मुलिचेला टोॽवा 28
28
पावाल माल्टा टापुङि
1जब आन्याँ नुमानिङ् डोक् छेउङि होन्डिङे, हिट्नुङ् हिट्ना माल्टा टापु ओलोडुना रैछो नुङ् ठाहा टोगुम्मे॥ 2हिट्निगा याप्मिचिङा आन्याँ आड्डिक् लुक्मा याप्मि टुक्टे॥ हिट्ना बेला व्हेट् टामा ठालाँ चोगुए, हिट्नुङ् चुङ्ग्वासानाँ हिट्नागाँ मि उटुप्टुङ् हुङ्मा लोङ्सा याप्मि छेम्डाउङ् आन्याँ सोब्बे स्वागाट् याप्मिओचोगे॥ 3पावालङा सिङ्जेॽवाचि छुम्सुए हिट्नुङ् मिङि ठेन्डुए॥ मिङाना ओराप्ङा चोगुनाँ ठिक् ओप्पु होन्डाकाडे हिट्नुङ् उमुक्ङि रिगे॥ 4पावालङाना उमुक्ङि ओप्पु रिगाना हिट्निगा याप्मिचिङा उनिसुङ् हिट्नागा नाड्डे पिग्मा ठालाँ ओचोगे, “छेम्बा डोक्, ना याप्मिउम् याप्मि कासेट् रैछो॥ ना याप्मि सामुन्दरालाम्मा हिङाउङ् होन्डे, टरो न्याए काचोक्बा साम्माङ्ङाना साजाएलाम्मा होम्मा हिनिना॥” 5टरो पावालङा उमुक् ठाम्सुनाँ हिट्ना ओप्पु मिङि ठाए, हिट्नुङ् उन् पाक्चा लिनेट्नि॥ 6टरो हिट्निगा याप्मिचिङा “पावाल छोप्मोङ्ङा ओप्पुङाना बिखाङा होम्युङ् सियुक्” नुङ् उपुयुयाक्टुए॥ टरो होप्मो बेला लिसा चा उन् पाक्चा लिनेट्निना उनिसुङ् उन्चि निङ्ग्वा ओनोक्टुङ् नाड्डे उपिगे, “ना याप्मिउम्टे साम्माङ् गोलो रैछो॥”
7हिट्नि ठिबाङ् पाब्लियास उनिङ् लिसाना टापुङाना मुलि ओठेडोङ् डाना॥ हिट्नाङाना ओपाङ्ठाङ् हिट्नुङ् ओस्वाँरा हिट्ना डेन् याम्बा-नायाम्बा डोक् डाना॥ पाब्लियासङा आन्याँ ओपाङ्ङि याप्मि खाट्टे हिट्नुङ् ओचेट्नुलोक् याप्मि मेट्टे॥ आन्याँ सुम्बोक् लेम्बा सोम्मा ओपाङ्ङि पाहुना लिसिङाउङ् युङिङे॥ 8हिट्ना बेला पाब्लियासङाना उप्पा जोरो हिट्नुङ् रागाट् मासि लिसाउङ् टुगेएसाना॥ हिड्डेउङ् पावाल पाब्लियास उप्पा ठोम्सिङा खाडे, हिट्नुङ् हिट्ना टुगाना याप्मि उठुङ्ङि उमुक् युङ्सुङ् बिन्टि चोगुना उन् नुमानिङ् लिसे॥ 9नाड्डेउङ् टुगाना याप्मि नुयाना रिङ् याप्मिचिङा ओखेम्सुङ् हिट्ना टापुङि उलिसागा आरु उटुगागा याप्मिचि चा ओटाए हिट्नुङ् पावाललाम्मा सोब्बे उनुए॥ 10हिट्नागाँ जोम् थोक्चि याप्मि उपिडाउङ् आन्याँ मान् याप्मिओचोगे हिट्नुङ् आन्याँ लाम्टिमा बेला हिट्नागाँ आन्याँलोङ्सा लाम्बोङि चाहाब् लिगा टेप्मा माल्माट्टाचि चुवाखोङ्डाङ्ङि याप्मि ओठेन्डाबिडे॥
पावाल हिट्नुङ् आरु माल्टा टापुलाम्मा रोम ओखाडागा
