MAANGMUHNA 14

Mi 144,000 te’ Lasakna

1Tua ciangin ka khuadak leh Zion Mual tungah Tuuno a dingin a om ka mu hi. Amah tawh mi tul za le tul sawmli le tulli dingkhawm uh a, tua mite’ taltangah Tuuno le a pa’ min kigelh hi.#Ezk 9:4; Mang 7:3. 2Tua laitakin tuizeu lianpi le vanging tawh a kibang a gingpha mahmah aw khat vantung panin a hong ging ka za hi. Tua awging pen harp lasakna a kitum a ging tawh kibang hi. 3Tokhom, ganhing lite, le upate’ lam nga-in tua mihonpite inla thak khat a sa uh hi. Tua la pen leitungah a kitankhiasa mi tul za le tul sawmli le tul lite simloh kuamah dang in sa thei lo uh hi. 4Hih mite in numei tawh paktatna gamta ngei nai lo uh a, paubaanna a nei lote ahi uh hi. Amaute in Tuuno a paina peuhpeuhah zui uh a, midang khempeuh sung panin a kitankhiasa, Pasian le Tuuno tungah a kipia masa mite ahi uh hi. 5Amaute, paubaanna om kiuhkeuh lo uh ahih manin zuauthu gen ngei het lo uh hi.#Zefa 3:13.

Vantung mi Thumte’ Thugen

6Tua ciangin leitungah a teng mi namkim, pau namkim a zang mite tungah a tawntungin Lungdam nading Thu gen ding a nei vantungmi khat vankim lai-ah a leeng ka mu hi. 7Amah nakpitakin kiko a, “Amah in mihingte thu a khen ding hun hong tungta ahih manin Pasian kihta unla amah phat un. Van le lei, tuinak le tuipite a bawlpa hong bia ta un,” a ci hi.

8Tua ciangin vantungmi a nihna in hong zui a, “A Lian Babylon khuapi kicim, kicim! Amah a huk a lanna leenggahzu, mi khempeuh tungah pia-in khamsak a, gimna thuaksak hi,” a ci hi.#Isa 21:9; Jer 51:8; Mang 18:2.

9Tua ciangin vantungmi a thumna in a masa tegel hong zui leuleu-in nakpitakin, “Tua ganhing le a lim bia-in a taltang ahih kei leh a khut tungah ciaptehna a ngah mi peuhmah in, 10Pasian’ leenggahzu zong dawn ding uh hi. Pasian in ama hehna ahi leenggahzu khauh pen ama hehna hai sungah a dimtakin sung khinzo ta hi. Tua bang mite pen a siangtho vantung mite le Tuuno mai-ah meikuang le kat khu tawh gimna kipia ding hi.#Isa 51:17; Pian 19:24; Ezk 38:22. 11Amaute a kibawlsiatna mei, khu tawntung a, ganhing le a lim bia-in, a min kigelhna a nei mi peuhmah in a sun a zanin tatsat loin gimna thuak paisuak uh hi,” a ci hi.#Isa 34:10.

12Pasian’ thupiakna zui-in Jesuh tungah a citak Pasian’ mite a dingin thuakzawhna kisam hi.

13Tua ciangin vantung panin awging khat ka za a, “Tu a kipanin Topa thu-ah a si mite mi hampha mahmah ahi hi, cihna gelh in,” a ci hi. Tua ciangin Kha Siangtho in, “Hi takpi hi. Amaute’ nasepna thaman in amaute zui ding ahih manin a nasep gimna panun tawlnga-in nuamsa-in om ding uh hi,” ci-in a dawng hi.

Leitung Mite Anlak bangin A Kilakna

14Tua ciangin ka khuadak leh meiipi a bang a kang biakbuak om a, tua meiipi tungah mihing tawh a kibang khat tu-in, kham lukhu khu-in, a khutah phiaukawi hiam khat a tawi ka mu hi.#Dan 7:13. 15Biakinn sung panin vantungmi khat hong paikhia a, meiipi tungah a tu mipa nakpitakin samin, “Leitung mite lak dingin min mahmah a, a lak hun hong tungta ahih manin na phiaukawi tawh at in,” a ci hi.#Joel 3:13. 16Tua ahih manin meii tungah a tupa in leitungah a phiaukawi hong van a, leitung mite a at hi.

17Tua ciangin vantung biakinn panin vantungmi adang khat hong paikhia leuleu a, amah in zong phiaukawi hiam khat mah a tawi hi.

18Tua ciangin biakna tau panin vantungmi adang khat hong paikhia leuleu hi. Tua vantungmi pen mei a ukpa hi a, phiaukawi hiam a tawipa kiangah nakpitakin, “Leitung mite leenggah bangin minta ahih manin leitung mite na phiaukawi tawh atin a lom lomin kaikhawm in,” a ci hi. 19Tua ahih manin vantungmi in zong leitungah a phiaukawi hong van a, leitung mite kaikhawmin Pasian’ hehna lian leenggah cilna phualah a kaikhawm hi. 20Khuapi pualamah kicil a, a cilna panin sisan vive luangkhia-in, pi nga bang thukin, tai zanih ciang bangah tuikhang bangin a luang hi.#Isa 63:3; Kah 1:15; Mang 19:15.

Currently Selected:

MAANGMUHNA 14: TDB

Highlight

Compare

Copy