2 TIMOTI NIHNA 4

1Pasian’ mai, le a hingte hitaleh a site hitaleh mi khempeuh’ thu a khen ding Khrih Jesuh’ mai-ah nakpitakin ka hong hanthawn hi. Amah Kumpi-in hong paikikin ukna hong kipan ding ahih manin, 2hunhoih hunsia cih khen tuan loin Pasian’ thu hilh ding na kin ngaihsut nading, lungduaina tawh mite’ lungsim zo-in, mite taii-in, hanthawnin na hilh nadingin thu a hong pia ka hi hi. 3Mite in thuman a ngaih nop loh hun, amaute’ deihna bek a zuihnop hun, amaute’ zaknop thute bek a gen ding sia a cial thuahthuah hun hong tung ding hi. 4Amaute in thuman thutak ngainuam nawn loin tangthu phuahtawm peuh ngaihsutpi-in nei ding uh hi. 5Ahi zongin nang na hih leh thu khempeuhah na lungsim ki-ukin haksatnate na thuak inla, Pasian’ thugen nasep semin, na nasepna-ah maa na tun in.

6Kei ka hih leh Pasian biakna-in hong kipiak ding hun hong tungta hi. Hih leitung nuntakna ka nusiat ding hun hita hi. 7Kidemna-ah ka hat tawpin ka hih khin a, a mong dongin ka tai khin a, upna thu khotakin lenin ka zokhin hi. 8Thu a manin a khen Topa in tua Ni ciangin kei a hong piak ding thuman lukhu ahi gualzawhna thaman in tu-in kei hong ngak gige hi. Kei tung bekah a hong pia ding hi lo a, ama hong paikik ding itna tawh a ngakte khempeuh tungah zong a pia ding ahi hi.

Pumpi tung Thugenna

9Kei kiangah na hong pai baih theih nadingin hong hanciam in. 10Demas in hih leitung thu kinzaw ahih manin kei hong nusia-in Thesalonika khua-ah a pai hi. Kresen, Galatia gamah pai a, Titus, Dalmatia gamah pai hi.#Kol 4:14; File 24; 2Kor 8:23; Gal 2:3; Tit 1:4. 11Luka bek kei kiangah om hi. Marka in nasepna-ah nakpitakin hong huhthei ahih manin na hong pai ciangin amah hong tonpih in.#Kol 4:10,14; File 24; Sawl 12:12,25; 13:13; 15:37-39. 12Tikhikas ahihleh Efesa khua-ah ka paisak khin hi.#Sawl 20:4; Efe 6:21-22; Kol 4:7-8. 13Na hong pai ciangin Troas khua-ah Karpas kianga ka nusiat ka puantualpi hong pua inla, laibute zong, a diakdiakin savun laidalte tawh zong hong pua in.#Sawl 20:6. 14Sikseekpa Alexander in kei tungah siatna lianpi hong bawl hi. Ama gamtatna tawh kizui-in Topa in thuk ding hi.#1Tim 1:20; La 62:12; Rom 2:6. 15Amah in i thuhilhna nakpitakin nial ahih manin amah tawh kisai-ah nangma pumpi kidawm mahmah in. 16Keimah kihut nading thu ka gen masak ni-in kuamah in hong koppih loin hong taisanmang uh hi. Tua thu hangin mawhsakna thuak kei beek uh hen! 17Ahi zongin Topa in kei hong ompih a, Gentail mi khempeuh tungah Pasian’ thu a kicingin ka gentheih nadingin thahatna a hong pia hi. Tua ahih manin sih nading thukhenna pan hong suaktasak hi. 18Topa in siatna khempeuh panin kei hong honkhia ding a, ama vantung gamah muanhuai takin hong tunpih ding hi. Amah in a tawntungin minthanna ngah tahen. Amen.

Vaikhakna

19Prisilla, Aquila, le Onesiforas-te innkuan na hopihsak in.#Sawl 18:2; 2Tim 1:16-17. 20Erastas, Korin khua-ah omlai hi. Trofimas, Miletas khua-ah a cina-in ka nusia hi.#Sawl 19:22; Rom 16:23; Sawl 20:4; 21:29. 21Phalbi tunma-in nong pai theih nadingin hong hanciam in. Eubulas, Pudens, Linas, Klaudias, le i sanggam dangte khempeuh in zong hong hopih uh hi.

22Topa in nangmah hong ompih tahen. Note khempeuh tungah Pasian’ hehpihna thupha hong tung tahen.

Currently Selected:

2 TIMOTI NIHNA 4: TDB

Highlight

Copy