Ebhikorwa bhya Abhatumwa 23

1Pawuro ˆnaamogorera ameeso abhakuru bhayo, kimwi ˆnaabhabhwira ati, “Bhayiiri bhaani, anye kwa mutima mweru naamarire okukuumisha ganu Nyamuwanga ꞉eendere nikore, na reero inu ku-Nyamuwanga omutima gwani ni mweru pee!” 2Omukuru wa abhashengesi Ananiya bhunu ꞉oonguuywe kutyo, ˆnaabhwira bhanu ꞉bhaariga bhayambaaye ayeeyi na Pawuro ati, bhamubhume riikoofi ku-munwa. 3Niwe Pawuro ˆnaabhwira Ananiya ati, “Nyamuwanga woone kaaja okukubhuma, awe uri mubheeyi rwa orugito runu ruyakirwe inchokaa, enu orwene rwatikire mu-nda! Awe wiikaaye anu okundamurira okuriingʼaana na ebhiraagiro, enu awe omwene utakubhiseeta, kwa okubha waabhwira abhaanu bhambume riikoofi enu ebhiraagiro bhiteenda!”

4Abhaanu bhanu ꞉bhaariga bhayambaaye ku-mbarika, mbabhwira Pawuro ati, “Awe utakwiswara okufuma omushengesi omukuru unu atuuywe-wo na Nyamuwanga?” 5Pawuro ˆnaabhasubhya ati, “Ee bhayiiri bhaani, naanikyari kumenya ati unu niwe omukuru wa abhashengesi, kwa okubha ikaamirwe mu-bhiraagiro ati, ‘Usige okwaika mangʼana mabhiibhi ku-mutungi wa abhaanu bhaawo.’#23:5 Ringira Obhungʼaanyi 22:28.”

6Na Pawuro ꞉aariga amenyere ati mu-bhakuru bhayo, ꞉bhaariga bharimo Abhasadukaayo, na Abhafarisaayo. Kimwi Pawuro ˆnaamura obhuraka bhwaye ˆnaaika ati, “Emwe bhayiiri bhaani, anye ni Mufarisaayo, omwana wa Abhafarisaayo. Ganu agakora reero niramurirwe ku-bhiraagiro, ni kwa okubha eniisiga ati abhafuuye bharisuuka.” 7Bhunu Pawuro ꞉aamarire okwaika kutyo, Abhafarisaayo na Abhasadukaayo mbaawukana na abhaanu bhoone kutyo mbataamibhwa okugenderera na amangʼana gayo. 8꞉Bhaataamiibhwe kwa okubha Abhasadukaayo ꞉bhaaremaga ati abhafuuye bhatarisuuka, bhaamaraayika bhoone bhatariwo, na ebhiwi bhyone bhitariwo. Nawe Abhafarisaayo bheeki ꞉bheekirishaga gayo goone kutyo.

9Mmbe, niibha-wo nkungu nene muno. Abheeyigisha bha ebhiraagiro bhya Musa bhanu ꞉bhaariga bhari orubharika rwa Bhafarisaayo, mbayambaara, mbaremera managa mbaaika ati, “Eswe kitakurora bhubhiibhi bhwonebhwone ku-muunu unu, eyitura okubha ati ni maraayika, ati nibho ꞉bhaaikire nawe!” 10Abhakuru bhayo mbayomba muno, omukuru wa abhasirikare woone ˆnoobhaya ati abhaanu bhayo bhakaturire okusawurasawura Pawuro. Iingʼana iyo niikora abhwire abhasirikare bhayo bhagege-wo Pawuro kwa managa bhamuwonʼye. Mmbe abhasirikare mbagega Pawuro, mbamusira mu-rubhago rwebhwe.

11Orusuku ruyoruyo mu-ngeta, Raatabhugenyi ˆnaayambaara ayeeyi na Pawuro, ˆnaamubhwira ati, “Komeesha omutima! Kwa okubha rwa kutyo ꞉waaikire amangʼana gaani Yerusareemu anu, nikwo kutyokutyo eyeendwa ugaaike na mu-musi gwa Ruumi.”

Ekiina kya okwita Pawuro

12Anu oruguru ꞉rwasambire mwejo, Abhayawudi abhandi mbakora ekiina, mbarayira ati bhateetire Pawuro era, bhatakurya na bhatakunywa kiinu. 13Abhaanu bhanu ꞉bhaakorere ekiina kiyo ꞉bhaariga mbaambuka bhaanu makumi gana. 14Kimwi Abhayawudi bhayo mbagenda ku-bhakuru bha abhashengesi na ku-bhakaruka bha Abhayawudi, mbabhabhwira ati, “Eswe kyarayira ati kitakuuja okurya kyonekyone, okuyikira anu kireetire Pawuro. 15Mmbe woori, emwe na abhakuru bheejaanyu musabhe omukuru wa abhasirikare abhareetere Pawuro mw-ibharaja anu. Mwikore era ati omwenda okumenyegesha kujomu amangʼana gaaye, na eswe ekibha kimwitegaaniiye ku-njira, akatura era nkimwita, akyari kuyika anu.”