11सुम्बोक् माइना ओएङ्स्वा, आन्याँ केप्छेरेॽवा साम्माङ् ओछेप्टुना चुवाखोङ्डाङ्ङि ठाङिङे हिट्नुङ् माल्टा टापु नाडुम्माउङ् खाडिङे॥ हिट्ना चुवाखोङ्डाङ् आलेक्जेन्डरिया खालाङ्गालाम्मा आबाउङ् चुङ्गुवामा बेला टेप् माल्टा टापुङि डोक् डाना॥ 12आन्याँ सुराकुसाइ ओलोडुना खालाङ्गा टासुम्मे हिट्नुङ् हिट्नि सुम्बोक् लेम्बा सोम्मा युङिङे॥ 13हिट्निलाम्मा आन्याँ लाम्टिइङे, हिट्नुङ् रेगियान ओलोडुना खालाङ्गाङि टासुम्मे॥ हान्डेङ्लेङ् दाछिनलाम्मा हिॽवा फेने, हिट्नुङ् छिङ्डेन् आन्याँ पोटिओलि ओलोडुना खालाङ्गाङि टासुम्मे॥ 14हिट्नि आन्याँ आम्टेप्मा बिस्वासि भुम्बु-झान्झाचि टुबुम्चिम्मे॥ हिट्नागाँ आन्याँ सि लेम्बा सोम्मा आन्याँलोक् युङानि नुङ् बिन्टि ओठाङ्सुए, हिट्नुङ् आन्याँ हिट्नि सि लेम्बा युङिङाउङ् रोम खालाङ्गा खाप्माना लाम्बो लाम्टिइङे॥ 15रोमङि उलिसागा बिस्वासि भुम्भु-झान्झाचिङा आन्याँ खाडिगेट्टिङा नुङ् ओखेम्सुङ् इम्टेप्मा आप्पियास खालाङ्गा हिट्नुङ् आम्टेप्मा सुम्बोक् पाटि ओलोडुना डेन्ङि आन्याँ टुब्सिङा ओआबे॥ पावालङा हिट्नागा निसुचिउङ् माङ्हाङ् पोए-पोए ठाङ्सुए हिट्नुङ् आँट् टोगुए॥
पावाल रोम खालाङ्गाङि
16आन्याँ रोमङि होन्डिटाइङे, हिट्नुङ् पावाललोङ्सा ठिबाङ् टिलिङ्गाङाना ओखाटान्ङि ओएकेले युङ्मा उपिडुए॥
17सुम्बोक् लेम्बा ओएङ्स्वा पावालङा रोमङिगा याहुदि ओठेडोङ्चि छेम्मा मेट्टुचे॥ हिट्नागा उछुमाउङ् पावालङा लोडुचे, “भुम्बु-झान्झाचि, आङा आनि याप्मिचि हिट्नुङ् आनिगा टुबाठेबाचिलाम्मा लिसाडागा रिति रिवाजङाना बिरुद्दाङि पाक्चा चोक्निङ्गेट्निङ्ना डाना॥ हिट्नुङ् चा याहुदि भुम्भु-झान्झाचिङा आङा यरुसलेमङि याङ्ओलाबाउङ् रोमि याप्मिचिगा मुक्ङि याङ्उपिडाङे॥ 18रोमिचिङा आङा खुलुक्-मुलुक् याङ्उसिलाप्टे हिट्नुङ् आङा सेप्मालोक् कोन्ना रिङ् पाक्चा उटुबुवाट्टुन्, हिट्नुङ् आङालोङ्सा लेप्माना निङ्ग्वा ओचोगुएसुना॥ 19टरो याहुदि भुम्भु-झान्झाचिङा आङाना बिरुद्दाङि फाट्टुर ओलाबाङे, हिट्नुङ् आङाना न्याए रोमि हाङ्ङा डोक् ओचोगु नुङ् बिन्टि ठाङ्मा आङा कारङि ठायाङे॥ टरो चा आङा आप्पे याहुदि भुम्भु-झान्झाचिगा बिरोधङि फाट्टुर लाब्माना पाक्चा रिङ् वाइना॥#मुलिचेला टोॽवा २५:११ 20हिट्डेउङ् खानिलोक् टुब्सिङा हिट्नुङ् रिङ्पान् चोक्ङा खानि नेहि छेम्नानिगा॥ पोङ्भोने आनि इस्राएलि याप्मिचिङा आसा युङ्सुम्ना काहिङ्मेप्बा डाङ्बा लोङ्सा डोक् आङा साङ्लाङा ओरेक्टाइसाङे॥”
21ना रिङ् ओखेम्सुङ् हिट्नागाँ ओलोडुए, “आन्याँ काबारेङि याहुदिया देसलाम्मा खोना चा चिट्ठि चा टोग्निम्गेट्निम्माना॥ हिट्नुङ् खोना भुम्बु-झान्झाचि ओटायाउङ् खान्ङा बिरुद्दाङि पाक्चा ओचाफेन्ना रिङ् ओमाट्टुन्गेट्टुन् हिट्नुङ् याप्मि ओलोनिगेट्निगा॥ 22टरो खान् पाक् आपिग्युक्ना, कानिङ्ग्वाङिना रिङ् आन्याँ खेम्मा कोलेट्टिङा, पोङ्भोने ना छुम्माङाना बिरुद्दाङि ख्वाप्पालेङ् मुक्टाना रिङ्बाक् आन्याँ ठाहा टोगुएसुम्मे॥”
