Ebhikorwa bhya Abhatumwa 18

Pawuro mu-musi gwa Korinto

1Anu amangʼana gayo ꞉gaawooye, Pawuro ˆnaasooka Atene ayo, ˆnaagenda mu-musi gwa Korinto. 2Okuyika ayo ˆnaanyookana na Omuyawudi wumwi, riisiina ryaye ˆnaatogwa Akira, ari mwibhurwa wa Ponto. Mu-nsiku giyo Akira na omugasi waaye Piriisika, ꞉bhaariga bhayikire okusooka mu-musi gwa Ruumi mu-kyaro kya Itaariya, kwa okubha Kirawudiyo#18:2 Kirawudiyo. Woone ꞉aariga ari Kayijaari, omukama omukuru wa Abharuumi. Ringira riingʼana Kayijaari mu-Mangʼana Amakomeeye. ꞉aariga asiigire ati Abhayawudi bhoone kutyo bhabhirimibhwe mu-musi guyo. Mmbe, Pawuro ˆnaagenda okubharora, 3ˆneekara eweebhwe ayo, mbakoraga emirimu amwi, kwa okubha abheene bhoone ꞉bhaariga mbaroosha amawuuna rwa Pawuro. 4Ku-nsiku gyone kutyo egya Insabhaato, Pawuro ꞉eengiraga mw-isunagoogi, ˆnaabhwiriraga muyo Abhayawudi na Abhayunaani amangʼana ga Yeesu, ˆnaasakaga okubhayindura bhoone kutyo bheekirishe Yeesu.

5Mmbe, Siira na Timoteeyo mbayika ayo okusooka Makedooniya, niwe Pawuro ˆnaamba okwisoosha okuraasishaga Abhayawudi riingʼana iiguru ya Raatabhugenyi Yeesu, ˆnaabhabhwiraga ati Yeesu niwe Kiriisitu. 6Nawe Abhayawudi bhayo mbaremaga amangʼana ga Pawuro, mbamufumaga. Kimwi Pawuro ˆnaakuukumura gingibho gyaye, ˆnaabhabhwiraga ati, “Woori anye neefuura kw-imwe, ganu garibhanyoora anye nitarimo! Anye, ritariwo riingʼana rinu eniija okubhuusibhwa kw-ingʼana riyo. Okwambira woori, enigenda ku-bhaanu bha ebhyaro ebhindi.”

7Kimwi Pawuro ˆnaawuruka mw-isunagoogi muyo, ˆneengira mu-nyumba inu ꞉yaariga iri ku-mbarika ayo, ˆnaagendereraga okuraasha riingʼana rya Raatabhugenyi Yeesu ku-bhaanu. Iinyumba iyo ꞉yaariga iri eya Tiito Yuusito, Tiito woone ꞉aariga ari Muyunaani, unu ꞉aaramyaga Nyamuwanga. 8Kimwi omutangasha omukuru wa riisunagoogi riyo, ꞉aariga ˆnaatogwa Kirisipo, omwene na abhaanu bha ewaaye bhoone kutyo, mbeekirisha Raatabhugenyi Yeesu. Na Abhakorinto abhandi bhanu ꞉bhoonguuywe amangʼana ga Pawuro, abhaafu mbeekirisha, mbabhatiisibhwa.

9Rusuku rumwi mu-ngeta, Raatabhugenyi ˆnaabhwirira Pawuro mu-bhiroro ati, “Siga okuubhaya, genderera era okuraasha, siga okujibhisha omunwa gwawo. 10Nuusige okuubhaya kwa okubha anye niri amwi na awe, na atariwo omuunu wa okukukuunʼya-ko ati akuwutaashe. Enikubhwira kutyo, kwa okubha mu-musi munu niri na abhaanu bhaafu bhanu abhaaja okunyiikirisha.” 11Mmbe, Pawuro ˆnaamara omwaka gumwi na ameesi gasansabha ari Korinto ayo, ˆneeyigishaga abhaanu Riingʼana rya Nyamuwanga.

12Nawe mu-kabhaga ka obhutungi bhwa Gariyo mu-kyaro kya Akaya, Abhayawudi bhari amwi mbasangira Pawuro, mbamugwata. Mbamureeta ku-Gayiro niwe ari omuramusi, 13mbaaika ati, “Omuunu unu kaakongya abhaanu ati, bharamyega Nyamuwanga ku-njira inu ebhiraagiro ebhikigaanya.”

14Bhunu Pawuro ꞉eendere okwaika era kutya, Gariyo ˆnaabhwira Abhayawudi bhayo ati, “Emwe Abhayawudi, nikeekirishaanyiishe na emwe okusitaakya omuunu unu akabheeye ateesiishe omuunu ekiinu, amwi ati ariiye omuunu injeejemo. 15Nawe kutyo omubhambashaanya ku-mangʼana era, na ku-masiina, na ku-bhiraagiro bhyemwe, mugaramure emwe abheene. Anye nitakwenda okubha muramusi wa amangʼana ganu.” 16Kimwi Gariyo ˆnaabhabhirimya bhasooke mw-ibharaja ayo. 17Niwe riisangi rya abhaanu mbagwata Sositeene, omutangasha omukuru wa riisunagoogi, mbamubhumira ayo mu-meeso ga Gayiro. Nawe gayo abhaanu bhayo ꞉bhaakorere, Gariyo ꞉ataagagwatiiye.

