Late 106
106
Israel-te’ Khialhna le Pasian’ Hoihna
1 Topa phat un.
Topa’ tungah lungdam ko un;
bang hang hiam cih leh
amah hoih a, ama itna kip tawntung hi.#1Khang 16:34; 2Khang 5:13; 7:3; Ezr 3:11; La 100:5; 107:1; 118:1; 136:1; Jer 33:11.
2 Topa’ nasepna lianpite
kua in genkhia thei ding a,
kua in a kicingin
amah phat thei ding ahi hiam?
3Thutang a zui,
a tawntungin thumanin a gamta mite,
mi nuamsa ahi hi.
4-5 Topa aw, nangma teel mite’ daupaina
ka muh theih nading,
nangma minamte’ kipakna sungah
ka lungkim theih nading,
nangma luahte tawh
ka minthan’ khawm theih nadingin
na mite tungah maipha na lah ciangin
kei hong phawk inla,
amaute na hotkhiat ciangin
kei zong hong huh in.
6Ka pu ka pate uh a kipan
kote ka khial khin uh hi.
Mawhna ka bawl khin uh a,
ka gilo gamtat khin uh hi.
7Ka pu ka pate un
Egypt gamah a om lai-un
nangma nasepna a lamdangte
ngaihsun lo uh hi.
Na itna kip a tampite phawk lo uh a,
San Tuipi-ah
Sangpenpa hong lehdo uh hi.#Pai 14:10-12.
8Ahi zongin amah in
a lian mahmah a vangliatna
a kitheihsak nadingin
ama min a ngaihsutna-in
amaute a honkhia hi.
9Amah in San Tuipi thuhilh a,
tua tuipi a kang hi.
Amah in gamlak kantan bangin
tuithuk kantanin amaute a paipih hi.
10Tua ahih ciangin amah in
galte’ khutsung panin amaute honkhia a,
langpangte’ vangliatna panin
amaute a khahkhia hi.
11Tui in amau’ langte tuummang khin a,
amaute a suakta khat zong om lo uh hi.
12Tua ciangin amaute in ama thu um uh a,
amah phatna la a sa uh hi.#Pai 14:21-31. #Pai 15:1-21.
13Ahih hangin amaute in
ama nasepte mangngilh pah uh a,
ama thugen ding ngak loin
a gamta pah uh hi.
14Ahih hangin amaute in
gamlakah duhluat mahmahna nei uh a,
sehnel gam sungah
Pasian a ze-et uh hi.
15Amah in amaute’ nget pen pia a,
ahih hangin amaute lakah
natsia a tungsak hi.#Gam 11:4-34.
16Gamlakah Moses le
Topa’ mi siangtho Aaron
a hazat uh ciangin,
17lei kihongin Dathan valhtum a,
Abiram’ pawlte a vukcip hi.
18Amaute’ sungah mei hong piangkhia a,
meikuang in migilote a kangtum hi.#Gam 16:1-35.
19Amaute in Horeb gam sungah
bawngno khat bawl uh a,
a kisung tua milim a bia uh hi.
20Amaute in Pasian’ minthanna pen
lopa a ne bawngtal lim tawh
a khek uh hi.
21-22Amaute in
Egypt gam sungah na lianpite a bawl,
Ham’ gam sungah na lamdangte le
San Tuipi-ah a kihtakhuai nate a bawl,
amau’ Honpa,
Pasian mangngilh uh hi.
23Tua ahih ciangin amaute
a suksiatna ding a hehna panin
a heikhia dingin Pasian’ mai-ah
ama teelpa Moses ding hikeileh
amaute ka susia ding hi, amah in ci hi.#Pai 32:1-14.
24Amaute in gam nuam simmawh uh a,
ama thuciamna um lo uh hi.
25Amaute a puanbuk sung uhah
phun niloh uh a,
Topa’ thu ngai lo uh hi.
26-27Tua ahih ciangin
amah in a khut laamto-in
gam sungah amaute puksak a,
leitung gam khempeuh
minamte’ lakah amau’ suanlekhakte
a thehthang ding a kiciam hi.#Gam 14:1-35. #Siam 26:33.
28Tua ciangin amaute in
Peor-a Baal pasian bel uh a,
nuntakna a nei lote tungah
biakna-in a kipia sate a ne uh hi.
29Amau’ gamtatna tawh
Topa’ hehna ding piangsak uh a,
amaute’ lakah pulnatna hong tung hi.
30Tua ciangin Finehas dingin hong palai a,
pulnatna a hong dai hi.
31Tua thu pen a khang a khangin
ama thumanna-in
kiciamteh tawntung hi.#Gam 25:1-13.
32-33Amaute in Meribah tuiphualah
amah sinso sakin,
amah a langpang uh hi.
Thakhatin kamguh a paukha
Moses in amaute’ huhau-in
siatna a ngahlawh hi.#Gam 20:2-13.
34 Topa in amaute a thupiak bangin
amaute in tua mite that lo uh hi.
35Minam dangte tawh kihelin
amau’ gamtat bangbang
a gamta dingin a kisin uh hi.
36Amau a dingin thangzak ahi
amau’ milimte a biakpih uh hi.#Thkna 2:1-3; 3:5-6.
37Amaute in a tapate uh le a tanute uh
dawi biakna-in a nei uh hi.#2Kum 17:17.
38Amaute in
Kanaan gam milimte a biakna-un
mawhna nei lo a tanute uh le
a tapate uh that uh a,
hih mi thahna hangin
gam sung a nin a suak hi.#Gam 35:33.
39Tua ahih ciangin amau’ sepna tawh
amaute a nin suak uh a,
amau’ gamtatnate tawh
palhngulhna a bawl uh hi.
40Tua ciangin ama mite tungah
Topa’ hehna hong kitawhkuang a,
amah in ama luah minamte a kih hi.
41Amau a mudah minamte in
amaute a uk theih nadingin
tua minamte’ khut sungah
amaute a pia hi.
42A galte un amaute nengniam uh a,
amau’ khutnuai-ah amaute a koih uh hi.
43Amah in amaute tam veipi honkhia hi.
Ahih hangin amaute in
lehdona lungsim vom uh a,
amau’ mawhna hangin
amaute a kiniamkoih hi.
44Tua bang ahi ta zongin
amaute’ kikona a zak ciangin
amaute’ cihmawhna a don hi.
45Amaute a’ ding a ngaihsutna-in
ama thuciamna phawk a,
ama itna kip tawh kizui-in
a kolsak hi.
46Amaute a man mi khempeuhte in
a khasiatpih zah dong dingin
amah in amau’ tungah a piangsak hi.#Thkna 2:14-18.
47 Topa, kote’ Pasian aw,
kote hong hon inla,
nangma min siangtho
kong phat theih nading uh le
nangma tungah lungdamna
kong koh theih nadingun
minam dangte’ lak panin
kote hong kaikhawmkik in.
48 Topa, Israel Pasian in
a tawntung a kipan a tawntung dongin
thupha ngah tahen.
Mi khempeuh in,
“Amen,” ci ta uh hen.
Topa phat un.#1Khang 16:35-36.
Currently Selected:
Late 106: TDB
Highlight
Copy
Compare
Share
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