23हिट्नुङ्ना हिट्नागाँ पावालङाना रिङ् खेम्मा लोङ्सा ठिक् लेम्बा ओसाम्डुए॥ हिट्ना ओसाम्डुना लेम्बा जोम् याप्मिचि पावाल युङाना डेरा पाङ्ङि ओटाए॥ पावालङा भेनिक्लाम्मा युसापाका सोम्मा माङ्हाङ् उमुलुक् बारेङि हिसिक्टुचे हिट्नुङ् मोसाङाना धारमाबिधि हिट्नुङ् माङ्काटाचिङा ओछेप्टुना बारेङाना रिङ् होट्टुङ् येसुङाना बारेङि लोडुचिउङ् बिस्वास चोगानुम् पिक्सा हिट्नागा लोडुचे॥ 24पावालङाना उरिङ् ओखेम्सुङ् इम्टेप्मा याप्मिचिङा बिस्वास ओचोगुए, इम्टेप्मा याप्मिचिङा बिस्वास ओचोग्वाट्टुन्॥ 25हिट्नुङ् हिट्नागा आ-आप्पे ओटोङ्नेएट्नि हिट्नुङ् हिट्निलाम्मा खाप्मा ठालाँ ओचोगुए॥ याप्मिचि खाप्मा टेयार उलिसाना बेला पावालङा आखेरि रिङ् लोडुचे, “सेङ्सेङ्ना हाङ्साङा खानि टुबाठेबाचि माङ्काटा यासैयालाम्मा नाड्डे लोडुचिगा रिङ् छेम्बा डोक् रैछो–
26‘नागा याप्मिचि सोरि खाडा हिट्नुङ् नाड्डे लोडुचि,
“खानिङा खेम्माउम् आखेम्सुम्टुम्, टरो खोना बेला चा बुजा आचोक्निम्ना॥
पुमाउम् आपुयुम्टुम्, टरो हिट्नाङाना उटुप् बुजा डोक् आचोक्निम्ना॥”
27पोङ्भोने नागा याप्मिचिगा निङ्ग्वा डोम्-डोम् लिसाइसे,
हिट्नुङ् हिट्नागा याङ्ओखेम्निगा उलिसाइसे,
हिट्नुङ् उन्चि मिक् डुम् ओचोगुएसुए॥
नाभाँम्टे हिट्नागाँ उनिसुए बे, ओखेम्सुए बे, हिट्नुङ् उन्चि निङ्ग्वाङा बुजा ओचोगुए बे॥
हिट्नुङ् हिट्नागाँ उन्चि निङ्ग्वा आङालेङ् उरिसुए बे,
हिट्नुङ् आङा हिट्नागा नुमानिङ् चोगुङ्चिङे बे॥’#यासैया ६:९-१०
28“हिट्डेउङ् हाट्ले खानिङा ठाहा टोगानुम्, माङ्हाङ्ङाना ना मुक्टिङाना खाबोर पानिछोङ्बाचि लोङ्सा पाङ्सुएसुए, हिट्नुङ् हिट्नागाँ ओखेम्सुटु॥”
29[पावालङा ना रिङ् खेम्मेट्टुचे हिट्नुङ् याहुदिचिङि उन्चि उन्चिङि खेमाबुङ्मा होन्डे हिट्नुङ् ओसेन्डे॥]#२८:२९ जोम् सोरोत बाइबलङि ना पोद वाइना आथाबा गिरिक्ङि॥
30हिट्नुङ् पावाल इप्पोक् बारखा सोम्मा भाडाङि लाडुना पाङ्ङि युङे॥ हिट्नुङ् उन् टुब्सिङा ओटायागा सोब्बे याप्मिचि स्वागाट् चोगुचे॥ 31पावालङा मिकेट्ङे माङ्हाङ् उमुलुक्ङाना पारचार चोगुए हिट्नुङ् टाङ्बा येसु खिरिस्टङाना बारेङि याप्मिचि हिसिक्टुचे हिट्नुङ् उन् साङा चा ओछाक्टुवाट्टुन्॥
Currently Selected:
मुलिचेला टोॽवा 28: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
