Late 105
105
Israel-te a dingin Pasian’ Sep Na Lamdangte
(1Khang 16:7-22)
1 Topa tungah lungdamna ko-in,
ama min phat unla,
ama sepnate khempeuh
mite lakah kitheisak un.
2Ama tungah la sa un.
Ama tungah phatna la sa unla,
a lamdang a septe khempeuh
gen ciat ta un.
3Ama min siangtho hangin lungdam unla,
Topa a zong mite lungdam tahen.
4 Topa le ama huh ding
zon belin nei unla,
a tawntungin
ama maipha zong niloh un.
5-6No ama nasem, Abraham’ suanlekhak,
Jakob’ tate, ama teel mite aw,
ama sepsa a lamdang nate,
ama nalamdang lahte,
a genkhiat a thukhennate
phawk ciat ta un!
7Amah pen Topa, eite’ Pasian hi a,
ama thupiaknate leitung khempeuh in
a zuih ding ahi hi.
8-11“Na luah dingin Kanaan gam
ka hong pia ding hi,”
ci-in Abraham tawh thuciam a bawlsa,
Isaac tungah a thuciamsa,
Jakob tungah thupiakna a kipsak,
Israel tungah tawntung thuciamna,
ama thupiaksa kammal,
ama thuciamna pen
khang tulkhat dongin
amah in phawk ngitnget hi.#Pian 12:7; 17:8; 26:3. #Pian 28:13.
12Amaute tawm mahmahin,
bangmah gentham lo uh a, khualmi hi-in,
13minam khat panin minam dang khatah,
gam khat pan gam khatah
a vak kawikawi laitakun,
14amah in amaute
kuamah nengniamsak lo hi.
Amaute’ hangin
amah in kumpite thuhilhin,
15“Ka sathau nilhte sukha kei un;
ka kamsangte tungah
siatna bawl kei un,” ci hi.#Pian 20:3-7.
16Amah in leitungah kialpi tungsakin,
nektheih an khempeuh
a siatsak ciangin,#Pian 41:53-57.
17amah in, Josef a kici,
sila-a a kizuak mi khat,
amaute’ mai-ah a sawl hi.#Pian 37:28; 45:5.
18Ama khete pen kolte in nasak a,
ama ngawng pen
sikkol sungah kikoih hi.
19Ama thugente a tun matengin
Topa in amah ze-et hi.#Pian 39:20-40:23.
20Amah a khahkhia dingin
kumpipa in mi paisak a,
mihingte a ukpa in
amah a khahkhia hi.#Pian 41:14.
21-22Josef in kumpipa’ uliante
ama ut bangin lamlakin,
a upate pen pilna hilhsak a,
ama innsung topa
ama neihsa khempeuh
a ukpa-in a koih hi.#Pian 41:39-41.
23Tua ciangin Egypt gamah Israel va pai a,
Ham’ gam sungah
peemta-in Jakob va om hi.#Pian 46:6; 47:11.
24 Topa in ama mite pungsak mahmah a,
a galte sangin amaute hatzaw sak hi.
25Ama mite mudahin, ama nasemte
siamna tawh a khem dingin
amaute’ lungsim amah in kiheisak hi.#Pai 1:7-14.
26Amah in, ama nasem Moses le
ama teelsa Aaron a sawl hi.#Pai 3:1-4:17.
27Amaute in ama limte amaute’ lakah
na lamdangte
Ham’ gam sungah a bawl uh hi.
28Amah in khuamial sawl a,
leitung khim a zingsak hi.
Ahih hangin Egypt mite in
ama thu a langpang uh hi.#Pai 10:21-23.
29Amah in amau’ tuite sisan suaksak a,
a ngasate uh a sisak hi.#Pai 7:17-21.
30Amau’ leitang tung le
a kumpipa’ innsung nangawn
uiphukte tawh a kidim hi.#Pai 8:1-6.
31Amah kampau a,
thohonpi le thokangte
gam sung dimin hong om hi.#Pai 8:16-17,20-24.
32Amah in a guah dingun gialpi,
amau’ gam sung khempeuh
a taangsak khuaphialep,
amaute a pia hi.
33Amah in amau’ leengguite le
a theikungte uh vattansak a,
amau’ gam sung sing khempeuh
a kuaihtansak hi.#Pai 9:22-25.
34Amah kampau a,
kauphete le tangngolte,
simzawh lohin hong pai uh a,
35gam sunga kung khempeuh,
amau’ leitang panin a gah khempeuh
a nektumsak mang hi.#Pai 10:12-15.
36Amau’ sung pan a piang masa
Egypt tacil khempeuh a satlum hi.#Pai 12:29.
37Tua ciangin amah in
ngun le kham tawh Israel-te
paikhiatpih a,
amaute a vekpi-in
cidamin thahat kim uh hi.
38Amaute a paikhiat ciangun
Egypt mite lungdam mahmah uh hi.
Bang hang hiam cih leh
amaute kihta uh hi.#Pai 12:33-36.
39Amaute a liah dingin
amah in meiipi kaisak a,
zanin khua muh nadingin
mei a omsak hi.#Pai 13:21-22.
40Amaute in ngen a,
vantung panin anlum tampi a pia hi.#Pai 16:2-15.
41Amah in suangpi hong a,
tui a phulkhia hi.
Guntui bangin
sehnel gamah tui a luang hi.#Pai 17:1-7; Gam 20:2-13.
42Bang hang hiam cih leh
a siangtho ama thuciamna le
ama nasem Abraham a phawk hi.
43Tua ahih ciangin
ama mite lungdamna tawh,
ama teel mite lasakna tawh
a paikhiatpih hi.
44-45Amaute in ama ngeina kipte zui-in,
ama thukhamte a neih theih nadingun,
amah in amaute tungah
minam dangte’ leitang pia a,
midangte’ nasepna gahte zong
amaute a ngahsak hi.
Topa phat un.#Josh 11:16-23.
Currently Selected:
Late 105: TDB
Highlight
Copy
Compare
Share
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.
