Ebhikorwa bhya Abhatumwa 28

Pawuro ari kw-isinga rya Meerita

1Bhunu ꞉kyawonere okufwa mu-nyanja, niwe nkimenya ati riisinga rinu kiriko eritogwa ati Meerita. 2Abheekasi bha kw-isinga kuyo mbakiramira kujomu muno, raabhé kutyo ꞉bhaariga bhatakukimenya. Mbakikoomera omuriro, kwa okubha ingubha ꞉yaariga iguuye na imbewo iri nyafu, mbakibhwira kibhire omuriro. 3Pawuro ˆnaakumanya ginkwi ˆnaatuuraga mu-muriro. Bhunu ꞉aariga ˆnaakuura omuriro, riibhiriira ndikora ekisoro nkisoromoka mu-nkwi, nkimuruma nkiineena ku-kubhoko kwaye.

4Bhunu abheekasi bhayo ꞉bhaarorere kutyo ekisoro ꞉kyariga kiineenere ku-kubhoko kwa Pawuro, mbabhwirana ati, “Omuunu unu ni mwiti, raabhé kutyo awonere okutubhira mu-nyanja, ku-rinu ekiwi kitakutura okumusiga-wo.” 5Nawe Pawuro ˆnaakikuukumurira mu-muriro, na ekisoro kiyo ꞉kitaamukoreeye bhusungu. 6Abhaanu bhayo mbategereraga raabhe Pawuro kaaja okufwimba, raabhe kaaja okugwa ansi afwe, weewaaga! Niwe mbaamba okwaika ati Pawuro atari muunu ni esambwa.

Pawuro kaawosha omurwaye kw-isinga rya Meerita

7Ayeeyi na ayo ꞉kyariga kiri, ꞉ryariga ririwo riisambu rya omukuru wa riisinga riyo, riisiina rya omukuru uyo ˆnaatogwa ati Pubhuriyo. Pubhuriyo woone ˆnaakiramira kujomu ewaaye, nkimara nsiku esatu kiri ayo. 8Mu-kabhaga kayo ꞉kyariga kiri ewa Pubhuriyo, esemwene ꞉aariga asingire ari ku-bhuriri, arwaye omuswija, ˆnaasaayaga na insagama. Pawuro ˆnaagenda okumukeesha. ˆNaamusabhira ku-Nyamuwanga, ˆnaatuura amabhoko ku-mubhiri gwa omukaruka uyo, kimwi omukaruka ˆnaawora. 9Amangʼana gayo ngakora abharwaye abhandi bhoone kutyo kw-isinga kuyo mbaaja ku-Pawuro, Pawuro woone ˆnaabhasabhira, mbawora. 10Abhaanu kw-isinga kuyo, mbakiyaana ekibharo kinene muno. Bhunu ꞉kyeendaga okwimuka ayo na iimeeri eyindi, mbakiyaana ebhiinu bhyone kutyo bhinu ꞉kyariga kikenere mu-rugendo rweswe.

Pawuro kaayika mu-musi gwa Ruumi

11Kw-isinga rya Meerita kuyo ꞉kyamarire-ko meesi gasatu, niwe nkiimuka na iimeeri eyindi. Iimeeri iyo ꞉yaariga igobhere kw-isinga kuyo iri ya mu-musi gwa Arekijandiriya niirindaga inkomaaji iwe-yo. Iimeeri iyo ꞉yaariga ikaamirwe-ko impicha ya amasambwa amasara. 12Nkigobha mu-musi gwa Sirakusi, nkiikara ayo nsiku esatu, 13nkisooka-wo, nkiiyinda nkigobha mu-musi gwa Reegiyo. Anu ꞉bhwakyeye, omuyaga nguyemba okusooka ebhuwanga. Nkisooka ayo, mwejo nkigobha mu-musi gwa Puteyori. 14Puteyori ayo nkinyookana na Abhakiriisitu bheejaasu, mbakiisaasaama ati kisigare ayo, kyone nkiikara ayo bhwoyo bhumwi. Nkimara nkigenderera na orugendo rwa okuja mu-musi gwa Ruumi. 15Abhakiriisitu bheejaasu abheenda eyo, bhunu ꞉bhoonguuywe ati kiri ku-njira ekija eyo, mbaaja okukiramira mu-njira ya mw-iguriro rya Apiyo, na abhandi mbakiramirira anu kaatogwa ati Nyumba Esatu gya Abhagenyi. Pawuro bhunu ꞉aabharorere, ˆnaakumya Nyamuwanga, ˆnaasaasamuka mu-mutima gwaye.

Pawuro kaaraasha amangʼana ga Yeesu Ruumi

16Bhunu ꞉kyayikire mu-musi gwa Ruumi, Pawuro omwene ˆneekirisibhwa aagare ekyumba eekare-mo omwene, mbamutuurira-wo na omusirikare wa okumwangarira.

