रोमि 15
15
आरु यान्दा चोक्माना बारे
1आनि बिस्वास माङ्हाङ्ङि बोल्लेउ लिसिगाँ आप्पे आनि एडोक् चाप्टामा लिसिना रिङ् पुमा लिनिना, टरो बिस्वासङि निम्छारो उलिसागा याप्मिचि घुवार फामाचि कोन्युक्॥ 2आनि सोब्बेङा आनि टाक्लुङ्चिगा निङ्ग्वा खोना रिङ्ङा नुलोक् चोगुटुना हिट्ना रिङ् कोन्मा कोन्युक्, हिट्नुङ् बिस्वासङि बोल्लेउ लिमा घुवार फामाचि कोन्युक्॥ 3पोङ्भोने खिरिस्टङा चा उन् आप्पेलाउङ्सा हारका चोक्माना टोॽवा चोग्वाट्टुन्॥ धारमाछाप्लाङि नाड्डे छेप्टेसे, “माङ्हाङ्, खान् निन्दा काचोक् याप्मिचिङा आङा चा निन्दा याङ्ओचोगे॥”#छाम्लोमा छाप्ला ६९:९#१५:३ पोङ्भोने खिरिस्ट माङ्हाङ्ङाना सेवा चोक्मा हिङे, आप्पे लाउङ्सा माखाक्॥ हिट्नुङ् माङ्हाङ् ओचाफेन्लोक् ओलोडुगा याप्मिचिङा उन् चा ओचाफेन्लोक् ओलोडुटु॥ 4आच्छो बेला धारमाछाप्लाङि छेप्टागा सोब्बे रिङ्चि आनि हिसिक्मालाउङ्सा छेप्टागा डागा॥ धारमाछाप्लाङिना रिङ्ङा आङ्मा हिमाना साक्ति हिट्नुङ् आँट् आनि आपियुक्, हिट्डेउङ् माङ्हाङ्ङा चोगुना चामारसिङा युयुक् नुङ् आनि आसा चोक्मा हिडुम्टुम्॥ 5माङ्हाङ्ङा डोक् आनिलाउङ्सा आङ्मा हिमाना साक्ति लोक् आँट् आपियुक्॥ हिट्नुङ् खिरिस्ट येसुङाना उनिङ्ग्वा गाड्डे खानि सोब्बे ठिबाङ्ङा आरकोलोक् ठिक्ए निङ्ग्वाङि युङ्मा हिमाना बोल् उन्ङा खानि मापिड्याक् नुङ् आङा बिन्टि चोगुङ्टुङ्॥ 6नाड्डेउङ् खानि ख्वाप्पाङा ठिक्ए निङ्ग्वाङि ठिक्ए सोरा चोक्सा आनि टाङ्बा येसु खिरिस्टङाना माङ्हाङ् पाबा उनिङ् चोन्मा आहिडुम्टुम्॥
पानिछोङ्बाचि लोङ्सा नुना खाबोर
7हिड्डेउङ् खिरिस्टङा खानि मालाडि गाड्डे डोक् खानिङा चा ठिबाङ्ङा आरकोलाउङ्सा लाड्गा लाड्गा चोगानि॥ हिट्नाड्डेउङ् याप्मिचिङा माङ्हाङ्ङाना उनिङ् ओचोन्डुटु॥ 8आङा खानि ना रिङ् लोनाँनि, माङ्हाङ्ङा याहुदिचिगा टुबाठेबाचिलोक् चोगुना चामारसिङा छेम्बाना ए नुङ् निमेट्माउङ्सा खिरिस्ट याहुदिचिगा सेवा चोक्मा चाकार लिसाउङ् टाए॥ 9हिट्नुङ् पानिछोङ्बाचिङा चा माङ्हाङ् मान् ओचोगुवाक् नुङ् खिरिस्ट टाए, पोङ्भोने उन्ङा हिट्नागा चा दाया चोगुचिचि॥ धारमाछाप्लाङि नाड्डे छेप्टाइसे–
“हिट्नाड्डेउङ् आङा पानिछोङ्बाचि माझै कानिङ् टो-टो चोगुङ्टुङ्,
हिट्नुङ् आङा छाम्लोङा हिट्नुङ् कानिङ् चोन्डुङ्टुङ्॥”#२ सामुएल २२:५०; छाम्लोमा छाप्ला १८:४९
10हिट्नुङ् आरको ठोङ्ङि नाड्डे छेप्टाइसे,
“हाउ पानिछोङ्बाचि,
माङ्हाङ् ओयाप्मिचिलोक् आनान्दा चोगानि॥”#धारमाबिधि ३२:४३
11हिट्नुङ् आझै आरको ठोङ्ङि नाड्डे छेप्टेसे,
“खानि सोब्बे पानिछोङ्बाचिङा टाङ्बाङाना उनिङ् चोन्डानुम्,
हिट्नुङ् ख्वाप्पा छोङ्बा याप्मिचिङा उन्ङाना डोक् उनिङ् चोन्डानुम्॥”#छाम्लोमा छाप्ला ११७:१
