Ebhikorwa bhya Abhatumwa 16

Pawuro kaagega Timoteeyo bhabhe amwi

1Pawuro ˆnaagenderera ˆnaayika mu-musi gwa Deribhe, ˆnaamara ˆnaatura na mu-musi gwa Risitira. Risitira eyo ꞉aariga ariyo omwiyigira wumwi wa Yeesu, riisiina ryaye ˆnaatogwa Timoteeyo. Nyiramwene Timoteeyo ꞉aariga ari Muyawudi, omwene woone ꞉aariga eekirisiishe Yeesu. Nawe esemwene ꞉aariga ari Muyunaani.#16:1 Muyunaani. Abhayunaani ꞉bhaariga bhatakusaara. Ku-nsonga iyo, Timoteeyo woone ꞉aariga akyari kusaarwa. 2Timoteeyo ꞉aariga ˆnaaikwa kujomu mu-Bhakiriisitu bheejaabho abha Risitira na Ikooniyo. 3Pawuro ˆnaabhwira Timoteeyo ati bhagende nawe ku-rugendo runu ꞉aagendaga. Mmbe, Timoteeyo woone ˆneekirisha, Pawuro ˆnaamusaara, insonga iri kujomisha Abhayawudi abha gimbarika giyo, kwa okubha Abhayawudi bhayo ꞉bhaariga bhamenyere ati esemwene Timoteeyo ni Muyunaani. 4Kimwi Pawuro, Siira na Timoteeyo, mbagenda mbaturaga mu-misi giyo, enu mbabhwiraga Abhakiriisitu ebhiraagiro bhinu bhituuywe-wo na abhatumwa, na abhakaruka bha riikanisa rya Yerusareemu. Insonga eya okukora kutyo ꞉bheendaga Abhakiriisitu bhayo bhoone bhaseete ebhiraagiro bhiyo. 5Nikwo kutyo amakanisa geenda eyo ꞉gaagendereeye okukomeera ku-bhwikirisha bhwebhwe. Na obhukumi bhwa Abhakiriisitu ꞉bhwariga mbwiyongesha kutyo ginsiku ꞉gyagendaga.

Ebhiroro bhya Pawuro iiguru ya omuunu wa Makedooniya

6Pawuro na abheejaabho mbatura mu-kyaro kya Furiigiya, na Garaatiya, kwa okubha ꞉bhaariga bhagaanyiibhwe na Mwoyo Omutaakatiifu ati, bhaasiga okwiyigisha riingʼana rya Raatabhugenyi Yeesu mu-kyaro kya Asiya. 7Bhunu ꞉bhaayikire ayeeyi na obhuteero bhwa ekyaro kya Miisiya, mbasaka okwingira mu-kyaro kya Bhituuniya, nawe Mwoyo Omutaakatiifu wa Yeesu ˆnaabhagaanya. 8Niwe mbaramura okusubha, mbooromoka mbagenda mu-musi gwa Turowa. 9Mu-ngeta Pawuro ˆnaarora ebhiroro. Mu-bhiroro bhyaye bhiyo, ˆnaarora omuunu wumwi Mumakedooniya ayambaayega. Omuunu uyo ꞉aariga ˆnaamwisaasaama muno ˆnaaikaga ati, “Yambukira Makedooniya enu, ukisakire!” 10Anu Pawuro ꞉aamarire okurora ebhiroro bhiyo, ˆnaakitondera, kyone nkiramura okugenda bhwangu Makedooniya eyo, kimenyere ekimari ati, ni Nyamuwanga niwe keenda kigende-yo kiraasishe abhaanu Amangʼana gaaye Amajomu.

Riidiya keekirisha Raatabhugenyi Yeesu

11Kimwi nkitweka iimeeri nkisooka Turowa ayo, nkigenda kiroobhere nkiyika kw-isinga rya Samotirake nkimaama ayo. Anu ꞉bhwakyeye, nkitweka kweki nkiyika mu-musi gwa Neyapoori. 12Okusooka ayo, nkiribhata nkiyika mu-musi gwa Firipi. Firipi ni musi gumwi mu-misi emikuru mu-kyaro kya Makedooniya, na niwe ayo Abharuumi ꞉bhaariga bhangʼaanyiiye. Mu-musi guyo, nkiikara-wo nsiku ntooto.