Pawuro kaasubha mu-musi gwa Antiyokiya ya Siiriya

18Pawuro ˆnoongesha ginsiku egindi nyafu egya okwikara Korinto ayo. Kimwi ˆnaaraga Abhakiriisitu bheejaabho bhanu ꞉bhaariga bhari eyo, ˆnaagenda ari amwi na Akira na mukaaye Piriisika mbayika mu-musi gwa Kenkereya. Kenkereya eyo, Pawuro ˆnaamwega gimfwiri gyaye#18:18 ˆNaamwega gimfwiri gyaye. Abhayawudi bhunu ꞉bhaaraganaga na Nyamuwanga riingʼana riirebhe, ꞉bhaariga mbamwega gimfwiri ku-mitwe okweresha ati bhaakuumisha riingʼana riyo. okuriingʼaana na riirayiro rinu ꞉aariga atuuye-wo. Kimwi mbariinya mu-meeri mbagenda Siiriya. 19Bhunu ꞉bhaayikire mu-musi gwa Efeso, Pawuro ˆnaasiga Akira na mukaaye Piriisika ayo. Pawuro akyari kwimuka ayo, ˆneengira mw-isunagoogi rya Abhayawudi okwamba, ˆnaabhambashaanya nabho Riingʼana rya Nyamuwanga. 20Abhayawudi okuungwa riingʼana riyo, mbasabha Pawuro oongeshe ginsiku gya okwikara nabho ayo. Nawe Pawuro ꞉ateekirisiishe. 21Mmbe, bhunu ꞉aaragire okwimuka ˆnaabhabhwira ati, “Eniija okusubha kweki, Nyamuwanga akeenda.” Niwe ˆnaariinya mu-bhwato, ˆnaasooka Efeso ayo.

22Bhunu Pawuro ꞉aayikire mu-musi gwa Kayijaariya, ˆnaariinyagisha Yerusareemu, ˆnaakeesha amakanisa ageenda eyo. Bhunu ꞉aamarire, ˆnaatebhera mu-musi gwa Antiyokiya. 23Antiyokiya eyo ˆnaamara-yo nsiku, ˆnaasooka-yo, ˆnaatura mu-kyaro kya Garaatiya, na Furiigiya, ˆnaakomeeshaga abheeyigira bhoone kutyo.

Apooro kaayiga Abhayawudi

24Mu-kabhaga kayo mu-musi gwa Efeso eyo, ˆnaaja-wo Omuyawudi wumwi, riisiina ryaye ˆnaatogwa Apooro, mwibhurwa wa mu-musi gwa Arekijandiriya. Apooro uyo ꞉aariga ari mwaiki muno, na ꞉aariga amenyere muno Amakaamo Amataakatiifu. 25Apooro ꞉aariga eeyigisiibhwe amangʼana ga Raatabhugenyi. Na kwa okubha ꞉aariga ˆnaayiririrwa muno, ˆnaamba okwiyigisha abhaanu amangʼana iiguru ya Raatabhugenyi Yeesu ku-kimari kyago. Nawe ku-rubhaara rwa okubhatiisibhwa, ꞉ateeyigishaga kujomu, kwa okubha omwene ꞉aariga amenyere obhubhatiisha bhwa Yowana era. 26Apooro ˆnaamba okwiyigisha Amangʼana Amajomu aga Yeesu na mw-isunagoogi rya Abhayawudi ari na riibhaasi. Mmbe, bhunu Akira na mukaaye Piriisika ꞉bhoonguuywe ameeyigisho gaaye, mbamusira eweebhwe, mbamwikasha okumweresha Riingʼana rya Raatabhugenyi ku-bhwima bhwaryo.

27Apooro ˆneenda ambukire mu-kyaro kya Akaya, Abhakiriisitu bheejaabho mbamwikirisisha. Abhakiriisitu bhayo mbakaamira Abhakiriisitu abheejaabho abheenda eyo iinyarubha ati bhamuramire kujomu. Bhunu ꞉aayikire eyo, okuturira ku-nema ya Nyamuwanga, ˆnaasakira muno bhanu ꞉bhaariga bheekirisiishe Yeesu. 28Apooro ꞉aabhasakiraga kwa okubha ꞉eereshaga Abhayawudi okuturira ku-Makaamo Amataakatiifu ati, Yeesu niwe Kiriisitu, ˆnaabhayigiraga abhweru mu-meeso ga abhaanu bhoone kutyo.

Currently Selected:

Ebhikorwa bhya Abhatumwa 18: kya

Highlight

Copy