2 TIMOTI NIHNA 3

Nitawp Ni Huna Mihing Pianzia

1Nitawp ni hun pen a lauhuai hun ahih ding lamtak phawk in. 2Tuahun ciangin mite in amau angsung ding bek ngaihsunin, huaihamin, kisialin, kihisakin, mi zahko-in, nu le pate’ thu mang loin, lungdam theihna mel nei loin, biakna lungsim nei loin, 3mi khual loin, hehpihna nei loin, mi gensia-in, ngongtatin, kihtakhuai-in, thuhoih deih loin, 4ciampelin, thu khual loin, kiphasak gawpin, Pasian don loin pumpi nopsakna bek deihin, 5biakna thu a puathamteng zui napi-in biakna hangin vangliatna thu a omte deih lo ding uh hi. Tua bangin a gamta mite na pelh in. 6Tua bang mite pawlkhat, mite inn-ah va hawh khiankhianin, deihna nam tuamtuam le mawhna lungsim tawh a kidim numeite na thuzawh uh hi. 7Tua bang numeite in thu a zakzak uh hangin a man le a man lo khen thei lo uh ahih manin thuman thutak thei zo lo uh hi. 8Jannes le Jambres-te in Moses thu a nial mah bangin upna paizia a man lo hih thuhilh mite in zong thuman thutak a nial uh hi.#Pai 7:11. 9Ahi zongin Jannes le Jambres-te tungah a piangsa thu mah bangin mi khempeuh in amaute’ haina mu ding uh ahih manin a nasepna uh sau tung khollo ding hi.

Paul in Timoti A Hanthot Tawpna

10Ahi zongin nangmah in ahihleh ka thuhilhna, ka gamtatna, le ka nuntakna-ah ka ngim ka tup thute na hong zui hi. Ka upna, ka lungduaina, itna ka neihna, ka lungkipna, 11bawlsiatna ka thuakna, gimna ka thuakna, le Antiok, Ikonium, le Lystra khuate-ah kei tunga thupiang, nasia takin bawlsiatna ka thuaknate na theih na phawksa ahi hi. Ahi zongin Topa in hih haksatnate khempeuh panin kei hong suaktasak hi.#Sawl 13:14-52; 14:1-20. 12Khrih Jesuh tawh kipawlin Pasian’ deihna bangin a nungta nuam khempeuh in bawlsiatna a thuak ding mah hi a, 13migilote le thuthei kineihin mi khem theite zong siattat semsemin, amaute in mi khemkhemin, amaute mah in zong khemna a thuak ding mah uh ahi hi. 14Ahi zongin nang na hih leh na theihsa na upsa thute ah kip paisuak in. Nang tungah thu hong hilhte kua mi ahi hiam cih na theihsa hi a, 15Khrih Jesuh upna hangin hotkhiatna a hong ngahsak thei ding pilna a hong pia Lai Siangtho pen na neutung a kipanin a theisa na hihna thu zong na theihsa thu mah ahi hi. 16-17Pasian’ na a sem mite mi cingtaak hi-in, na hoih namkim a septheih nadingun Lai Siangtho pen Pasian’ lamlahna tawh a hong kipia hi a, thuman thutak hilh nading, a khialte taii nading, a man lote a manin puah nading, a manin nuntak theih nading thuhilh nadingin a manpha mahmah ahi hi.

Currently Selected:

2 TIMOTI NIHNA 3: TDB

Highlight

Copy