रोमि 16
16
पावालङा ओसाइबाचि बाबा लोडुचिगा
1हाट्ले आङा ना चिट्ठिलाम्मा फिबिलोक् चिना पारचि चोक्नाबिनाँनि॥ उन् किंकिरिया खालाङ्गाङिना माङ्पाङ्ङि सेवा काचोक् आनि बिस्वासि मेन्झेमा झान्झा ए॥ 2उन् खानिङि आप्नाँ टाङ्बा उनिङ्ङि बिस्वासि झान्झा गाड्डे स्वागाट् चोगानुम् नुङ् लोनाँनि, पोङ्भोने नाड्डे चोक्माम्बाक् बिस्वासिचि लाउङ्सा ओचेट्नुयुक्॥ हिट्नुङ् खानिङा उन् जे सुके चाहाब् लिचा घुवार फाडानुम्, पोङ्भोने उन्ङा आरु जोम् याप्मिचि घुवार फासुएसुचे, हिट्नुङ् आङा चा घुवार याङ्फाडेसे॥
3आङालोक् एक्केउ खिरिस्ट येसुङाना टोॽवा काचोक्चि पिरिस्किला हिट्नुङ् आकिलासलाउङ्सा आङाना बाबा ए नुङ् लोडानुम्चिम्॥#मुलिचेला टोॽवा १८:२ 4आङा जोगाँ चोक्मा लोङ्सा हिट्नागाचि सिमा चा टेयार लिसाचे॥ हिड्डेउङ् आङा हिट्नागाचि पोए-पोए पिडुङ्चिङ्चिङ्, हिट्नुङ् आङा एडोक् माखाक् सोब्बे पानिछोङ्बाचिगा माङ्पाङ्ङिगाँ चा पोए-पोए उपिडुचिचि॥ 5हिट्नुङ् उन्चि पाङ्ङि उछुम्गा माङ्पाङ्ङिगा लाउङ्सा चा आङाना बाबा ए नुङ् लोडानुम्चिम्॥
मायालु आसाइबा इपेनितास चा बाबा लोडानुम्॥ एसिया छेट्राङि सोब्बे नुङ्ना पाइले खिरिस्टङि बिस्वास काचोक् याप्मि उन् डोक् ए॥ 6मारियाम चा बाबा याङ्लोडाबिडानि॥ उन्ङा खानि घुवार फामा लोङ्सा लेन्सेन् टोॽवा चोगुए॥ 7हिट्नुङ् एन्डरोनिकास हिट्नुङ् युनियास#१६:७ युनियास युनियासउम्बाक् मेन्झेमा ए॥लाउङ्सा चा बाबा ए याङ्लोडाबिडानि॥ हिट्नागाचि आङालोक् एक्केउ खाम्बाङ्ङि ठायाचिगा याहुदि आसाइबाचि ए॥ हिट्नागाचि सोब्बे मुलिचेलाचिङा मान् ओचोगुचिगा ए, हिट्नुङ् हिट्नागाचिङा आङा बिस्वास चोक्मा पाइले डोक् खिरिस्टङि बिस्वास चोगेसाचुगा ए॥
8टाङ्बाङि बिस्वास काचोक् मायालु आसाइबा एम्प्लिआतसलाउङ्सा चा बाबा याङ्लोडाबिडानि॥ 9खिरिस्ट लोङ्सा आनिलोक् एक्केउ टोॽवा काचोक् मायालु आसाइबा उरबानास बाबा याङ्लोडाबिडानि, हिट्नुङ् मायालु आसाइबा इस्ताखुसलाउङ्सा चा बाबा याङ्लोडाबिडानि॥ 10आपेल्लेसलाउङ्सा चा आङाना बाबा लोडानुम् ए, उन्ङा आप्ठेरो बेलाङि चा खिरिस्टङि उन्ङाना बिस्वास छेम्बाना ए नुङ् पारमान् चोगुए॥ हिट्नुङ् आरिस्तोबुलास ओपाङ्ङिगा ख्वाप्पालाउङ्सा चा बाबा याङ्लोडाबिडानि॥ 11याहुदि आसाइबा हेरोदियान चा बाबा याङ्लोडाबिडानि॥ हिट्नुङ् टाङ्बाङि बिस्वास ओचोगुगा नारकिसास ओपाङ्ङिगा ख्वाप्पालाउङ्सा चा बाबा याङ्लोडाबिडानि॥
12टुरफेना हिट्नुङ् टोरफोसालाउङ्सा बाबा याङ्लोडाबिडानि॥ नागाचि मेन्झेमाचिङा मिहिनेत चोक्चुङ् टाङ्बाङाना टोॽवा चोक्चुगा॥ हिट्नुङ् मायालु पारसिस चा बाबा याङ्लोडाबिडानि, ना मेन्झेमाङा चा आड्डिक् मिहिनेत चोगुङ् टाङ्बाङाना टोॽवा चोगुगा॥ 13टाङ्बाङाना सेवा चोक्मा निङ्ला मुक्टाना रुफास हिट्नुङ् आङा चा आमा गाड्डे डोक् मिट्टुङ्ना उमालाउङ्सा बाबा याङ्लोडाबिडानि॥ 14हिट्नुङ् आसिंकिरतास, फ्लेगान, हारमेस, पाटरोबास, हारमास, हिट्नुङ् उन्चिलोक् उलिसागा सोब्बे बिस्वासि भुम्भु-झान्झा हिट्नुङ् आनो-आन्झोचिलाउङ्सा चा आङाना बाबा याङ्लोडाबिडानि॥ 15फिलोलोगास, युलिया, नेरियास हिट्नुङ् मेन्झेमा उन्झा, हिट्नुङ् ओलिम्पास, हिट्नुङ् उन्चिलोक् ओवाहेट्गा ख्वाप्पा माङ्हाङ् ओयाप्मिचिलाउङ्सा आङाना बाबा याङ्लोडाबिडानि॥