13Mmbe, orusuku rwa Insabhaato nkisooka mu-musi guyo. Nkigenda ayeeyi na oruuji, kwa okubha ꞉kyariga nkitoga ati niwe kikanyoorere abhaanu mbasaasaamaga Nyamuwanga. Bhunu ꞉kyayikire ayo, nkinyoora bhariwo abhagasi, eswe kyone nkiikara amwi nabho, nkibhabhwira amangʼana iiguru ya Yeesu. 14Mu-bhagasi bhanu ꞉bhaariga mbakiitegeeresha, ꞉aariga arimo omugasi wumwi wa mu-musi gwa Tiyatira, riisiina ryaye ˆnaatogwa Riidiya. Riidiya uyo ꞉aariga ari mugusha wa ngibho gya bhugusi bhunene egya giirangi gya jambarawu, na ꞉aariga ari muungwani ku-Nyamuwanga, nawe ꞉aariga atari Muyawudi. Mmbe, bhunu Pawuro ꞉aariga ˆnaabhabhwira Riingʼana rya Nyamuwanga, Raatabhugenyi Yeesu ˆneegura omwoyo gwa Riidiya, kimwi Riidiya ˆneekirisha amangʼana geeswe. 15꞉Eejire aabhatiisibhwa omwene na abhaanu bha iika waaye, kimwi ˆnaakiisaasaama ˆnaakibhwira ati, “Raabhe mwarora ati noone niikirisiishe Raatabhugenyi, enibheesaasaama mwingire mwikare-ko na ewaani.” ˆNaakikomeeresha muno ati kigende ewaaye. Kyone nkigenda.

Pawuro na Siira bhari mu-jeera

16Rusuku rumwi, bhunu ꞉kyariga nkigenda anu abhaanu ꞉bhaariga mbasaasaamaga Nyamuwanga, nkinyookana na omuyara wumwi mugaya. Omuyara uyo ꞉aariga ari na ekiwi. Ekiwi kiyo ꞉kyariga kimuyaaye obhufumu. Na bheesebhugenyi ꞉bhaariga mbanyoorera-mo yera nyafu egya obhuragusi. 17Omuyara uyo ˆnaakiseetaga eswe na Pawuro enu ˆnaamwayaga, ˆnaabhwiraga abhaanu ati, “Abhaanu bhanu ni bhajuuma bha Nyamuwanga Unu ari iiguru wa bhyone kutyo. Na nibho abhabharaasisha injira ya obhwerusha.” 18ˆNaamara nsiku nyafu ˆnaakoraga kutyo. Ku-bhuteero, iingʼana iyo niisina Pawuro muno. ˆNaaringira iinyuma ku-muyara uyo, ˆnaabhwira ekiwi kiyo ꞉kyariga kiri mu-muyara uyo ati, “Enikusiiga kw-isiina rya Yeesu Kiriisitu, sooka mu-muyara unu!” Kimwi ekiwi kiyo nkimusooka-mo ayoayo.

19Bhunu bheesebhugenyi ꞉bhaarorere kutyo, mbarora ati bhatakyatura kweki okunyoorera-mo giiyera. Mbagwata Pawuro na Siira, mbabhakuura, mbabhasira, mbabhayikya mw-iguriro imbere wa abhatungi bha omusi. 20Mbabhwira abhatungi bhayo ati, “Abhamura bhanu ni Bhayawudi, kweki abhareeta inkungu nene mu-bhaanu bha mu-musi gweswe gunu. 21Abhakibhwira ati, eswe kyone kiseete gintungwa gyebhwe, enu eswe kiri Bharuumi, na ebhiraagiro bhyeswe bhitakwenda eswe kiikirishe na okuseeta gintungwa gyebhwe.”

22Kimwi abhaanu bhanu ꞉bhaariga bhasangire ayo mbagenda bhabhiiyiiywe, riisungu ndibheeta, mbagwata Pawuro na Siira mbabhasira ku-bhatungi. Abhatungi bhayo mbafuura Pawuro na Siira gingibho gyebhwe managa, mbasiiga abhaanu bhabhabhume ebhibhooko. 23Pawuro na Siira bhakyari na obhururu bhwa ebhibhooko ku-mibhiri gyebhwe, mbatuurwa mu-jeera. Abhatungi bhayo mbakomeeresha omuriisi wa iijeera ati abhaangarire kujomu. 24Mmbe, omuriisi uyo woone ˆnaabhatuura mu-kyumba kya agati mu-jeera muyo, ˆnaatuura amaguru geebhwe mu-makano ga amati.

