Ebhikorwa bhya Abhatumwa 22

1Pawuro ˆnaabhabhwira ati, “Emwe bhaaraata na abhayiiri bhaani, mwitegeereshe-ko obhwibhagisi bhwani kw-imwe!” 2Mmbe, abhaanu bhayo bhunu ꞉bhoonguuywe ati Pawuro kaaika mu-nyaaika yeebhwe eya Ekiebhuraaniya, mbajibhira jibhi. Pawuro ˆnaagenderera okubhabhwira ati, 3“Anye niri Muyawudi, mwibhurwa wa mu-musi gwa Taruso mu-kyaro kya Kirikiya. Nawe, anye ꞉naakuriiye Yerusareemu anu. Gamariyeri#22:3 Ringira Ebhikorwa bhya Abhatumwa 5:34. niwe ꞉aanyiiyigisiishe ebhiraagiro bhyone kutyo bhinu ꞉kyasigiiywe na bhaajaaji. ꞉Naariga nikomeeye muno ku-mangʼana ga Nyamuwanga, rwa kutyo emwe mwone mukomeeye mu-nsiku gya reero.

4“Ku-rubhaara rwa abheeyigira bha Yeesu, ꞉naariga nimbanyansha muno. ꞉Naariga ningwata abharume na abhagasi, nimbabhoya mu-jeera, na abhandi ꞉bhaariga mbeetwa. 5Amangʼana ganu enibhabhwira emwe, nawe na omukuru wa abhashengesi na abhakaruka bha Abhayawudi bhoone kutyo, bhagamenyere ati ni kimari. Abheene nibho ꞉bhaanaaye giinyarubha gya okusirira Abhayawudi bheejaasu abha mu-musi gwa Dameesiki. Giinyarubha giyo nginyenda nigende eyo, nibhoye Abhakiriisitu bheenda eyo, nibhareete Yerusareemu anu, bhayaanwe ebhirusho.

6“Ginsa ꞉gyariga giri muna sansabha mu-mwisi ningendaga Dameesiki, nirebhereeye okuyika. Kimwi nintaka era obhweru bhwafu okusooka mu-rwire mbuumirika mbaara gyone kutyo. 7Ningwa ansi, nuungwa obhuraka mbumbirikira ati, ‘Awe Saawuri! Awe Saawuri! Kubhaki owuunyansha?’ 8Kimwi anye nimbuusha ati, ‘Ee Raatabhugenyi, ni awe niga?’ Weeki ˆnaansubhya ati, ‘Anye ni Yeesu owa Naajareeti, ni anye owunyansha.’ 9Abheejaasu bhanu ꞉kyariga kiri amwi nabho mbarora obhweru era, nawe obhuraka bhuyo, ꞉bhataabhusombookeeywe. 10Kimwi nimbuusha ati, ‘Ee Raatabhugenyi, kana woori nikore kutiki?’ Weeki ˆnaansubhya ati, ‘Iimuka! Ugende mu-musi gwa Dameesiki ayo, kwa okubha ukayika ayo owuuja okubhwirwa kujomu emirimu gyone kutyo ginu Nyamuwanga keenda ukore.’ 11Mu-kabhaga kayo ꞉nitaaroraga, kwa okubha obhweru bhuyo ꞉bhwangʼarabhiishe muno mbukora niwofure. Niwe abheejaasu mbangwata okubhoko, mbantangasha okuja mu-musi gwa Dameesiki.

12“Dameesiki ayo ꞉aariga ariwo omuunu wumwi, riisiina ryaye ˆnaatogwa Ananiya. Ananiya uyo ꞉aariga akomeeye muno okuungwa ebhiraagiro bhyeswe, na Abhayawudi bhoone kutyo abheenda eyo ꞉bhaariga mbamwaika ati ni muunu wa mutima mujomu. 13Mmbe ˆnaanyiija-ko, ˆnaayambaara ayeeyi na anye, ˆnaambwira ati, ‘Mura Saawuri, nuurore!’ Kimwi ameeso gaani ngeera ayoayo, nindora kweki. Nindagamira okumuringira.

14“Kimwi Ananiya ˆnaambwira ati, ‘Nyamuwanga wa bhaajaaji bheeswe akusorere, insonga umenye ganu kaakena, okurora omurengeresi waaye, na okuungwa ganu omurengeresi uyo kaaika. 15Amangʼana ganu uunguuywe na okurora ugabhwire abhaanu bhoone kutyo. 16Mmbe woori owurindaki anu? Yambaara! Ubhatiisibhwe, usabhe okuturira kw-isiina rya Yeesu, akweshe ebhikayo bhyawo.’

