Ebhikorwa bhya Abhatumwa 27

Pawuro kaasirwa Ruumi

1Kimwi niiramurwa ati kigende na iimeeri mu-kyaro kya Itaariya. Pawuro na abhabhoywa abhandi mbayaanwa omukuru wumwi wa abhasirikare, riisiina ryaye ˆnaatogwa Yuuriyo. Yuuriyo uyo ꞉aariga ari owa riikemba rya abhasirikare rinu ꞉ryatogwaga ati Riikemba rya omukama. 2Mmbe nkiriinya mu-meeri eyimwi eya Adiramiti inu ꞉yaariga niigenda okugobhaga ku-bhigobho bhyafubhyafu ebhya ekyaro kya Asiya. Bhunu ꞉kyeemukire ayo, ꞉kyariga kiri amwi na Arisitariko, Omumakedooniya asookereeye mu-musi gwa Teesaroonike.

3Mwejo, nkigobha mu-musi gwa Sidooni. Mu-musi ayo Yuuriyo ˆnaakorera Pawuro kujomu, ˆnaamwikirisisha okurorana na abhasaani bhaaye, insonga bhamusakire ku-bhukene bhwaye. 4Okusooka ayo, nkiimuka kweki nkitura iinyuma wa riisinga rya Kiipuro, kwa okubha ku-rubhaara rweswe omuyaga ꞉gwariga guyinduuye ngukiyingaga. 5Bhunu ꞉kyaambukire iinyanja ku-rubhaara rwa ekyaro kya Kirikiya, na kya Pamufwiriya, nkiyika mu-musi gwa Miira mu-kyaro kya Riikiya. 6Riikiya ayo, omukuru wa abhasirikare ˆnaanyoora iimeeri ya mu-musi gwa Arekijandiriya inu ꞉yaagendaga mu-kyaro kya Itaariya iri ayo, ˆnaakibhwira kiriinye muyo.

7Nkigenda maraamara nkimara nsiku nyafu mu-meeri muyo, niwe nkiyika ayeeyi na mu-musi gwa Nido kyanyankire muno. Na kwa okubha omuyinduro ꞉gwariga ngukigaanya okutura emwaro kw-isinga rya Kurete, ngukora nkiringisha Sarimoone. 8Nkikekera ku-mbarika nkinyankaga, nkiyika anu kaabhirikirwa ati, Ekigobho Ekijomu, ayeeyi na omusi gwa Raaseya.

9꞉Gyaturire nsiku nyafu kiri mu-rugendo ruyo, na woori mu-rugendo muyo nkibha mu-ngʼanga, kwa okubha ginsiku egya okwiyima ebhyokurya ꞉gyariga gyaturire, omuyaga ꞉gwariga guri mubhiibhi mu-nyanja. Kimwi Pawuro ˆnaabhwira abheejaabho bhayo ati, 10“Bhamura emwe, anye enirora ati orugendo rweswe runu oruuja okukireetera iingʼanga nene. Ekiija okufwirwa-mo, itari ku-mijigo na iimeeri era, tari na eswe kyone ekifwira-mo.”

11Nawe omukuru wa abhasirikare weeki ꞉ateekirisiishe amangʼana ga Pawuro, ˆnaarora ati amangʼana gayo gatari na bhwera, ˆneekirisha amangʼana ga nyewoja wa iimeeri iyo, na aga omwene meeri. 12Kwa okubha ekigobho kiyo ꞉kyariga kiriko ꞉kyariga kitari kijomu imbewo ikabha-wo, abhaanu abhaafu mu-meeri muyo mbeekirishaanya ati bhasooke ayo, bharingire raabhe abhatura okuyika ku-kigobho ekindi kw-isinga riyoriyo erya Kurete. Ekigobho kiyo ekibhirikirwa ati Foyinikisi, ayo niwe bhakaturire okwikara mu-kabhaga koone kutyo aka imbewo. Ekigobho kya Foyinikisi kiyo kiri ku-bhwerekera bhwa ebhugwa esuubha.

