Ebhikorwa bhya Abhatumwa 17

Inkungu mu-musi gwa Teesaroonike

1Pawuro na Siira mbatura mu-musi gwa Amufipori, na gwa Aporoniya, mbayika mu-musi gwa Teesaroonike. Teesaroonike ayo ꞉ryariga ririwo riisunagoogi erya Abhayawudi. 2Mmbe, Pawuro woone, rwa kutyo gintungwa gyaye ꞉gyariga giri, ˆneengiraga mw-isunagoogi ayambeene kasatu ku-nsiku esatu gya Insabhaato. Mw-isunagoogi muyo niwe Abhayawudi ꞉bhaariga bhari. Mooyo gasatu gayo Pawuro ˆnaabheereshaga ekimari kya Amakaamo Amataakatiifu iiguru ya Yeesu Kiriisitu. 3ˆNaabhabhwiriraga abhweru ati, ꞉yeenderwe Kiriisitu anyansibhwe na okwitwa, amare asuuke okusooka mu-bhafuuye. Pawuro ˆnaagenderera okubhabhwira ati, “Yeesu unu enibhabhwira amangʼana gaaye, niwe Kiriisitu.” 4Amangʼana gayo Pawuro ꞉aaikire, Abhayawudi abhandi mbeekirisha, na Abhayunaani bhaafu bhanu ꞉bhaariga mboongwa Nyamuwanga bhoone mbeekirisha. Mu-bhaanu bhayo ꞉bhaariga bharimo abhagasi bha ekibharo bhaafu, bhoone mbeekirisha. Kimwi bhoone kutyo mbabha amwi ku-Pawuro na Siira.

5Amangʼana gayo ngakora Abhayawudi abhandi mbabha na orwango. Kimwi mbagenda mw-iguriro, mbagega abhaanu abharangirangi mbabhareeta. Abhaanu abharangirangi bhayo mbayika, mbaamba okukora inkungu nene mu-musi muyo. Mbagenda mbagonokera ewa Omukiriisitu wumwi, riisiina ryaye ˆnaatogwa Yaasoni, okwagara-wo Pawuro na Siira, insonga bhabhareete ku-bhaanu mu-musi muyo. 6Bhunu ꞉bhaayikire mbeejura ayo, mbanyoora bhatariwo, mbakuura Yaasoni na Abhakiriisitu abhandi. Mbabhasira imbere ya abhakuru bha omusi, enu mbamwayaga ati, “Abhaanu bhanu nibho bhareeteeye ebhyaro bhyone kutyo inkungu nene. Woori bheejire na ewaasu enu. 7Na Yaasoni niwe abharamiiye, bhari iika ewaaye. Amwi na gayo, abhaanu bhoone kutyo abhajeera ebhiraagiro bhinu ꞉bhyatuuywe-wo na Kayijaari,#17:7 Kayijaari. Ringira riingʼana rinu mu-Mangʼana Amakomeeye. mbaaikaga ati bhari na omukama weebhwe owundi, ati kaatogwa ati Yeesu.” 8Abhakuru bha omusi na riisangi rya abhaanu bhayo, bhunu ꞉bhoonguuywe amangʼana gayo, mbatitibhara muno. 9Abhatungi mbaramura okutuurira-wo Yaasoni na abheejaabho bhayo ingomboro, mbabhataatira bhagende.

Gintungwa gya abhaanu bha Bheroya

10Bhunu ingeta ꞉yeengiiye, Abhakiriisitu mbabhwira Pawuro na Siira bhagende bhwangu mu-musi gwa Bheroya. Bhunu ꞉bhaayikire eyo, mbeengira mw-isunagoogi rya Abhayawudi. 11Abhayawudi bha Bheroya ayo ꞉bhaariga bhari bhaanu bha mitima mijomu okukira abha Teesaroonike. Kwa okubha bhunu Pawuro ꞉aaraasishaga abhaanu bhayo Riingʼana rya Nyamuwanga, ꞉bhaariga mbaryenda muno, mbariikirisha kujomu. Mbeekomeeshaga na okusoma Amakaamo Amataakatiifu ku-nsiku, insonga bhamenyegeshe raabhe gayo Pawuro kaaika nikwo kutyo gari. 12Abhayawudi bhaafu mu-bhayo ꞉bheetegeereshaga mbeekirisha Yeesu. Okusiga bhayo, Abhayunaani bhaafu abha ekibharo abharume na abhagasi mbamwikirisha.