17“Kimwi ninsubha Yerusareemu. Yerusareemu ayo ningenda mw-iyekaru okusaasaama Nyamuwanga. Bhunu ꞉naariga nnisaasaama, nimba muna niwongeeye kimwi nindora ebhiroro. 18Ku-bhiroro bhiyo, nindora Raatabhugenyi Yeesu, ˆnaambwiraga ati, ‘Nuukore bhwangu usooke Yerusareemu anu! Kwa okubha bhatariwo bhanu abhaaja okukwikirisha awe ukabha nuwaaika amangʼana gaani.’ 19Anye nnimusubhya ati, ‘Ee Raatabhugenyi, abhaanu bhanu bhamenyere kujomu ati ꞉naariga nintura mu-masunagoogi ga Abhayawudi okufwima bhanu ꞉bhaariga mbakwikirisha! Na ꞉naariga nninyookana nabho nimbabhuma muno, abhandi nimbabhoyaga mu-jeera. 20Na bhunu ꞉bheetire Sitefwano mwaiki waawo owa amangʼana, noone ꞉naariga niriwo niyambaaye ayo, noone nniikirishaga ati eetwe, na gingibho gya bhanu ꞉bhaamwitire ni anye ꞉naariga ningyangarira.’ 21Kimwi Raatabhugenyi ˆnaansubhya ati, ‘Nuugende! Kwa okubha awe eniija okukutuma ku-bhanu bhatari Bhayawudi, bhanu bhari mu-bhyaro ebhindi ebhya areera.’ ”

Pawuro na Omusirikare Omukuru owa Ekiruumi

22Bhunu Pawuro ꞉aaikaga amangʼana, abhaanu ꞉bhaariga mbamwitegeeresha kujomu. Nawe bhunu ꞉aaikire gayo era, abhaanu mbaamba okwamura obhuraka, mbaaikaga ati, “Musooshe omuunu unu mu-kyaro! Ateesire kurama mu-kyaro munu!” 23Abhaanu bhayo mbagenderera okumwaya, mbasawungaga gingibho gyebhwe, enu mbasaamuraga na amayaru iiguru. 24Kimwi omukuru wa abhasirikare ˆnaabhwira abhasirikare bhaaye ati bheengishe Pawuro mu-rubhago rwebhwe, bhamubhume ebhibhooko, na okumubhuusha insonga inu yaakora abhaanu bhamumwayire kutyo. Bhakamara okumubhuusha bhatondere omukuru weebhwe. 25Abhasirikare bhayo mbamubhoya na gingoye, ati bhaambe okumusetura. Omukuru wa abhasirikare ꞉aariga ayambaaye ku-mbarika ayo, Pawuro ˆnaabhuusha omukuru uyo ati, “Angu ebhiraagiro ebhiikirisha ati Omuruumi abhumwe, akyari kuramurirwa na ebhiraagiro ati akayire?”

26Bhunu omukuru uyo ꞉oonguuywe kutyo, ˆnaagenda kw-isebhugenyi ˆnaamubhwira ati, “Ndora omuunu unu ni Muruumi! Oweenda kukora mangʼanaki ganu?” 27Kimwi esebhugenyi ˆnaaja ku-Pawuro, ˆnaamubhuusha ati, “Numbwire, angu awe uri Muruumi?” Pawuro ˆnaamusubhya ati, “Yee, anye ni Muruumi.” 28Omukuru uyo ˆnaamubhwira ati, “Anye noone niri Muruumi, na Obhuruumi bhunu ꞉naabhugurire yera nyafu muno.” Pawuro weeki ˆnaamusubhya ati, “Anye niri Muruumi ku-bhwibhurwa bhwani.”

29Mmbe, abhasirikare bhanu bhakabhuusiishe Pawuro, mbamusiga mbamwibhereera bhwangubhwangu. Omukuru wa abhasirikare woone okuungwa ati Pawuro ni Muruumi ˆnoobhaya muno, kwa okubha ꞉aariga abhoyere Omuruumi, enu ebhiraagiro bhiteekirisha abhoywe, ataramuriiywe okubhoywa.

Pawuro kaasirwa mw-ibharaja

30Anu ꞉bhwakyeye mwejo, omukuru wa abhasirikare ˆneenda okumenya kinu kikorere Pawuro asitaakibhwe na Abhayawudi bhayo. ˆNaasurumura Pawuro, ˆnaabhwira abhashengesi abhakuru na abhakuru bheejaabho abhandi bhoone kutyo bhasangire amwi. ꞉Bheejire bhaasangira amwi, omukuru uyo ˆnaareeta Pawuro, ˆnaamubhwira ayambaare agati weebhwe.

Currently Selected:

Ebhikorwa bhya Abhatumwa 22: kya

Highlight

Copy