17Bhunu Pawuro ꞉aamarire ayo nsiku esatu, ˆnaabhirikira abhakuru bha Abhayawudi abha Ruumi ayo. Bhunu ꞉bhaasangiiye amwi, ˆnaabhabhwira ati, “Emwe abhayiiri bhaani, atariwo muunu wa riiyito ryeswe na wumwi unu ꞉naakayiiye. Na itariwo ntungwa na yimwi inu ꞉naayabhire ku-ginu ꞉kyasigiiywe na bhaajaaji. Nawe bheeki mbangwata Yerusareemu, mbantuura mu-mabhoko ga Abharuumi. 18Abharuumi bhoone mbambuusirisha kujomu. Bhunu ꞉bhaamarire mbeenda okuntaatira, kwa okubha ꞉bhataarorere kikayo kyonekyone kinu kikakorere niitwe. 19Nawe Abhayawudi mbarema ati nisige okutaatirwa, nimburwa erya okukora, ninsabha ati riisitaakyo ryani riramurirwe ku-Kayijaari enu. Nawe itari ati eneenda okusitaakya abhayiiri bhaani. 20Okuriingʼaana na amangʼana gayo, kyakora naabhabhirikira anu, insonga kigaaike kiri amwi, kwa okubha riingʼana rinu abhansitaakisha-ko, rinu erikora woori nibhoyerwe mu-nyanko inu, niryo na Abhaijirayeeri bheejaasu bhoone abheesiga.”

21Abhakuru wa Abhayawudi bhayo mbasubhya Pawuro ati, “Eswe, kikyari kunyoora nyarubha okusooka Ebhuyawudi inu eyaaikira amangʼana gaawo, na atariwo na Muyawudi woonewoone unu eejire okusooka eyo ˆnaakibhwira engʼana ryawo ebhiibhi. 22Nawe eswe ekirinda era okuungwa okusooka ku-awe ganu uri nago, kwa okubha eswe kyone kimenyere ati iidiini yaawo inu owuseeta, eyaaikwa kubhiibhi mbaara gyone kutyo.”

23Mmbe, Abhayawudi bhayo mbaaikana na Pawuro orusuku rwa okunyookana kweki. Bhunu orusuku ruyo ꞉rwayikire, Abhayawudi bhaafu muno mbaaja mu-nyumba inu Pawuro ꞉aariga eekaaye-mo. Okwambira katondo okuyikira keegoro, Pawuro ˆnaabhabhwira engʼana kw-ingʼana iiguru ya obhukama bhwa Nyamuwanga. Kweki ˆnaabheeresha na amakaamo ganu agaaikira Yeesu mu-bhiraagiro bhya Musa, na mu-bhitabho bhya abharagi, okukora kutyo ꞉eendaga ati bhoone kutyo bheekirishe Yeesu.

24Amangʼana gayo Pawuro ꞉aaikire, Abhayawudi abhandi mbageekirisha, nawe abhandi mbagarema. 25Ku-mangʼana ga Pawuro gayo, Abhayawudi mbaawukana, mbanyaragana, enu mbabhambashaanyaga. Bhakyari kwimuka ayo, Pawuro ˆnaamariisha ˆnaabhabhwira ati, “Mwoyo Omutaakatiifu ꞉aaikire ekimari, ˆnaabhwiraga abhakaruka bheemwe aturiiye ku-muragi Isaaya ˆnaaika ati,

26‘Genda ku-bhaanu bhanu ubhabhwire ati,

Okuungwa, muryungwa, nawe mutarisombookerwa.

Okuringira, muriringira, nawe mutarirora.

27Abhaanu bhanu bhakomeeye emitima,

bhari na insibhiirira, bhawuunirisiishe ameeso.

Bhatakwenda kurora na ameeso geebhwe.

Itaakabheeye kutyo, bhakarorere na ameeso geebhwe,

mboongwa na amatwi geebhwe,

na okusombookerwa mu-mitima gyebhwe,

kimwi mbayinduka, mbansubhira, insonga nibhawonʼye.’#28:26-27 Ringira Isaaya 6:9-10.”

28Kimwi Pawuro ˆnaaika ati, “Mmbe, woori mumenye ati, amangʼana ga obhwerusha bhunu, gasookere ku-Nyamuwanga, woori agasirwa ku-bhanu bhatari Bhayawudi. Bhayo bheeki abhaaja okugeekirisha!”

[29Bhunu Pawuro ꞉aamarire okwaika amangʼana gayo, Abhayawudi bhayo mbeemuka, mbagendaga enu mbabhambashaanya muno.]

30Pawuro ꞉aamarire myaka ebhiri ꞉eekaayega mu-kyumba kiyo ˆnaariyaga omwene. Mu-kabhaga kayo, ꞉aaramiraga abhaanu bhoone kutyo bhanu ꞉bhaajaga okumurora, 31ˆnaabharaasishaga amangʼana ga obhukama bhwa Nyamuwanga na okubheeyigisha amangʼana ga Raatabhugenyi Yeesu Kiriisitu. ꞉Aabheeyigishaga ari na riibhaasi muno, atariwo muunu wa okumugaanya.

Currently Selected:

Ebhikorwa bhya Abhatumwa 28: kya

Highlight

Copy