13Mmbe, Abhayawudi bha Teesaroonike, mbamenya ati Pawuro keeyigisha Riingʼana rya Nyamuwanga Bheroya eyo, bhoone mbagenda-yo. Mbasooyeresha abhaanu bhaafu bhanu ꞉bhaariga bhari ayo, niibha-wo inkungu nene. 14Kimwi Abhakiriisitu mbagega Pawuro bhwangubhwangu, mbamusira mbamuyikya ku-kigobho. Nawe Siira na Timoteeyo abheene mbasigara Bheroya ayo. 15Abhaanu bhanu ꞉bhaayeregesiishe Pawuro mbamuyikya mu-musi gwa Atene. Bhunu ꞉bheendaga okusubha, Pawuro ˆnaabhatuma ati bhabhwire Timoteeyo na Siira bhamuseete bhwangu.

Pawuro kaaika na abhaanu bha Atene

16Bhunu Pawuro ꞉aariga ˆnaarinda bhaaSiira mu-musi gwa Atene ayo, ˆneeyinda mu-musi guyo. ˆNaarora omusi gwone kutyo gwijuuye ebhisusano bhya emisambwa. Iingʼana iyo niikora omutima gwaye ngusurumbara muno. 17Mmbe, Pawuro ˆneengira mw-isunagoogi, ˆnaanyoora-mo Abhayawudi na bhanu ꞉bhoongwaga Nyamuwanga. Na mw-iguriro eyo woone, ku-nsiku, ꞉aanyookanaga na abhaanu abhandi, ˆnaabhambashaanya nabho iiguru ya Riingʼana rya Nyamuwanga.

18Mw-iguriro eyo, ꞉bhaariga bhariyo abhamenyi bha iidiini ya Ekiyepikuriyo,#17:18a Abhamenyi bha iidiini ya Ekiyepikuriyo. ꞉Bhaariga mbaaika ati Omuunu ni kwiyenda. na abha iidiini ya Ekisitoyiko.#17:18b Abha iidiini ya Ekisitoyiko. ꞉Bhaariga mbaaika ati goone kutyo ganu agaaja okubha, gabhe era kutyo. Abhaanu bhasige okwitimaata okuramira engʼana ryoneryone. Bhayo bhoone, mbaamba okubhambaasha Pawuro. Abhandi mbaaika ati, “Omumwayimwayi unu keenda okwaika mangʼanaki anu?” Abhandi mbaaika ati, “Eyisusana ati kaaikira emisambwa gya ekyaro ekindi.” ꞉Bhaaikire kutyo kwa okubha Pawuro ꞉aariga ˆnaabharaasisha Amangʼana Amajomu iiguru ya Yeesu, na iiguru ya abhafuuye okusuuka.

19Mmbe, abhamenyi bhayo mbagwata Pawuro mbamusira mw-ibharaja riikuru erya Arewopago. Abhakuru bha riibharaja riyo mbamubhwira ati, “Owutura okukibhwira ameeyigisho amayaaya ganu waanuubhwira abhaanu, kyone kimenye insonga yaago? 20Agandi ganu kyoongwa ni mangʼana magenyi, woori eswe kyone kyakyendere ukisomboorere-ko kigoongwe.” 21꞉Bhaaikire kutyo, kwa okubha abhaanu bha Atene eyo, na abhagenyi bha areera bhanu ꞉bhaariga bheekaaye eyo, ꞉bhaariga bhaanarire okwitegeeresha na okwaikira amangʼana amayaaya ganu ageengira mu-kyaro.