16Bhunu ꞉bhaaikaga gayo, kaana omwiwa wa Pawuro aagamenya! Mmbe, ˆnaagenda ˆneengira mw-igoori rya abhasirikare, ˆnaabhwira Pawuro amangʼana gayo. 17Kimwi Pawuro ˆnaabhirikira omukuru owumwi owa abhasirikare bhayo, ˆnaamubhwira ati, “Nuusire omumura unu kw-isobhugenyi weemwe, kwa okubha ari na riingʼana rya okumubhwira.” 18Mmbe omukuru uyo woone ˆnaasira omumura uyo kw-isebhugenyi weebhwe, ˆnaayika ˆnaamubhwira ati, “Omubhoywa unu kaatogwa Pawuro aambirikira, ˆnaansabha ati nireete omumura unu ku-awe, ati ari na riingʼana rya okukubhwira.” 19Omukuru wa abhasirikare ˆnaagwata omumura uyo okubhoko, ˆnaamusira ku-mbarika, ˆnaamubhuusha ati, “Awe, oweenda okumbwira engʼanaki?”

20Omumura uyo ˆnaamusubhya ati, “Abhayawudi bheekirishaanya ati bhakusabhe mutondo ubhasirire Pawuro, umutuure mw-ibharaja ku-bhakuru bheebhwe, bheekore muna ati abheenda okumenyegesha amangʼana gaaye kujomu. 21Nawe awe nuusige okubheekirisisha, kwa okubha bhariwo Abhayawudi abhaambuka makumi gana bheekirishaanyiishe okumwitegaanira ku-njira inu akature, bhamwite. Bharayiiye ati, bhatakurya na okunywa bhateetire Pawuro. Na woori abharindirira era bhoongwe kutyo uraaike.” 22Mmbe, omukuru wa abhasirikare ˆnaabhwira omumura uyo ati, “Mmbe waasiga okubhwira omuunu woonewoone ati wambwira iingʼana inu!” Kimwi omukuru uyo ˆneekirisisha omumura uyo agende.

Pawuro kaasirwa ku-mwinangwa Feriki

23Kimwi omukuru wa abhasirikare, ˆnaabhirikira abhayambaasi bhabhiri abha emwaro waaye, ˆnaabhabhwira ati, “Mugege bhasirikare magana gabhiri bhagende maguru na abhandi makumi mungati abha okuriinya ku-fwaraasi, na abhandi magana gabhiri abha okuribhata bhagwatiriiyega amatimu. Bhoone kutyo bheemuke ikyari okuyika nsa esatu gya mu-ngeta, bhagende mu-musi gwa Kayijaariya. 24Pawuro woone ayaanwe iifwaraasi yaaye inu kaaja okuriinya-ko, na egindi, insonga mumuyikye kujomu ku-mutungi Feriki.”

25Omukuru uyo ˆnaakaama na iinyarubha aaikire-ko ati,

26Ku-mutungi Feriki owa ekibharo, enikukeesha, anye ni anye Kirawudiyo Riisiya.

27Omuunu unu naakureetera agwatirwe na Abhayawudi, mbeendaga okumwita. Kimwi ningenda-wo na abhasirikare bhaani okumuwonʼya, kwa okubha ninyoorere amangʼana ati ni Muruumi. 28Bhunu naariga nneenda okumenya kinu ekikora Abhayawudi bhamusitaakye, nnimusira mw-ibharaja. 29Niwe nindora ati abhamusitaakisha ku-mangʼana ga ebhiraagiro bhya iidiini yeebhwe. Na ku-mangʼana ganu asitaakiibhwe-ko, ritariwo engʼana ryoneryone rinu rikakorere eetwe, na okubhoywa kwone ritariwo rya kumubhoyera-ko. 30Na bhunu nibhwiriiywe iingʼana ati bhariwo abhaanu abheenda okumukorera amabhiibhi, nindora ati nimureete bhwangu ku-awe eyo. Nimbwira na bhanu abhamusitaakya bhaaje bhamusitaakishe ku-awe eyo.

31Mmbe, abhasirikare bhayo mbagega Pawuro rwa kutyo ꞉bhaabhwiriiywe, mbamusira mu-ngeta iyoiyo mbamuyikya mu-musi gwa Antipatiri. 32Anu ꞉bhwakyeye, abhasirikare bhanu ꞉bhaaribhataga amaguru mbasubha mw-igoori rwebhwe, mbasiga abheejaabho bhanu ꞉bhaagendaga na giifwaraasi nibho bhasire Pawuro. 33Bhunu ꞉bhaayikire mu-musi gwa Kayijaariya ayo, mbabhwira omutungi aramire Pawuro na iinyarubha inu ꞉bhaariga bhayaaywe. 34Omutungi ˆnaasoma iinyarubha iyo, ˆnaabhabhuusha ati, “Omuunu unu asookere kyaroki?” Na bhunu ꞉aabhwiriiywe ati Pawuro asookere mu-kyaro kya Kirikiya, 35ˆnaamubhwira ati, “Amangʼana gaawo, eniija okugeetegeeresha raabhe bhanu abhakusitaakya bhakayika anu.” Niwe omutungi uyo ˆnaasiiga ati, Pawuro aangarirwe mu-nyumba ya ekikama eya Yerode.

Currently Selected:

Ebhikorwa bhya Abhatumwa 23: kya

Highlight

Copy