1 Korɛ̰t 6

Orɨn̰gɨŋ dan̰ kɔl kogɨŋ tumoy ka-aye kudurɔ naŋ naŋ

1Kɛ, na mɨna ma kɔl na wɨya duroygɨŋ na, kɨŋ orɨn̰ na tumoy kalaŋ ga doŋ dɨm ma na bɨyage kɔl cay nee, ama na tumoyi kalaŋ ga wɨyage dan̰ cɨndɨge naŋ ga? 2Kalaŋ ga woyge dan̰ cɨndɨge le kɨya bɔyege kɔl a cay kalaŋ ga cay gɨsəŋ gaŋ le kɛɛ, kɨŋ sɨla hɨn̰ wo̰ naŋ ga? Ama hɨn̰ gɨ naa kɨŋ-gandi naa ba kɨya bɔyɛ kɔl cay kalaŋ ga a cay gɨsəŋ gaŋ na, karɨn̰ kɔl ga n̰ən̰əŋ le kɨŋ ɓala bɔyɛ naŋ ga? 3Na kɨya bɔyɛ kɔl a cay ka-ƴɔbɛ ga daa le kɛɛ, kɨŋ sɨla hɨn̰ wo̰ naŋ ga? Ma kɛ na mɨna ma hɨnga ga a cay gɨsəŋ gaŋ dɨm ma mana gɨ ɓale bɔyɛgɨŋ kɔl cay nee naŋ ga? 4Ma hɨn̰ gɨ kɨŋ na ɨran̰ dan̰ karɨn̰ kɔl ga hɨn̰ wo̰ na, na kalaŋ ga Ka-Daye sɨlage laan̰ hɨnga naŋ cɨndɨge ma magɨŋ ɗege ka-bɔyɛ kɔl kagɨŋ le ga? 5Ɨŋ yəgɨŋ hɨn̰ wo̰ na kɨya dɨbɨn̰ dasi caygɨŋ. Ungo pɨna wo̰ duroygɨŋ gɨ ba cɨn̰-muɗɔlɛ gɨ kɨya ɓale bɔyɛ kɔl gɨ da ka-karme unɔ duroygɨŋ bɨrɨŋ ga? 6Lee gɨ ka-karme orɨn̰ge dan̰ kɔl koge na tumoyi ka-aye kudurɔ naŋ.

7Leen̰ cɨndi na kɔl gɨ woy duroygɨŋ le, gɨl doŋ gɨ kɨŋ naa kalaŋ ga gabaŋ ɨni. Na kɨya wa ma magɨŋ ƴɨma kuduroygɨŋ kɨya cay hɨnga ga dan̰ gɨyəŋdɨge naŋ gɨ kalaŋ leege danagɨŋ le naŋ ga? Na kɨya wa ma magɨŋ ɗa gɨ kan buɗa hɨnga kagɨŋ naŋ ga? 8Ama na kɨŋ-gandi, ma na ka-lɔɔ hɨnga ga dan̰ gɨyəŋdɨge naŋ dan̰ kalaŋ bɨ, ka-bɔɗɛ hɨnga da kalaŋ bɨ. Kalaŋ ga nee le na karmɨgɨŋ ga ban̰aŋ dan̰ ga kandɨ nee coŋ. 9Kalaŋ ga dan̰ durɔ ɗɨngar naŋ, kɨya dɨbege tɨbayge boy dɔɔ-ƴaa gɨ da Kumu gɨŋ naŋ le kɛɛ, kɨŋ sɨla hɨn̰ wo̰ naŋ ga? Ɗɔɔgɨŋ cɨndɨgɨŋ nargɨŋ naŋ: Ka-lɔɔ gɨye yɔyɛ gɨ toy kan̰di kan̰di bɨ, ka-n̰ɨre kula bɨ, ka-yɔyɛ kandɨ wala ban̰aŋ ga da kamdɨge bɨ, ka-lɔɔ gusɨge leen̰ kandɨ bɨ, ban̰aŋ ka-wɔyɛ dan̰ kamdɨge ban̰aŋ bɨ, 10ka-hase bɨ, ka-orɨn̰ dan̰ tabɨlaŋdi wɔɔ hɨnga bɨ, ka-kɔydɛ cɛrɛ bɨ, ka-pɔyɛ kɔl bɨ, ka-bɔɗɨdɛ hɨnga bɨ, kɨya dɨbege tɨbayge a boy dɔɔ-ƴaa gɨ da Kumu gɨŋ naŋ. 11Ama kalaŋ ga pɨna duroygɨŋ, tumɔ na kalaŋ ga hɨn̰ wo̰. Ama kɨŋ le pɨlge ɨsɨna togɨŋ coŋ bɨ, kɨŋ le dorgɨŋge sɨgɨŋ dan̰ cɨndɨgɨŋ bɨ, kɨŋ le ləgɨŋge gɨ kɨŋ bɨle kalaŋ ga dan̰ durɔ ɗɨngar na dan̰ guson̰ Ba-gulɔŋ Jesu-Kɨris bɨ, na dan̰ gɨyəŋ gɨ da Turnoy Kumu kona bɨ.

