Late 115
115
Milim A Haihuaina le Topa Muanna
1Kote tungah hi loin,
Topa aw, kote tungah hi loin,
na itna kip le na thumanna hangin
nangma tungah minthanna om tahen.
2Bang hangin minam dangte in,
“Amaute’ Pasian koi-ah om ahi hiam?”
ci laizang ding ahi uh hiam?
3Vantungah eite’ Pasian om a,
ama ut peuhpeuh a hih hi.
4Amau’ milimte pen
ngun le kham hi lel a,
mihingte’ khut tawh a kibawl ahi hi.
5Amaute in kam nei napi-in pau thei lo uh a,
mit nei napi-in khua mu thei lo uh hi.
6Amaute in bil nei napi-in khua za lo uh a,
nak nei napi-in a nam thei lo uh hi.
7Amaute in khut nei napi-in
lawng thei lo uh a,
khe nei napi-in pai thei lo uh hi.
Amaute in aw gingsak thei lo uh hi.
8Tuate a bawlte le
tuate a muangte khempeuh pen
tuate mah tawh kibang uh hi.#La 135:15-18; Mang 9:20.
9Israel-te aw, Topa muang un.
Amah pen note hong huhpa le
hong hupa ahi hi.
10Aaron innkuante aw, Topa muang un.
Amah pen note hong huhpa le
hong hupa ahi hi.
11 Topa a zahtakte aw, Topa muang un.
Amah pen note hong huhpa le
hong hupa ahi hi.
12 Topa in eite hong phawk a,
thupha hong pia ding hi.
Amah in Israel mite,
thupha hong pia ding a,
amah in Aaron innkuante
thupha hong pia ding hi.
13Amah in Topa a zahtakte
a lian a neu-in thupha hong pia ding hi.#Mang 11:18; 19:5.
14 Topa in note le na tate uh
hong pungsak tahen.
15Van le lei a bawl Topa in
note thupha hong pia tahen.
16Vantung pen Topa a’ hi a,
ahih hangin leitung pen
mihingte tungah hong pia khin hi.
17Misite ahi a, gamdaihna sungah
a pai peuhpeuhte in ahi zongin
Topa phat lo uh hi.
18Ahih hangin eite in
tu a kipanin a tawntungin
Topa i phat ngitnget ding hi.
Topa phat un.
Currently Selected:
Late 115: TDB
Highlight
Copy
Compare
Share
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