Omuyaga mu-nyanja

13Bhunu obhuwanga ꞉bhwaambire okuyemba, mbatoga ati abhatura okugobha anu ꞉bhaariga bheekirishaanyiishe, kimwi mbeemuka ayo mbagenderera na orugendo rwebhwe, mbabharamiraga ku-njegekera ya riisinga rya Kurete. 14Nawe bhunu kaaturire-wo kabhaga katooto, omuyaga mwafu muno gunu ꞉gwatogwaga ati Ewurakiro, ngutiimuka ngusookereraga mu-bhiima bhya riisinga riyo. 15Omuyaga guyo ꞉gwariga guri mwafu muno, iimeeri niitaamibhwa okuyajana nagwo. Kimwi nkiyeywa okuja ebhusibha.

16Nkitura iinyuma wa akasinga akatooto kanu akabhirikirwa ati Kawuda, nkakisibhiirisha kutooto omuyaga. Kimwi nkisaka okuriinya obhwato obhutooto bhwa okuwonisha abhaanu kibhwingishe mu-meeri. Okwamba obhwato bhuyo ꞉bhwariga mbukururwa na iimeeri iyo, nawe ꞉kyanyankiiye-ko muno okubhubhoya gingoye. 17Bhunu kyabhwingisiishe mu-meeri, abhakosi bha mu-meeri mbabhoya iimeeri na gingoye, mbeeyindya gingoye giyo emwaro ku-mugongo gwa iimeeri mbagirumya. Ayeeyi na ingego ya iinyanja ya ekyaro kya Riibhiya, insenyi ꞉yaariga iri nyafu, mboobhaya bhaasiga okwingira mu-nsenyi iyo, mbeesha riitanga. Mbasiga iimeeri iyo iyeywe.

18Mwejo omuyaga ngugenderera okubha mwafu amabhooka ngabhuma iimeeri iyo ngayisiraga enu na enu, abhakosi bha mu-meeri mbaamba okwesa emijigo mu-nyanja. 19Anu ꞉bhwakyeye orusuku rwa akasatu, mbaramura kweki mbeesa amatanga na amarongooti ga iimeeri mu-manji. 20Ngitura nsiku nyafu okurora esuubha uri, na ginjota gyone ꞉bhataagiroraga. Na iinyanja yoone ꞉yaagendereeye okubhiiya. Kimwi nkifwa emitima ati kitakuuja okuwona.

21Abhaanu ꞉bhaamarire nsiku nyafu bhari mu-nyanja muyo bhatakurya kiinu. Niwe Pawuro ˆnaayambaara agati weebhwe, ˆnaabhabhwira ati, “Bhamura emwe, orusuku rurya kiri Kurete ꞉naabhabhwiriiye ati kisige okusooka ayo, murema okunyiitegeeresha. Raabhe mukanyiitegeeresiishe, mutakanyoorere iinyanko inu, na mutaakafwiriiywe-mo ebhiinu bhyemwe. 22Woori, enibhasabha ati musige okufwa emitima gyemwe, kwa okubha atariwo na wumwi weemwe unu kaaja okufwa. Ni iimeeri inu era, niyo eyiija okusika.

23“Anye niri mujuuma wa Nyamuwanga, na niwe eniramya. Naamenya gayo kwa okubha ingeta ya reero, aatuma maraayika waaye ˆnaanyiija-ko, ˆnaayambaara ayeeyi na anye, 24ˆnaambwira ati, ‘Awe Pawuro, siga okuubhaya! Kwa okubha okuyika ku-Kayijaari, owuyika, na owuyambaara mu-meeso gaaye. Na umenye kujomu ati awe na abhaanu bhoone kutyo bhanu muri amwi mu-rugendo runu, Nyamuwanga kaaja okubhawonʼya okuturira ku-kigongo kyaye ku-awe.’ 25Mmbe, bhamura emwe woori musaasamuke era, kwa okubha Nyamuwanga niwe aambwira gayo, na Nyamuwanga atakwaika rurimi, eniikirisha ati gayo aambwira goone kutyo agabha-wo. 26Na woori, ririwo riisinga rinu kaaja okukisira-ko.”

