MATTHAI 24

Biakinn Siat ding Jesuh’n Genkhol

(Mrk 13:1-2; Luk 21:5-6)

1Biakinn panin Jesuh a paikhiat laitakin ama kiangah a nungzuite hong pai-in, tua biakinn a thupina zia a lak uh hi. 2Ahi zongin Jesuh in amaute kiangah, “Hihte khempeuh na mu khinta uh hi. Ke’n a mantak a kong genin-ah: Hih inn lamna-a a kiciang suangte a kithuapin a om nangawn a om nawn lo zah dongin kilawnkeek mang ding hi,” ci-in a dawng hi.

Gimna Kipatna

(Mrk 13:3-13; Luk 21:7-19)

3Oliv Mual tungah Jesuh tu-in a om laitakin a nungzuite guak a tuamin hong pai uh a, “Hih thute cik ciangin hong piang ding a, nang na hong pai ding hun le hun bei nading bang lim hong om ding ahi hiam, hong gen in,” a ci uh hi. 4Jesuh in amaute kiangah, “Kidawm unla, mite’ khemsa-in ta kei un. 5Bang hang hiam cih leh keimah a kineih mi tampi hong pai ding a, ‘Kei, Khrih ka hi hi,’ ci-in mi tampi tak umkhialsak ding uh hi. 6A nai, a gamla-ah galkidona thu na za ding uh hi. Hihte a piang mah ding hi a, ahi zongin a bei nading hi nai lo ahih manin patau kei un. 7Gam khat le gam khat, kumpi khat le kumpi khat hong kido ding a, mun tuamtuamah kialpi hong tungin, zin hong ling ding hi. 8Hihte khempeuh pen gimna kipat nading hi pan hi.

9“Tua ciangin note hong kibawlsia-in hong kithat ding a, keima hangin Gentail mi khempeuh in note hong mudah ding uh hi.#Mat 10:22. 10Tua hun ciangin mi tampi in a upna uh khahsuah ding a, khatlekhat kimudahin khatlekhat kilehhek ding uh hi. 11Kamsang kineihkhem mi tampi hong piang ding a, mi tampi tak umkhialsak ding uh hi. 12Gitlohna khang mahmah ding ahih manin ki-itna hong kiam ding hi. 13Ahi zongin a bei dongin a thuakzote in hotkhiatna ngah ding uh hi.#Mat 10:22. 14Tua ciangin mi khempeuh tungah teci ahi dingin Pasian’ hong ukna hangin a lungdamhuai thu, leitung khempeuhah kihilh ding hi. Tua khit ciangin beina hong tung ding hi.

Gimna Lianpi

(Mrk 13:14-23; Luk 21:20-24)

15“Tua ciangin kamsang Daniel in, ‘A lipkhaphuai zehphitna,’ ci-in a gen pen a siangtho munah hong om ciangin (hih lai a simte in Jesuh’ cihnopna thei ta un),#Dan 9:27; 11:31; 12:11. 16Judea gam a om mite, mualtungah tai hen la, 17inn tungah a om mite zong, inn sungah van a la dingin lut nawn kei uh hen. 18Lo-ah a omte zong puan la dingin inn-ah ciah nawn kei hen.#Luk 17:31. 19Tua hun laitakin naupaiite le naungek neite a dingin haksa mahmah ding hi. 20Tua galtai hun pen phalbi laitak le Sabbath ni ahih khak loh nadingin thu na ngen un. 21Bang hang hiam cih leh leitung piancil a kipan tuhun dong, cikmahin tua bang haksatna a om ngei lo, nidang ciangin zong a om ngei nawn lo ding, tua hun laitakin hong tung ding hi.#Dan 12:1; Mang 7:14. 22Pasian in tua gimna hun a ni khiam lo hileh a suaktazo kuamah om lo ding hi. Ahi zongin ama teel mite a khualna-in a ni a khiam ding hi.

23“Tua laitakin mi khatpeuh in, ‘Hih lai-ah Khrih om hi, hua lai-ah Khrih om hi,’ ci-in hong gen leh, um kei un. 24Bang hang hiam cih leh Khrih a kineihkhemte le kamsang a kineihkhemte hong piang ding a, ahih zawh leh a teelsa mite nangawn a khem nadingun lim le nalamdang lianpipi hong bawl ding uh hi. 25A hun ma-in hong genkholkhin ka hih manin limtakin kidawm un.

26“Tua ahih kei leh zong mite in, ‘Gamlakah Khrih om hi,’ hong cih leh zong va paikha kei un. ‘Innsungah Khrih bu hi,’ hong cih leh zong umkha kei un. 27Bang hang hiam cih leh Mihing Tapa hong pai ciangin khuaphialep in van mong khat panin mong khat dong a taanzaihsak mah bangin kitheikim ding hi.#Luk 17:23-24.

