu kihuwalilo kitu; 2kwa Timoteo, mwana wangu wa chakaka pa kiyitakiso: Neema, lipyana, kindamba, kuhuma pa Mulungu Dadi nu Kristo Yesu Bambo witu.
3Umu nikakukiliti uhwele pa Efeso, pala nikayili nu mwanja ku Makedonia, nausi uwataukile wangi kukita wasiyigalisa mayigaliso gangi gangi, 4na wasiyufwanila sumu na mawalangiko gangamalakila ga fihogosi, gala gakita mapindikano, gangali kugoha kwake Mulungu kula kuyii pa kiyitakiso; wiwi hino. 5Leka kumalakisa kwake utenga kuku kuyii kiganano kipitile pa mwoyo wakuguyulika ni chengo kya pa mwoyo kinofu ni kiyitakiso nakwikangalakisa: 6pa fila wangi wapuwiti ni kupatuka mpaka pa malowe ga mfuki wa waka; 7pakulonda kuya walimu wa torah, haka nakuwalalila aga wajowa, ni aga wakangamala. 8Koma timanya kukita torah yiyii yinofu, wona mundu ayitumila kwa ndingo wa torah, 9pakumanya iki, kukita torah nakuwikika kwa mundu ngolofu, koma kwa wangali torah ni kwa wala watumbulana, kwa wangali kungwilakimbo Mulungu na wene sambi, kwa wa wafu na wa blasfemia, kwa wakukoma wakadadi na wakukoma wakamau, kwa wakukoma wandu, 10kwa wa ukeme, kwa wakwikita kiwifu wene na wagosi, kwa wakuyiwa wandu, kwa wa mageya, kwa wakulapila mageya, ni wona kiyii kindu kiyi kyoha kingi kya kupindika ni liyigaliso lya kusangalukisa; 11kwa ndingo wa evangel ya kukwisika kwa Mulungu wakusengwa, yila nikakamulasiki nayo.
12Ninsengusa uyu akanipili mbafu, Kristo Yesu Bambo witu, pakukita akaniwalangili wakukeleka, kuniwikila pa kutumakila kwake; 13haka nikayili palongolo wakujowa blasfemia, ni wakuhyunga, ni wa ukali; koma nikapwelaliki lipyana, ndawa nikakiti pangali kumanya pangali kiyitakiso; 14ni neema ya Bambo witu yikayokwili nyamhope kwa kiyitakiso ni kiganano kila kiyili mwa Kristo Yesu. 15Lyakuyitikalika lilowe lila, ni lyakulinganila kuyupika na woha, kukita Kristo Yesu akachiti mu ndima kuwayokola wene sambi; na wa wala nenga niyii nkulungu: 16koma kwa ndawa iyi nikapwelaliki lipyana, nausi pa nenga nkulungu alasile Yesu Kristo kwisinga kwake kwoha, kwa ndingo wa wala yawakele pa yombe panyuma pake kwa kulama kwa miaka. 17Leka kwa Mutwa wa miaka ni miaka, nakuyanangika lepa, nakuwoneka lepa, Mulungu wakapekape, liginiko ni kukwisika kuye kwa miaka ni miaka. Amen.
18Luwimbi ulu nikupindila, mwanangu Timoteo, kwa ndingo wa malowe gakulweta gakalongwisi kwako, kukita pa gala mukomane pa ngondo yinofu; 19kikamulile kiyitakiso ni chengo kya pa mwoyo kinofu; kila wangi apa wakitagiti wayii chombo kyakukayuka pa kiyitakiso: 20wa wombe ayii Humenes nu Aleksander; wala nawombe nawafumbwili kwa Shetani, nausi wayiyigalise kukotoka kujowa blasfemia.
Currently Selected:
I Timoteo 1: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
