MAANGMUHNA 4
4
Vantungah Pasian Biakna
1Hih thuteng khit ciangin ka khuadak leh vantungah kong a kihongsa-in a om ka mu hi. Peengkul awging tawh a kibang, kei kiangah thu a hong gensa awging mah in, “Hih lai-ah hong paito in. Tunung ciangin thupiang dingte ka hong lak ding hi,” hong ci hi. 2Thakhat thu-in Kha Siangtho tawh ka kidim a, tua vantung a tokhom tungah mi khat a tu ka mu hi. 3Tua tokhom tungah a tupa pen Jasper le Karnelian suangmanpha bangin taang ziazua a, a tokhom kimkot pen Emerald suangmanpha bangin suum pempam hi.#Ezk 1:26-28; 10:1. 4Tua tokhom kimkotah tokhom sawmnih le li om a, tuate tungah puanpak silhin kham lukhu a khu upa sawmnih le lite tu uh hi. 5Tua tokhom panin khuaphialep hong taangkhia-in, awging le vanging hong kipankhia a, a tokhom mai-ah Pasian’ kha ahi meivak sagih a kivak hi.#Pai 19:16; Mang 8:5; 11:19; 16:18; Ezk 1:13; Mang 1:4; Zek 4:2. 6A tokhom mailam tengah Kristal suangmanpha bangin a siang kilkel, limlang peekpi kiphah tuipi bangin a dum dide hi.
Tua tokhom kiim a pang ciatah a nung le a mai-ah mit a dimin a nei ganhing li a om hi.#Ezk 1:22. 7A ganhing a khatna pen humpinelkai tawh kibang a, a nihna bawngtal tawh kibang a, a thumna in mihing maitang nei a, a lina pen muvanlai a leeng lai tawh kibang hi.#Ezk 1:5-10; 10:14. 8Tua ganhing lite in kha guk ciat nei-in, tua a khate’ sunglam le a pualamah mittang a dimtakin om a, a sun a zan tawlnga loin la sa uh a,#Ezk 1:18; 10:12; Isa 6:2-3.
“A beisa, tuhun,
le a tawntungin a om
Vanglian Topa Pasian,
siangtho hi, siangtho hi,
siangtho hi,”
a ci uh hi. 9Tua ganhingte in a nungta tawntung, tokhom tungah a tupa tungah a lungdamna uh ko-in pahtawi-in a phat simun 10nungta tawntungin tokhom tungah a tupa mai-ah tua upa sawmnih le lite zong bokin amah bia uh a, tua tokhom mai-ah a lukhute uh lawnin la sa uh a,
11“Kote’ Topa Pasian aw,
nangmah in na khempeuh piangsakin,
nangma deihna bangin
na khempeuh omin,
na khempeuh
kipiangsak ahih manin,
minthanna, pahtawina,
le vangliatna
na ngah tawntung dingin
a kilawm hi,”
a ci uh hi.
Currently Selected:
MAANGMUHNA 4: TDB
Highlight
Share
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
