1 Korɛ̰t 5

Male kandɨ duroy ɨsɨna gɨŋ duroy Ka-Daye

1Kalaŋ nɔm yege gɨ yɔyɛ dan̰ gangɨ caygɨŋ na woy duroygɨŋ, ama hɨnga le, kalaŋ ga sɨlage Kumu gɨ cɨndi naŋ kalɨn̰ ma yɨyage dan̰ gangɨ cayge hɨn̰ wo̰ naŋ. Kɨya wa yege kɔldɨgɨŋ yen̰ge hɨn̰ ungo gɨ pɨna duroygɨŋ na or bɨrɨŋ male tam-bay. 2Bɨ kɨŋ ɨre nee gaŋ den̰ jorgiigɨŋ hal ƴee coŋ! Ungo gɨ lee hɨnga ga hɨn̰ wo̰ le, ojɨ gɨ kuduroy-hɔmɛ ni ləgɨŋ bɨ kɨŋ ni dorii duroygɨŋ coŋ. Ama kɨŋ laa hɨnga ga nee le naŋ. 3Gusɨnɨ hen̰ danagɨŋ, ama ɨrɨmenɨ na woy danagɨŋ pɨna. Ɨŋ-bandi na, ɨŋ boy kɔl a cay ungo gɨ ba lɔɔ hɨnga ga hɨn̰ wo̰ le, hɨn̰ gɨ ɨŋ na woy danagɨŋ wo̰ ɨni. 4Kɨɗɨn̰ ga kɨŋ na daydaŋ dan̰ guson̰ Ba-gulondɨna Jesu-Kɨris bɨ, dɔnɔ toy na ba duroygɨŋ bɨ na, ɨrɨmenɨ bugoŋ danagɨŋ pɨna kɨɗɨn̰ dayaŋ ga nee gaŋ le. 5Tɨwado di nee dɨŋ le, dɨragɨŋ ungo gɨ nee le duroygɨŋ coŋ, dibiigɨŋ bɨn̰ Sidan. Ɗe gɨye-lɔɔ kuyoŋdi-gusi mundoŋ ama turnoyi way pɔɗɛ a boy wɔlɛ gɨ Ba-gulɔŋ kɨya jɨga.

6Hɨnga ga kɨŋ ba de jorgiigɨŋ koldɨge le, na hɨnga ga kuɗa naŋ. Subugu di mapa di dḛ wo̰ le, lee gɨ kɨrbaŋdi gɛmɛ gɨ woŋsi sodɨ nɔm le kɛɛ, kɨŋ sɨla naŋ ga? 7Subugudi mapa di ɨlgɨ ɨni gɨ na ɨsɨna le, dɨragɨŋ duroygɨŋ coŋ ɗe agɨŋ bɨlɨn̰ kalaŋ ga duroŋ mɨra. Kɨɗɨn̰ ga nee le, kɨŋ kɨya wɔyɛ gɨlɨn̰a hɨn̰ kɨrbaŋdi gɛmɛ gɨ woŋsi gɨ hɨrɨwa gɨ dɨbɨge subugu nee naŋ wo̰, kɨya wa Kɨris gɨ na karɨn̰ dɨmangɨ da Pakɨ tona le, diɗiige ɨni. 8Naa hɨn̰ wo̰ na, ɗa gɨ ana leegɨŋ kɨdɨrɛ gɨ ni Pakɨ dan̰ subugudi mapa di ɨlgɨ ɨni naŋ. Kɨya wa subugu di ɨlgɨ ɨni le, na kuduroy-ɨndɨwa bɨ, terɨn̰ bɨ. Ama ɗa gɨ na leegɨŋ kɨdɨrɛ gɨ ni Pakɨ dan̰ mapa gɨ leege dɨle dɨbe subugudi mapa duroy nee gɨ na dɔrɛ mɨra bɨ, kɔl gɨ cɨndi bɨ.

9Magtubu di ɨŋ wal tumɔ bɨgɨŋ le ɨŋ yəgɨŋ kɔl duroy nee hɨn̰: «Kɨŋ ɗɔɔ ba ɔrɛ gusi ka-lɔɔ gɨye yɔyɛ gɨ toy kan̰di kan̰di.» 10Ama kalaŋ ga ɨŋ gey gɨ kɨŋ na gɨ ɔrɛ gusɨge naŋ le, kɛ na kalaŋ ga a cay gɨsəŋ gaŋ nɔm ga ka-lɔɔ gɨye yɔyɛ gɨ toy kan̰di kan̰di bɨ, ka-lɔɔ tabɨlaŋdi hɨnga bɨ, ka-hase bɨ, ka-n̰ɨre kula bɨ ga? Naŋ. Kɨya wa tumɔ naa hɨn̰ wo̰ na, ojɨ gɨ kɨŋ ni kɨya ɗɔɔ cay gɨsəŋ coŋ ɔrɛ sɔmɛ kɨɗɨn̰ ga ɗaŋ gaŋ. 11Ɨŋ’ɨ̰, magtubu di ɨŋ wal bɨgɨŋ le ojɨ na cay kalaŋ ga kan teege naa karmɨni, ama bɨlege na ka-lɔɔ gɨye yɔyɛ gɨ toy kan̰di kan̰di, wala dan̰ ka-orɨn̰ dan̰ tabɨlaŋ di hɨnga, wala ka-n̰ɨre kula, wala ka-pɔyɛ kɔl, wala ka-kɔyɛ cɛrɛ, wala ka-hase. Kalaŋ ga hɨn̰ wo̰ le, kɨŋ ɗɔɔ ba ɔrɛ gusɨge. Hɨnga ga ni dɔɔ kalɨn̰ ma, kɨŋ ɗɔɔ ba dɔɔ danage.

12Kɨya wa bɔyɛ kɔl a cay kalaŋ ga doŋ le, na kɔl hɨnge naŋ. Kɛ, kan ga kɨŋ kɨya bɔyɛ kɔl cayge le, na kan ga a duroygɨŋ naŋ ga? 13Kan ga a doŋ le, na Kumu ba kɨya bɔyɛ kɔl cayge. Dɨragɨŋ kalaŋ ga ka-kuduroy-ɨndɨwa duroygɨŋ coŋ.

Currently Selected:

1 Korɛ̰t 5: gab

Highlight

Copy

Compare