एफीसस् 4
4
हज्यरङ् घयेत् ख्रीष्ट्की सी़ च्यीक् हीम्ब १-१६
1चोव ज्यीन्दक्की ढीक्ल चो़ल्ल ॱस्योरे चो़म्बा ङे खीत्रङ्गी मीजीगी छ्यलु दी को़न्ज्योक्की भो़बल ओ़ब युङ झ्यीज्यीत् सीन्न सीक्को़दो। 2ॱनोम्ज्युङ्, ॱम ॱयुङ्बोक्म, ङङ्रीन् धङ् च्यीक्तङ् च्यीक्ल झ्यम्सीम् खुर्न गुर् थेक्प झ्यीज्यीत्। 3धम्बे थुनी झ्युङे स्यीव दीगी खीत्रङ् नङ्दु ॱसीम् च्यीक् ली़ च्यीक् यो़प्प दी रम्दु ॱमत् ची़प्प, सुङ् छुब झ्यीज्यीत्। 4खीत्रङ् भो़बे धो़ङ्गी रीगो दी च्यीक् हीम्ब डस्सी दीरङ्, सी़ दी इक् च्यीक्, धम्बे थु दी इक् च्यीक्, 5ॱनी चोव ज्यीन्दक् दी इक् च्यीक्, छ्य स्यक्पे लम् दी इक् च्यीक्, बप्तीस् दी इक् च्यीक् बेत्। 6ॱनी छङ्म थम्ज्येक्की पब, को़न्ज्योक् दी इक् च्यीक् बेत्। खोङ्गी ॱवङ् छङ्म थम्ज्येक्की थोक्ल डोगेन् बेत्। ॱनी खोङ् छङ्म थम्ज्येक्की दल धङ् छङ्म थम्ज्येक्की नङ्ल अक् युङ्गेन् बेत्।
7हज्यरङ् रीदङ् रील थुज्यीगी कबप् रीदङ् री ख्रीष्ट्की रोरङ्गी थुल ॱनो़बागी ॱनङ्न यो़क्केन् बेत्। 8हीगी ढीक्ल ॱसुङ्रप्ल थो़ङ्गेन् बेत्।
खोङ् ज्येन इगीदु झ्यो़म्बे यङ्ल खोङ्गी ड घयेत् सुङ्न ठीक्प बेत्। ॱनी मी घयेत्ल खोङ्गी ॱनङ्ज्येत् गज्येन् ॱनङ्न स्यक्प बेत्। (ॱसुङ्रप्की गुल्लु ६८:१८)
9ॱनी खोङ् इगीदु झ्यो़म्ब बेत् सीक्केन् हुगो घन्ड बेक्क ॱनी? खोङ् म दीरङ् एल्ला ॱस जम्बुलीङ्गी इक् होक्स्युक्ल भप्न युङ बेत्। 10होक्स्युक्ल भप्न युङ्गेन् खोङ् यङ् छङ्म थम्ज्येत्ल खीप्च्ये यो़प्पल तेङ् यी़गी इक् थोक्स्युक्ल थो़न्न स्युन यो़क्केन् बेत्। 11ॱनी खोङ्गी यरी ठीक्नलल, यरी कलुङ् ॱस्यो़क्केल्ल, यरी केच्च्य ॱनेम्बु ॱस्येत्न टोम्गेल्ल, यरी छ्यो़ छोगी लुक्चीबल धङ् यरी चयेलमल को़न यो़क्केन् बेत्। 12ॱनी हीगो छ्यो़ छोगी मीस्सीर् घयेक्की रोरङ्सो़ स्यप्च्यी़गी ले दी झ्यीत् छुज्ये यो़प्प धङ् ख्रीष्ट्की सी़ दी ज्यीक्तु डोज्ये यो़प्पे ढीक्ल बेत्। 13हुनी हज्यरङ्गी छ्य स्यक्प दीनी धङ् को़न्ज्योक्की ॱरेबी़ धो़न् थोब दीनी हज्यरङ् कुरीक्की ॱसीम् दी च्यीक्ल डोगेन् बेत्। हुनी हस्सो़त् हज्यरङ् गेम्बा ॱनोक्सम् ॱलीत् छरदङ् छ्येत्मीत् झ्युङ्न ख्रीष्ट्तङ् डमु छङ्मल ॱनोप्न युङ् छुगेन् बेत्। 14ॱनी यङ् हज्यरङ् छ्यु भङ्ज्यीत् ॱलोङ्ज्यीत् झ्यीन ढु यल्लेङ् यी़ल्लेङ् ॱयुन ॱलुङ्बी़ ॱसोर् डोगेन् डस्सी धङ् मी खप् लेबे ॱयोज्यी़ ठम्ज्यी़गी ॱयोङ्गोर्ल छ्यी़ डोगेङ्गी ॱनोक्सम् मीप्पे भीज घयेत् डस्सी मेम्ब, 15हज्यरङ् घयेक्की झ्यम्बे लम्नी दीम्ब ॱस्यो़त् गोगेन् बेत्। हुनी क हज्यरङ्गी झ्यीत्लु ज्युङ्लु दी छङ्मल छङ्न गो हीम्बे ख्रीष्ट्तङ् डमुल ज्येन युङ्गेन् बेत्। 16खोङ् गो झ्यीनी सी़गी यल्लक् ॱनग कुरीक्, चप्स्यी धङ् छीमीक् घयेत् थी़त्नी, यल्लक् रीदङ् रीगी ले रीदङ् री झ्यीन झ्यम्बे लम्नी ओङ्बु छङल युङ्गेन् बेत्।