28“Sapul omna peuhah musane kikaikhawm ding hi.”#Luk 17:37.

Mihing Tapa Hong Paina

(Mrk 13:24-27; Luk 21:25-28)

29“Tua gimna hun a tunkhit phetin ni hong mialin kha hong taang nawn lo ding a, vantung panin aksite hong kia ding a, vantung a om nate a pai ngei-in pai thei loin lampialgawp ding hi.#Isa 13:10; 34:4; Ezk 32:7; Joel 2:10,31; 3:15; Mang 6:12-13. 30Tua ciangin Mihing Tapa’ lim vantungah hong kilang ding hi. Tua ciangin leitung minam khempeuh dahin kap ding uh a, vangliatna le minthanna tawh meii lakah Mihing Tapa a hong pai a mu ding uh hi.#Dan 7:13; Zek 12:10-14; Mang 1:7. 31Nakpi takin peengkul hong ging ding a, leitung mun khempeuhah a vantung mite hong paisakin, leimong khat pan mong khat dongin, a teelsa mite a kaikhawmsak ding hi.

Thei Kung’ Thuhilhna

(Mrk 13:28-31; Luk 21:29-33)

32Thei kung tung panin thu phawk un. Thei a hiang hong meengin a teh hong no ciangin khuakhal hun hong naita hi, ci-in na thei uh hi. 33Tua mah bangin hih ka thugente khempeuh na muh uh ciangin Mihing Tapa hong tun ding hun hong nai mahmah ta hi, ci-in na thei un. 34A mantak a kong genin-ah: Hih lai-a a om mite a sihkhit ma-in hih ka thugen khempeuh hong tung ding hi. 35Van le lei a maimang zongin ka thugente maimang ngei lo ding hi.

A Ni le A Nai Hun Kuamah’n Thei lo

(Mrk 13:32-37; Luk 17:26-30,34-36)

36Ahi zongin a ni le a nai hun ding pen kuamah in thei lo hi. Vantungah a om vantung mite ahi a, Tapa nangawn in ahi zongin thei lo a, Pa Pasian bek in thei hi. 37Noah hun lai-in up hun lohpi khatin tuiciin a tun bangin Mihing Tapa zong up hun lohpi khatin hong pai ding hi.#Pian 6:5-8. 38Tuiciin a tun ma hunin, teembaw sungah Noah a tum ni hun ciang dong, mite in anne zune-in om uh a, mo kipi, mo kikha-in nuntak ngeina bangin om uh hi. 39Tuiciin hong tungin tui in mi khempeuh a tupcip hun ciang dong, kuamah in bangmah a theih loh mah bangin Mihing Tapa hong pai ciangin zong kuamah in theikhol lo ding uh hi.#Pian 7:6-24. 40Tua hun laitakin lo a kuankhawm mi nih, khat kila-in khat kinusia ding hi. 41An a sukhawm numei nih, khat kila-in khat kinusia ding hi. 42Tua ahih ciangin bang hunin na Topa uh hong pai ding cih thei lo na hih manun na pilvang un. 43Ahi zongin na phawk ding uh thu in: Inn nei pa in zan laitakin guta pa a pai ding hun theikhol leh amah in na pangin a inn luhsak lo ding hi. 44Tua ahih manin Mihing Tapa zong, note’ upmawh loh hun laitakin hong pai ding ahih manin note zong na kiging tawntung ta un.#Luk 12:39-40.

A Citak le A Citak lo Nasem

(Luk 12:41-48)

45“A pil a citak nasem i cih a bangcite ahi hiam? A naseppih dangte ukin a hun manmanin amaute’ nekzah ding ciat an a pia dingin a topa in a seh a nasempa ahi hi. 46A topa hong ciah ciangin ama sawl bangin na semin a om a muhpa pen mi hampha mahmah khat ahi hi. 47Ke’n kong genin-ah, ama neihsa khempeuh a uk dingin a topa in tua nasempa a koih ding hi. 48Ahi zongin tua nasempa nasem hoih lo hi hen la, a lungsim sungah, ‘Ka topa hong ciahhak ding hi,’ ci-in, 49a naseppih a lawmte satgawp hen la, zukham thei mite tawh anne zune-in na om leh, 50a topa tung dingin a uploh ni hun khatpeuhin a topa hong tung ding a, 51a topa in nakpitakin gim pia-in, mihoih a kineihkhemte’ gimthuak dingteng thuaksak ding a, amah kapin a hagawi ding hi.

Currently Selected:

MATTHAI 24: TDB

Highlight

Copy