16ठिबाङ्ङा आरको माया चोक्सा बाबा चोग्गा चोक् चोगानि, हिट्नुङ् खिरिस्टङि बिस्वास काचोक् माङ्पाङ्ङिगा सोब्बेङा खानि बाबा माहाक्टिएसिए॥
आखेरि साल्लाह
17आम्भु-आन्झाचि हिट्नुङ् आनो-आन्झाचि, हाट्ले आङा खानि एक्खेप् बिन्टि चोक्नाँनि॥ खानिङा पाइले सिकाँ आलिसिगा छेम्बाना रिङ् बिरुद्दाङि उलिसागा याप्मिचिलाम्मा ओछेक्छेक् चोगानि॥ नागा याप्मिचिङा खानिङि साम्माना रिङ् ओटाडुटु हिट्नुङ् इम्टेप्मा याप्मिचिगा बिस्वास डोक् आरकोलेङ् ओलेङ्सुटु॥ हिट्डेउङ् हिट्नागा याप्मिचिलोक् या युङानि॥ 18पोङ्भोने नाड्डेगा याप्मिचिङा आनि टाङ्बा खिरिस्टङाना टोॽवा ओचोगुन्गा, टरो हिट्नागाँ उन्चि निङ्ग्वाङिगा रिङ् युमा एडोक् निङ्ग्वा ओचोगुगा॥ हिट्नागा याप्मिचिङा नुगा नुगा रिङ् ओमाट्टुङ् मोक्खाक् ओचोगुचिउङ् सोजो याप्मिचि उसुबुचिगा॥ 19खानिङा खिरिस्टङाना आग्याँ पालान् आचोगुम्ना रिङ् सोब्बेङा ओखेम्सुएसुए, हिड्डेउङ् ना रिङ्ङा आङाना चा आड्डिक् आचाप् टाइसे॥ टरो खानिउम्बाक् ओचेट्नुना रिङ्ङि ठोना लिसाना लिमा कोन्युक् हिट्नुङ् ओचाफेन्ना रिङ्उम्बाक् चोक्मा नामा कोन्युक् नुङ् आङा निङ्ग्वा चोगुङ्टुङ्॥ 20हिट्नुङ् हाङ्हाङ् कापिबा माङ्हाङ्ङा एला डोक् सैतान उठुङ्ङि सासान् चोक्माना बोल् खानि मापिडिटि हिट्नुङ् हिट्ना जाखाम् चोगुटु॥ आनि टाङ्बा येसुङाना मायादाया खानिलोक् उलियाक्॥
21आङालोक् टोॽवा काचोक् तिमोथिङा खानि बाबा माहाक्टेसिए, हिट्नुङ् याहुदि आसाइबाचि लुकियास, यासोन हिट्नुङ् सोसिपाटरोसङा चा खानि सोब्बेलाउङ्सा बाबा माहाक्टेसिए॥
22आङा तारतियासङा चा टाङ्बा उनिङ्ङि खानि सोब्बेलाउङ्सा बाबा लोनाँनि॥ ना चिट्ठि पावालङा याङ्छेप्टाबिडा याङ्लोडाउङ् आङा तारतियासङा छेप्टुएट्टुङ्॥ 23गायासङा चा खानि बाबा माहाक्टिटि॥ आङा पावाल, गायास ओपाङ्ङि युङेसाङे, हिट्नुङ् ना ओपाङ्ङि डोक् माङ्पाङ्ङिगा बिस्वासिचि उछुम्गा ए॥ ना खालाङ्गाङिना कोटेरिबा इरास्तस हिट्नुङ् आनि झान्झा क्वारटासङा चा खानि बाबा मालोडेसिए॥#मुलिचेला टोॽवा १९:२९; १ कोरिन्थि १:१४; २ तिमोथि ४:२० 24[आनि टाङ्बा येसु खिरिस्टङाना मायादाया खानि सोब्बेलोक् उलियाक्॥ आमेन्॥]#१६:२४ इम्टेप्मा बाइबलङि ना २४ पोद वाइना॥
25आनि सोब्बेङा माङ्हाङ् उनिङ् चोन्डुम्॥ माङ्हाङ्ङा खानि बिस्वास बोल्लेउ चोक्मा हिडुटु॥ जुन् आङा पारचार चोगुएट्टुङ्ना येसु खिरिस्ट बारेङाना नुना खाबोरङा हिड्डे डोक् माट्टुटु॥ हिट्नुङ् ना नुना खाबोर माङ्हाङ्ङा याप्मा बारखालाम्मा ठोबुएसुना॥ 26टरो ना रिङ् माङ्काटाचिङा पाइले डोक् ओछेप्टुए, हाट्लेम्बाक् माङ्हाङ्ङा पारचिन्दा चोगुएसुए॥ हिट्नुङ् याप्मिचिङा उन् बिस्वास ओचोगुवाक् हिट्नुङ् पालान् ओचोगुवाक् नुङ् सोरोक् लियुयाक्ना माङ्हाङ्ङा ख्वाप्पा छोङ्बाचिङि ना नुना खाबोर पारचिन्दा चोक्मा आग्याँ चोगुए॥ 27सोब्बे थोक् निसुना माङ्हाङ् उन् एना ए॥ येसु खिरिस्टङा चोगुनाँ सोरोक् माङ्हाङ्ङाना उनिङ् टो-टो चोन्डुम्॥ आमेन्॥
Currently Selected:
रोमि 16: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