25Bhunu ꞉yaayikire mu-bhwire agati, Pawuro na Siira ꞉bhaariga mbasaasaama Nyamuwanga, mbeembaga na ameembo ga okumukumangya. Abhabhoywa bheejaabho ꞉bhaariga bhamaamire mbabheetegeereshaga. 26Kimwi mbataka era riinyamutikima esito muno nditura mu-kyaro, ndisingisha omusingi gwa iijeera, na giinyigi gyone ngiiguka egyene, na eminyororo gyone ginu ꞉gyariga gibhoyere abhabhoywa bhoone kutyo ngisurumuka. 27Omuriisi wa iijeera ˆneemuka. Bhunu ꞉aarorere giinyigi giigukire, ˆnaatoga ati abhabhoywa bhayo bhoone kutyo bhaabhirima. Kimwi ˆnaasoosha ekiraawa kyaye mu-ruubhu okwenda okwiyita. 28Kimwi Pawuro ˆnaamura obhuraka ˆnaaika ati, “Awe siga okwiyita! Eswe bhoone kutyo kiri munu!” 29Mmbe, omuriisi ˆnaabhwira abheejaabho ati bhareete gintara. Bhunu ꞉bhaareetere gintara, omuriisi uyo ˆneengira mu-jeera muyo abhirimire, ˆnaagwa imbere wa Pawuro na Siira enu ˆnaayararaga “Rigirigi.”

30꞉Eejire aasiiriika ˆnaabhawurusha anja, ˆnaabhabhuusha ati, “Ee bhakuru bhaani, anye noone nikore kutiki insonga neeruke?” 31Bheeki mbamusubhya ati, “Nwikirishe Raatabhugenyi Yeesu. Ukamara okumwikirisha, omwene kaakwerusha awe. Eyibha kutyo na ku-bhaanu bha mu-nyumba yaawo.” 32Omuriisi uyo ꞉eejire eekirisha, Pawuro na Siira mbamwiyigisha riingʼana iiguru ya Raatabhugenyi Yeesu, bhari amwi na abhaanu bhoone kutyo abha mu-waaye. 33Ingeta iyoiyo, omuriisi uyo ˆnoosha Pawuro na Siira ebhironda, ꞉eejire aamara okubhoosha, ˆnaabhatiisibhwa omwene na abhaanu bha mu-waaye bhoone kutyo. 34Okumara okubhatiisibhwa omuriisi uyo ˆnaasira Pawuro na Siira ewaaye, ˆnaabhayaana ebhyokurya. ˆNaajomererwa muno ati, omwene na abhaanu bhaaye bhoone kutyo, bheekirisha Nyamuwanga.

35Anu ꞉bhwakyeye, abhatungi bhayo mbatuma abhakuru bha abhasirikare ku-muriisi wa iijeera, insonga bhamubhwire ati, eegurire abhaanu bhayo bhagende enu bharaagende. 36Abhasirikare bhayo mbagenda mbabhwira omuriisi amangʼana gayo. Omuriisi woone ˆnaabhwira Pawuro ati, “Abhatungi bhanu bhaantuma ati nibhataatire. Woori muwuruke anja, mugende na omurembe.”

37Nawe Pawuro ˆnaabhabhwira ati, “Bhaakibhuma muno mu-meeso ga abhaanu, bhakyari kumenya raabhe kikayire, enu eswe kiri Bharuumi!#16:37 Abharuumi ꞉bhateendwaga bhabhumwe bhakyari kumenya raabhe bhakayire. Mbakituura mu-jeera. Mmbe woori ndora abheenda okukisoosha-mo bhwiyibhise? Kitakwikirisha! Mukisige, abheene bhaaje bhakisooshe-mo!” 38Abhasirikare bhayo mbabhwira abhatungi amangʼana gayo goone kutyo. Bhunu abhatungi bhayo ꞉bhoonguuywe ati Pawuro na Siira ni Bharuumi, mboobhaya muno, 39mbagenda mbaamba okubheewombeeresha. Kimwi mbabhasoosha mu-jeera muyo, mbabheesaasaama ati bhasooke mu-musi gwebhwe.

40Pawuro na Siira, anu ꞉bhaariga bhaasookere mu-jeera muyo, mbagenda ewa Riidiya. Mbasangira amwi na Abhakiriisitu bheejaabho, mbabhakomeeshaga emitima. Okumara okubhakomeesha niwe mbeemuka ayo.

Currently Selected:

Ebhikorwa bhya Abhatumwa 16: kya

Highlight

Copy