12हिट्नुङ् आरको ठोङ्ङि माङ्काटा यासैयाङा नाड्डे छेप्टुटु,
“यिसैङाना उपुङ्लालाम्मा ठिबाङ् याप्मि टायुक्,
उन्ङा पानिछोङ्बाचि सासान् चोगुचिचि,
हिट्नागाँ उन्ङि आसा उयुङ्सुटु॥”#यासैया ११:१०
13खानि आसा कापिबा माङ्हाङ्ङा खानि निङ्ग्वाङि आड्डिक् आनान्दा हिट्नुङ् हाङ्हाङ् मापिडियाक् नुङ् आङा बिन्टि चोगुङ्टुङ्, पोङ्भोने खानिङा उन्ङि बिस्वास आचोगुएसुम्मे॥ नाड्डेउङ् सेङ्सेङ्ना हाङ्साङाना साक्तिलाम्मा खानिङि लिसाना आसा पोसा पोसा खाट्युक्॥
पावाल पानिछोङ्बाचिगा सेवा काचोक् लिसाना
14आम्भु-आन्झाचि हिट्नुङ् आनो-आन्झोचि, खानिङा याप्मिचि ओचेट्नुना चाट्ला आमेट्टुम्चिगा नुङ् आङा ठाहा टोगुङ्टुङ्॥ छेम्बा डोक्, खानिङा माङ्हाङ् बारेङि नुलोक् डोक् बुजा आचोगुएसुम्मे हिट्नुङ् ठिबाङ्ङा आरको हिसिक्मा आहिडुम्चिम्चिम् नुङ् आङा ठाहा टोगुङ्टुङ्॥ 15खानिङा आम्टेप्मा रिङ्चि मिट्टानुम् नुङ् खानिलाउङ्सा हिट्नागा रिङ् छेप्मा आङा इट्टुएसुङे॥ आङाना मुलि रिङ्उम्बाक् खानिङा हिट्नागा रिङ् मिट्टानुम् नुङ् ए, पोङ्भोने माङ्हाङ्ङा आङा याङ्पिडाना मायादायाङा, 16आङा पानिछोङ्बाचिलाउङ्सा माङ्हाङ्ङाना बारेङि ओचेट्नुना खाबोर पारचार चोगुङुङ् खिरिस्ट येसुङाना सेवा चोगुङ्टुङ्॥ नाड्डेउङ् पुजारिङा भेटि ठाङ्सु गाड्डे डोक् आङा चा हिट्नागा माङ्हाङ्ङाना उनिङ्ग्वा टासुना भेटि ठाङ्मा हिडुङ्टुङ्, पोङ्भोने सेङ्सेङ्ना हाङ्साङा हिट्नागा सेङ्सेङ्गा याप्मिचि चोगुएसुचे॥ 17हिट्नाडेउङ् माङ्हाङ् लोङ्सा आङा चोगुङ्ना टोॽवाङि खिरिस्ट येसुङा घुवार याङ्फाडानाँ आङा ठेलोक् चोक्मा हिङा॥ 18आङा पारचार चोगुङ्ना रिङ् हिट्नुङ् खिरिस्टङा आङालाम्मा चोगुना टोॽवाङाना कारानङा पानिछोङ्बाचिङा माङ्हाङ्ङि बिस्वास ओचोगुए हिट्नुङ् माङ्हाङ् उनिङ्ग्वा गाड्डे ओचोगुए॥ हाट्ले आङा ना रिङ् नुङ्ना माले आरु याप्मा रिङ् माट्टुङुङ् ठेलोक् लिमा आँट् चोक्निङ्ना, 19हिट्नुङ् हिट्नागाँ ठे-ठेगा चिन्नाचि हिट्नुङ् माङ्डोङ् ठोङ्डिगा टोॽवा सेङ्सेङ्ना हाङ्साङाना ओबोल्ङा चोगुना उनिसुएसुए॥ हिट्डेउङ् आङा खिरिस्टङाना बारेङि नुना खाबोर यरुसलेम नुङ् इल्लुरिकान छेट्राङिगा ख्वाप्पा ठोङ्ङि पारचार चोगुएसुङे॥ 20आङा आरु याप्मिचिङा ठालाँ ओचोगुना जाग्ङि पाङ् काचोक् गाड्डे आरुङा पारचार ओचोगुना ठोङ्ङि पारचार चोक्निङ्ना॥ टरो आङा आरुङा खिरिस्ट बारेङि ओखेम्सुन्गेट्टुन्ना नायाँ ठोङ्ङि एडोक् नुना खाबोर पारचार चोक्मा सोरोक् निङ्ग्वा चोगुङ्टुङ्॥ 21नाड्डेउङ् धारमाछाप्लाङि छेप्बालाक् रिङ् आङा पुरो चोक्मा कोलुङ्टुङ्,
“उन्ङाना बारेङि काइले चा ओलोडुन्गेट्टुन्चिन्गा याप्मिचिङा उन् उनिसुटु,
हिट्नुङ् उन्ङाना बारेङि काइले चा ओखेम्स्वाट्टुन्गा याप्मिचिङा ठाहा ओटोगुटु॥”#यासैया ५२:१५
