MAANGMUHNA 5
5
Laizial le Tuuno
1Tua ciangin, tokhom tungah a tupa in a taklam khutah a tawi laizial tawn khat ka mu hi. Tua a laidal tung a langnih tuakah lai kigelhin a kizialcip khit ciangin a kiphel theih loh nadingin mun sagih-ah kiciamteh hi.#Ezk 2:9-10; Isa 29:11. 2Tua ciangin a thahat vantungmi khat ka mu a, amah in nakpitakin, “Hih laizial a ciamtehnate lakhia-in a laizial a phel dingin a kilawm kua om ahi hiam?” hong ci hi. 3Ahi zongin tua laizial a phel ding mi, vantung, leitung, leinuai-ah kuamah kimu lo hi. 4Tua laizial phelin a sung a en dingin a kilawm kuamah kimu lo ahih manin nakpitakin ka kap hi. 5Tua laitakin upate khat in kei kiangah, “Kap kei in. Judah minam sung panin Humpinelkai, David suan sung panin a lianpa gualzo khinta a, tua laizial ciaptehna sagihte lakhia-in a laizial phelthei ding hi,” a hong ci hi.#Pian 49:9; Isa 11:1,10.
6Tua upate’ huamsung, ganhing lite le kumpi tokhom kikalah Tuuno a ding ka mu hi. Tua Tuuno pen a kigo lumsa tawh kibang a, leitung khempeuhah a kisawlkhia, Pasian’ khate’ lim ahi ki sagih le mittang sagih a nei hi.#Isa 53:7; Zek 4:10. 7Tua Tuuno va pai a, tokhom tungah a tupa in a taklamah a tawi laizial a va la hi. 8Tua laizial a lak khit ciangin ganhing lite le upa sawmnih le lite, Topa’ mai-ah a kun uh hi. Amaute in harp lasakna khat ciat le Pasian’ mi siangthote in thungetna-in a zat uh paknamtui a dimin a om paknamtui beel khat ciat a tawi uh hi.#La 141:2. 9Amaute inla thak khat sa uh a,
“Nang Tuuno,
tua laizial a lakhia ding le
a ciamtehnate a lakhia dingin
na kilawm hi.
Nang hong kigo khin ahih manin
mi namkim le pau namkim
a pau mite sung panin na sisan tawh
Pasian a dingin mite na lei khin a,#La 33:3; 98:1; Isa 42:10.
10Pasian’ na a sem dingin
siampi za le kumpi za na pia a,
amaute in leitung ukin
a om ding uh hi,”
a ci uh hi.#Pai 19:6; Mang 1:6.
11Tua ciangin ka khuadak leh tokhom le ganhing lite le upate’ kimkotah atul-amakin a ding miaimuai vantung mite’ awging ka za hi.#Dan 7:10. 12Amaute in nakpitakin la sa uh a,
“A kigo Tuuno in vangliatna le hauhna,
pilna le thahatna, pahtawina,
minthanna, le phatna,
a ngah dingin kilawm hi,”
a ci uh hi. 13Tua ciangin vantung, leitung, leinuai, tuipi sung le mun khempeuhah a om nuntakna a nei khempeuh inla a sakna uh ka za a, amaute in,
“Tokhom tungah a tupa le Tuuno in
phatna, pahtawina,
minthanna le vangliatna,
ngah tawntung ta hen,”
a ci uh hi. 14Tua ciangin ganhing lite in zong, “Amen,” na ci uh a, upate in zong khukdinin Pasian a bia uh hi.
Currently Selected:
MAANGMUHNA 5: TDB
Highlight
Share
Compare
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