Pawuro na abheejaabho abhawonibhwa mu-nyanja

27Nkimara nsiku ekumi na ena nkisirwaga na omuyaga guyo enu na enu mu-nyanja ya Adiriya. Bhunu ꞉yaayikire mu-bhwire agati orusuku rwa ekumi na ena ruyo, abhakosi bha mu-meeri mbatoga ati amwi kyarebhereeye ku-kyaro. 28Kimwi mbeesa gingoye mu-manji okurenga obhureera, mbarora ati okuyika emwaro bhikyariyo bhita makumi gabhiri, mbafugera-wo kweki mbarenga, mbanyoora bhita ekumi na bhitaanu. 29Mboobhaya ati iimeeri ikarujuuye ku-bhijungu, kimwi mbeesa nanga ena egya iinyuma mu-manji. Mbeegomba ati bhukye bhwangu.

30Abhakosi bha mu-meeri muyo ꞉bhaariga mbeenda okwiruka bhasooke mu-meeri. Mbeesha obhwato mu-manji, mbeekora muna abheenda okwesa nanga gya imbere. 31Kimwi Pawuro ˆnaabhwira omukuru wa abhasirikare, ari amwi na abhasirikare abhandi ati, “Raabhe abhakosi bha mu-meeri bhanu bhakarema okusigara na eswe mu-meeri munu, emwe mwone mutakuuja okuwona.” 32Mmbe, abhasirikare bhayo mbabhutura gingoye ginu ꞉gyariga gibhoyere obhwato bhuyo, kimwi mbugwa mu-manji, mbabhusiga bhuyeywe na omuyaga.

33Anu ꞉bhwakyeye, Pawuro ˆnaabhwira abheejaabho bhayo bhoone kutyo ati, “Reero ni rusuku rwa ekumi na ena muyayire, na mukyari kurya kyonekyone. 34Woori enibheesaasaama murye, insonga mwasiga okurambuka, kwa okubha atariwo na wumwi weemwe unu kaaja okuwutaara.”

35Bhunu Pawuro ꞉aamarire okwaika kutyo, ˆnaagega omukaate, ˆnaakumya Nyamuwanga bhoone kutyo bhamuringiiye, ˆnaagubhutura, ˆnaamba okurya. 36Niwe bhoone kutyo mbeekomeesha mbaamba okurya ebhyokurya. 37Abhaanu bhanu ꞉kyariga kiri mu-meeri, obhukumi bhweswe ꞉kyariga kiri abhaanu magana gabhiri na makumi mungati na sansabha (276). 38Bhunu abhaanu bhoone kutyo ꞉bheegutire, mbaamba okwesa mu-manji amagunira ga obhuro, insonga iimeeri isuuwe obhusito.

39Anu ꞉bhwakyeye kujomu, abhakosi bha mu-meeri mbarora riikuubha ririko omurambo, nawe ꞉bhataamenyere bhari kyaroki. Kimwi mbeekirishaanya ati raabhe iimeeri eyitura okugobha bhayisige igobhe yeene ku-murambo. 40Niwe mbasurumura gingoye gya giinanga ginu ꞉gyariga giri mu-manji, mbasurumura na gingoye ginu ꞉gyariga gibhoyere orusukaani, mbatweka riitanga riitooto rya imbere, insonga omuyaga gusire iimeeri ku-murambo. 41Nawe iimeeri bhunu ꞉yaafugeeye imbere kutooto anu gingeji eginyookanira, orurimi rwayo ndwisomeka kwa managa mu-nsenyi ya mu-manji “digii,” iimeeri niiremera muyo. Amabhooka ngagenderera okubhuma iimeeri iinyuma niyatika.

42Kimwi abhasirikare mbeenda ati bheete abhabhoywa bhoone kutyo, insonga aasiga okubha-wo na wumwi weebhwe unu akaturire okuwuga ˆneerukaga. 43Nawe omukuru weebhwe ꞉aariga atakwenda Pawuro eetwe, ˆnaabhagaanya. ˆNaaika ati, bhoone kutyo bhanu bhamenyere okuwuga bhaambe okugwirira mu-manji, insonga bhaambukire ku-kyaro. 44Na abhandi bhanu bhatakumenya, bhaambukire ku-mabhaawu na amabhaara ga iimeeri. Mmbe, abhaanu bhoone kutyo nkiwona nkiyika ku-kyaro kiri bhaworu.

Currently Selected:

Ebhikorwa bhya Abhatumwa 27: kya

Highlight

Copy