ॱसीम् ॱएम्मा धङ् ॱसीम् ॱसम्ब १७-२४
17खीत्रङ्ल चोव ज्यीन्दक्की छेन्नी ङ गन्दीक्म ॱलोप्स हीगो ज्यक्केनो। ह हीनी झ्यीब दी खीत्रङ्गी मीजीगी छ्यलु दी को़न्ज्योक् ॱस्यो़च्च्ये मीप्पे मी ॱयोङ्म धो़म्मीक्की ले झ्यीक्केन् डस्सी मत् झ्यीज्यीत्। 18गट्टक्पे ॱसीम् च्येम्म को़न्ज्योक् ॱमीत् ॱसम्गेन् हुबे ॱसीम् दी मेन्नक्ल लेन, को़न्ज्योक्की ॱनङ्गेङ्गी छी दीदङ् ज्यङ्बोक्म यो़क्केन् बेत्। 19हुब ङु छय मीत् झ्यीप्प, छ्येल ॱनक्प धङ् चङ्ज्ये मीप्पे ले घयेत् झ्यीन हुन्दुक् झ्यीबल जीम्ब मीत् झ्यीप्प, हुगी ॱवङ्ल ॱस्योर्न यो़क्केन् बेत्।
20ॱनी खीत्रङ्ल थोबे ख्रीष्ट्की ढीक्की ॱलोप्सल हुन्दुक् झ्यीबे लेमु मीत् युङ्गेन् बेत्। 21हुगो खीत्रङ्गी ॱह घोन यो़क्केन् बेत्। येशुदङ् मत् ढेब यो़प्पे मी झ्यीनी, खोङ्गी दीम्बे केच्च्य खीत्रङ्ल ॱस्यो़च्च्ये यो़क्केन् बेत्। 22हुगी ॱलोप्स हुगी नङ्ल खीत्रङ्गी ॱएङ्गी छ्यलु घयेक्की ढीक्ल हीगो ओक् यो़क्केन् बेत्। सुर्ल छ्यी़दु ची़क्केन् धेत्मो़ ङेम्बे ॱवङ्ल ॱसोङे ॱसीम् अयेक्प ॱएम्मा दी फङ्न स्यक्न, 23ॱनो़रीक् छङ्मे ॱसीम् दी ॱसम्बल ज्युर्न 24घो़ ॱसम्ब घो़म्ब डस्सी मी ॱसम्बल ज्युर्न युङ् गोगेन् बेत्। ॱनी हीगो को़न्ज्योक् घन्दुक्मे दीम्ब, ढङ्बु धङ् चङ्म यो़प्प बेक्क हुगोदङ् डगेन् युङ्ज्येल हुगो झ्युङ्दु ची़प्प बेत्।
आक्पागी ढङ् फङ्न स्योक् गोगेन् २५-३२
25हीगो झ्यीनी हज्यरङ् सी़ च्यीक्की यल्लक् हीम्बल झ्युङ्नी, हज्यरङ् घयेक्की ॱएलमे ढङ् घयेत् फङ्न स्यक्न नङ्जोदु रीदङ् रील दीम्बे केच्च्य लप् गोगेन् बेत्। 26खोङ्डोक् लङ्न अक्, दीक्प मत् झ्यीज्यीत्। नम् ॱरो़ ॱरो़ले एल्ला खीत्रङ्गी खोङ्डोक् दी स्यीज्ये यो़प्प झ्यीज्यीत्। (जकरीया ८:१६)
27दी़क्की चो हुल लाजीन् ॱङीत्तु ची़त्न खीत्रङ् दीक्पल छ्यी़दु ॱमत् ची़च्च्यीत्। 28एल्ला की़न्नक् कुगेङ्गी ह यङ् ॱमत् कुज्यीत्। बोर घो छ्यो़प्पे ले लक्पे कले च्येत्न ढोप्प ॱसो़ज्यीत्। हुनी हुगी ॱयोङ्मागी गो़ब तोक्पल आक् टो़त् छुगेन् बेत्। 29खीत्रङ्गी खनी मत् ओ़बे तम् घन्ड अक् ॱमत् थो़न्ज्यीत्। नेङ्गेल्ल फेन् थोब धङ् हुल गो़बे घो छ्यो़प्पे तम् ॱनेम्बोक्म लप्च्यीत्। 30हज्यरङ् हीनी स्युक् थमल ॱलुदु युङे ङीन् थुक्ल हज्यरङ्ल ङोत्ताल ॱनङ्न यो़क्केन्, को़न्ज्योक्की धम्बे थुल ॱसीम् नदु ची़क्केङ्गी लेमु मत् झ्यीज्यीत्। 31ॱनी इबीक्, खोङ्डोक्, सीगुक्, ठुक्प, ॱमो़म्बी़त् धङ् हुन्दुक् झ्यीबे आक्पागी ढङ् घयेत् खीत्रङ्गी ॱलो़ तोङ्ज्यीत्। 32खीत्रङ् नङ्दु च्यीक्तङ् च्यीक्ल गये ले धङ् ॱङीङ्ज्यी झ्यीत्री चीज्यीत्। को़न्ज्योक्की खीत्रङ्ल ख्रीष्ट्की लम्नी धक्तु ची़प्प डस्सी खीत्रङ्गी इक् च्यीक्तङ् च्यीक्ल धक्तु ची़त् गोगेन् बेत्।
Currently Selected:
एफीसस् 4: LHM
Highlight
Copy
Compare
Share
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