Dɨbgɨŋ gusoŋ-tɔgɛ cay Kumu dan̰ kuyoŋdi-gusɨgɨŋ

12«Ɗege gɨyəŋ bəŋ gɨ ɨŋ na laa hɨnga nɔm.» Ama hɨnga nɔm ban̰ gɨ ni lɔɔ naŋ. «Ɗege gɨyəŋ bəŋ gɨ ɨŋ na laa hɨnga nɔm.» Ama ɨŋ kɨya ɗɔɔ hɨnga pɨna wo̰ ƴɔmɔŋ guyɔŋdu naŋ bɨrɨŋ. 13«Hɨnga ga ni dɔɔ na woy naa kɨya cay kuduroy ungo bɨ, kuduroy ungo na woy naa kɨya cay dɔɔ bɨ.» Ho’o, a kagadi wɔlɛ gɨŋ na Kumu kɨya mɔndɛ hɨnga ga ni dɔɔ bɨ kudurɔ bɨ sɔɗɨmɔŋ toge dɨŋ. Ama kuyoŋdi-gusu wɨya na kɨya yoyɨn̰ dan̰ gangɨ caygɨŋ naŋ. Kuyoŋdi-gusu woy ojɨ na cay Ba-gulɔŋ bɨ, Ba-gulɔŋ woy ojɨ na cay kuyoŋdi-gusu bɨ. 14Ama Kumu gɨ ba bɔyɛ Ba-gulɔŋ lɨbe le, hɨn̰ gɨ ni na mara kalɨn̰ ma, ban kɨya boyni lɨbɨni dan̰ gɨyəŋ gɨ da dɔnɔ toy bɨ.

15Kuyoŋdi-gusɨgɨŋ na kɨway kuyoŋdi Kɨris, kɛ kɨŋ sɨla hɨn̰ wo̰ naŋ ga? Ma kɛ, ɨŋ kɨya aye kuyoŋdi Kɨris bɨlɨn̰ kɨway kuyoŋdi ajɨba ga? Cə, na hɨn̰ wo̰ naŋ bɨrɨŋ. 16Ungo gɨ bugoŋ pɨna dan̰ tama ajɨba le, ban bɨləŋ na kuyoŋ gɨ pɨna danaa le, kɛ kɨŋ sɨla hɨn̰ wo̰ naŋ ga? Kɨya wa walge duroy Magtubu di da Kumu dɨŋ yege hɨn̰: «Kan sɔɗɨmɔŋ toge dɨŋ bɨləŋge kuyoŋ-gusu gɨ pɨna kəɗ kəɗ.»#6:16 Ayge na duroy: Genèse 2:24. 17Ama ungo gɨ bugoŋ pɨna dan̰ Ba-gulɔŋ le, turnoyge bɨləŋ na pɨna kəɗ kəɗ danayi.

18Ƴɨmagɨŋ gusɨgɨŋ coŋ te yɔyɛ dan̰ gangɨ caygɨŋ bɨ. Ɨsɨna ga ɗaŋ nɔm ga ungo lee le, na a kuyoŋdi-gusi gɨŋ doŋ. Ama kalaŋ ga ka-yɔyɛ dan̰ gangɨ cayge le, leege ɨsɨna na dan̰ kuyoŋdi-gusɨge koge gaŋ. 19Turnɔ ɗe-kuduroy-bɛrɛ di Kumu bɨgɨŋ ma som kuduroygɨŋ le, kuyoŋdi-gusɨgɨŋ na ƴaa sɔmɛdo le, kɛ kɨŋ sɨla hɨn̰ wo̰ naŋ ga? Kuyoŋdi-gusɨgɨŋ na kogɨŋ naŋ, kɨŋ na ga da Kumu. 20Kumu bee nare caygɨŋ bon̰ caygɨŋ ɨni. Na toy di hɨn̰ wo̰ ma, ɗa gɨ kɨŋ dɨbɨ gusoŋ-tɔgɛ a cay Kumu dan̰ kuyoŋdi-gusɨgɨŋ.

Currently Selected:

1 Korɛ̰t 6: gab

Highlight

Copy

Compare