22नाड्डेउङ् आङा खानि टुब्सिङा याप्मा खेप् आप्मा हिनिङ्गेट्निङ्, पोङ्भोने आङा याप्मिचिङा खिरिस्टङाना बारेङि ओखेम्सुन्गेट्टुन्गा आरु ठोङ्ङि पारचार चोक्ङा खाडाङे॥
पावालङा रोम खाप्मा योजाना चोगुटुटु
23टरो हाट्लेम्बाक् आङा नागा ठोङ्ङि पारचार चोक्माना टोॽवा लाट्मा हिडुएसुङे॥ हिट्नुङ् हाट्ले याप्मा बारखालाम्मा आङा खानिङि आप्माना निङ्ग्वा चोगुएसुङ्ना डाना॥ 24हिड्डेउङ् आङा इस्पेन खाट्ङाना बेला खानि टुब्सिङा होन्नाँ हिट्नुङ् हिट्नालाम् खाट्नाँ॥ हिट्नुङ् इम्टेप्मा बेला सोम्मा खानिलोक् युङ्ङा चा, हिट्नुङ् इस्पेन खाप्माउङ्सा खानिङा घुवार चा याङ्आफाडिटिङा नुङ् आसा चोगुएसुङे॥ 25-26टरो नाबाजिम्बाक् आङा यरुसलेम खालाङ्गा खाट्नागेट्नाँ॥ पोङ्भोने माकेडोनिया हिट्नुङ् आखैया छेट्राङिगा बिस्वासिचिङा यरुसलेमङिगा पाक्चा मालेगा बिस्वासिचिलाउङ्सा ओफाबा हाक्माचिगा निङ्ग्वा ओचोगुएसुए॥ हिड्डेउङ् हिट्ना ओफाबा खाट्टुङुङ् आङा यरुसलेमङि खाट्नाँ॥ 27हिट्नागा आप्पेङा डोक् यरुसलेमङिगा बिस्वासिचि घुवार फामा निङ्ग्वा ओचोगुएसुगा डागा॥ छेम्बा डोक्, हिट्नागाँ हिट्नागा घुवार फामाचि उन्चि टोॽवा डोक् ए, पोङ्भोने याहुदि बिस्वासिचिलाम्मा माङ्हाङ्ङाना बारेङि पानिछोङ्बाचिङा ओखेम्सुङ् आसिक् ओटोगुए॥ नाड्डेउङ् पानिछोङ्बाचिङा चा उन्चिलोक् लिसागा थोक्चि याहुदि बिस्वासिचि उपिडुचिउङ् घुवार फामाचि कोन्युक्॥ 28हिड्नाड्डेउङ् पाइले ना ओहाक्टुचिगा ओफाबा यरुसलेमङिगा बिस्वासिचि जिम्मा पिडुङ्चिङ्चिङ्, हिट्नुङुना आङा इस्पेनलेङ् खाट्नागेट्नाना बेला खानि टुब्सिङा आङा आप्ङा॥ 29आङा खानि सोरि आप्ङानाँ खिरिस्टङा आनि माङ्जोम् आसिक् आपियुक् नुङ् आङा ठाहा टोगुङ्टुङ्॥
30आम्भु-आन्झाचि हिट्नुङ् आनो-आन्झाचि, टाङ्बा येसु खिरिस्टङि आनि बिस्वास चोगुम्नाँ हिट्नुङ् सेङ्सेङ्ना हाङ्साङा आनि माया चोक्माना निङ्ग्वा आपिडानाँ, आङा लाउङ्सा माङ्हाङ्ङि बिन्टि ठाङ्सानुमुङ् आङाना याङ्छामाङि साहाभागि लिसानि नुङ् आङा खानि आनुरोध चोक्नाँनि॥ 31याहुदियाङि माङ्हाङ् बिस्वास चोक्मा ओटेन्निगा याप्मिचिलाम्मा माङ्हाङ्ङा जोगाँ याङ्ओचोक्याक् नुङ् बिन्टि याङ्चोगाबिडानि, हिट्नुङ् यरुसलेमङिगा बिस्वासिचि लाउङ्सा खाट्टुङ्गेट्टुङ्ना ना ओफाबा हिट्नागाँ ओलाडुङ् खुसि उलियाक् नुङ् बिन्टि याङ्चोगाबिडानि॥ 32हिट्नुङ् माङ्हाङ्ङाना उनिङ्ग्वा लिसे भोने, आनिङ्ग्वाङि हारका लिसा खानि सोरि आप्मा हिङा, हिट्नुङ् आनि एक्केउ टुबिनाँ आनि निङ्ग्वा हाङ्हाङ् लियुक्॥ 33हिट्नुङ् आनि हाङ्हाङ् आपिना माङ्हाङ् खानि ख्वाप्पालोक् उलियाक्॥ आमेन्॥
Currently Selected:
रोमि 15: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