22Mmbe, Pawuro ˆnaayambaara mw-ibharaja ayo, ˆnaaika ati, “Emwe abhaanu bha Atene! Enirora ati ku-mangʼana goone kutyo muri bhaanu bhanu mugwatire muno amangʼana ga giidiini gyemwe. 23Neeyinda enu na enu mu-musi gwemwe nindingiraga bhinu omuramya, mu-bhiyo naaringira, naarora kw-ishengero erimwi mukaamire-ko ati, ku-nyamuwanga unu atakumenyekana. Mmbe woori, Nyamuwanga uyo emwe omuramya enu mutaamumenya, niwe anye eneenda nibharaasishe amangʼana gaaye.

24“Nyamuwanga niwe omukuru, mu-rwire na mu-kyaro, omwene niwe ꞉aabhumbire ekyaro, na ebhiinu bhyone kutyo bhinu bhiri mu-kyaro. Okuriingʼaana na gayo, omwene atakwikara mu-mayekaru ganu goombakirwe na mabhoko ga abhaanu! 25Na atari na obhukene bhwa kukorerwa kiinu kyonekyone na mabhoko ga abhaanu, kwa okubha omwene niwe kaayaana abhaanu bhoone kutyo omwika na okwisha omwoyo, na niwe kaasoosha na ebhiinu ebhindi bhyone kutyo. 26Na okusooka mu-muunu wumwi nimwo Nyamuwanga ꞉aasoosiishe abhaanu bha mayito goone kutyo, ˆnaabhasweranya mu-bhyaro bhyone kutyo. Okusooka kara ˆnaabhaturira-wo na amabhaga ganu ꞉aabhayaaye, na gimbibhi gya anu bhariteeraga okwikara. 27Nyamuwanga ꞉aakorere kutyo insonga abhaanu bhamwagare, raabhé kutyo bharaamwagare mbabhabhaataga, nawe bhamurore. Na Nyamuwanga atari areera na eswe, 28kwa okubha niwe kaakora kiri anu, na kiri bhaworu. Rwa owumwi mu-bhakaami bheemwe kutyo ꞉aaikire ati, ‘Kwa okubha eswe kyone kiri bhaana bhaaye.’

29“Mmbe, eswe kiri bhaana bha Nyamuwanga. Ebhisusano ebhiyeeswa mu-jaabhu, mu-yera, na ebhindi ebhibhaajwa okusooka mu-magina. Nawe eswe kiteesire okwiganiirisha ati Nyamuwanga kaasusana na ebhiinu rwa bhiyo, mumenye ati, amangʼana gayo goone kutyo ni bhaanu era nibho abhageeganiirisha mbagakora. 30Kara ayo, abhaanu ꞉bhaariga bhari bhatengʼo mbakoraga amangʼana gayo. Mu-kabhaga kayo Nyamuwanga ꞉aariga ˆneekora muna atakugarora. Nawe woori kaabhwira abhaanu bhoone kutyo, mbaara gyone kutyo, bhanuge ebhikayo bhyebhwe. 31Bhakore kutyo kwa okubha Nyamuwanga aatuuye-wo orusuku runu ariramurira abhaanu bhoone kutyo, na ku-rusuku ruyo atariiwonera omuunu woonewoone. Orusuku ruyo ariramura okuturira ku-muunu waaye unu asorere. ꞉Eeresiishe abhaanu bhoone kutyo ekimari kya amangʼana gayo bhunu ꞉aamusuurire okusooka mu-bhafuuye.”

32Mmbe, abhakuru bhayo mboongwa ati, Pawuro kaaikira iiguru ya okusuuka kwa abhafuuye, abhandi mbamusangʼayaga. Nawe abhandi mbamubhwira ati, “Ekiija okukwitegeeresha kweki ukisomboorere iingʼana iyo.” 33Mmbe, Pawuro ˆnaawuruka mw-ibharaja riyo. 34Abhaanu abhandi mbeekirisha Yeesu, mbabha kiina kimwi na Pawuro. Mu-bhaanu bhayo ꞉aariga arimo Diyoniisiyo, owa mw-ibharaja rya Arewopago, na omugasi wumwi, riisiina ryaye ˆnaatogwa Daamari, na abhaanu abhandi.

Currently Selected:

Ebhikorwa bhya Abhatumwa 17: kya

Highlight

Copy