२ कोरीन्थी 1
1
1को़न्ज्योक्की थुल यो़प्पल ख्रीष्ट् येशुगी ठीक्नल ङ पावल् धङ् हज्यरङ्गी पी़न्ज्या तीमोथीगी खीत्रङ्, उन कोरीन्थ् सार्न यो़प्पे को़न्ज्योक्की छ्यो़ छो धङ् अखैया लुङ्बे नङ्ल यो़प्पे को़न्ज्योक्की मी चङ्म घयेत्ल हीगो ढीन तोङ्गो़त्। 2खीत्रङ् घयेत्ल हज्यरङ्गी यप् को़न्ज्योक् धङ् चोव ज्यीन्दक् येशु ख्रीष्ट् च्यानी थुज्यी धङ् ॱसीम् दीव युङ्ज्ये यो़प्प तोङ्।
ॱलोप्स्यीक् छङ्म च्येम्मे को़न्ज्योक् ३-११
3ॱलोप्स्यीक् छङ्म च्येम्मे को़न्ज्योक्, ॱङीङ्ज्यी छ्यीम्मु च्येम्मे यप्, हज्यरङ्गी चोव ज्यीन्दक् येशु ख्रीष्ट्की यप् को़न्ज्योक्ल यस्सो धङ् तो़प्प युङ् युङ युङ्ज्ये यो़प्प स्योक्च्यीत्। 4ङीत्ल दुक्प घन्ड नोङ्न अक्, हुगी यङ्ल को़न्ज्योक्की ङीत्ल ॱलोप्स्यीक् ज्यी़न्दु ॱनङ्गुक्। ॱनी हीगो झ्यीनी दुक्प ॱनजो नोङ्गेन् ॱयोङ्म घयेत्ल अक् ङीक्की ॱलोप्स्यीक् टो़त् ॱस्यीबेत्। 5ख्रीष्ट्ल दुक्प अयेक्प गज्येन् नोङ डस्सी हज्यरङ्ल अक् नोङ्गुक्। ॱनी हीगो डस्सी ॱलोप्स्यीक् दी इक् खोङ्गी च्यानी गज्येन् ॱङीक्कुक्। 6ङीत्ल दुक्प नोङ्न अक्, हुगो खीत्रङ् घयेत्ल ॱलोप्स्यीक् धङ् छी थर्व युङे ढीक्ल गुको़र्त्। ङीत्ल ॱलोप्स्यीक् ॱङीब हुगो ङीत्ल डस्सी खीत्रङ्ल आक् दुक्प नोङे यङ्ल खीत्रङ्गी हुगो धु च्यङ्न गुर् थेक्पे ॱलोप्स्यीक् ॱङीच्च्ये यो़प्पे ढीक्ल बेत्। 7हीगो झ्यीनी खीत्रङ्गी हुगो गुर् थेक्केन् बेत् ॱनो़बे रीगो ङीक्की थीरी झ्यीक्को़त्। घन्ड हीन् सीन्न दुक्प नोङ्गेन् हज्यरङ् च्यीक्प हीम्ब झ्यीनी, ॱलोप्स्यीक् दी इक् हज्यरङ्ल च्यीक्परङ् युङ्गेन् हीम्ब ॱस्यो़च्च्ये यो़क्केन् बेत्।
8पी़न्ज्यासो, ङीत्ल एशीया लुङ्बदु घन्दुक्मे दुक्प छ्यीय नोङ्दुक्क हुगो खीत्रङ्ल ॱस्यो़च्च्ये युङल ङीत् ॱस्यो़क्कीन् थेक्कुक्। ङीत्ल म दीरङ् गुर् दीरङ् ॱमीत् थेक्केङ्गी दुक्प नोङ्ज्युङ्। हुगी यङ्ल ॱसो़ योङ् ॱनो़बे त रीगो दीरङ् मत् युङ्। 9गन्दीय ह त ॱस्यीगेन् दीरङ् बेत् ॱनो़ब छ्यर्च्युङ्। ॱनी हीगो ङीत् ङीत्रङ्गीरङ् झ्यीन थर् छुगो़त् ॱनो़बल ॱलो ॱमीत् को़ब, ॱस्यीनर घयेत् ॱसोम्बुल ॱलोङ्गेङ्गी को़न्ज्योक्ल ॱलो को़ ॱस्यीज्ये यो़प्पे ढीक्ल झ्युङ्। 10-11हुन्दुक् झ्यीबे ॱस्यीये लक्नी को़न्ज्योक्की ङीत् छ्यीज्युङ्। ॱनी तीङ्ला आक् खोङ्गी छ्यीगेन् बेत्। ङीत्ल दगु झ्यीच्च्येल खीत्रङ्गी ॱसुव तबल खोङ्गी ङीत् छीगङ् छ्यीगो़त् ॱनो़बे रीगो झ्यीक्को़त्। मी गज्येङ्गी हुन्दुक् झ्यीन ॱसुव तबे लेल्ल को़न्ज्योक्की ङीत्ल थुज्यी ॱनङ्नी, हुनी मी गज्येङ्गी खोङ्ल थु छ्यी पु पुब झ्यीक्केन् बेत्।
पावल्की ढो़ ज्युर्न स्यक्पे तम् १२-२४
12ङीक्की ङोम्ज्येत् दी हीगो यो़त्। जम्बुलीङ्गी मी घयेक्की घुङ्दु धङ् हुले धक्पा खीत्रङ्गी घुङ्दु ङीक्की मीजीगी छ्यलु दी को़न्ज्योक् थु गुव धङ् धक्पर् ॱसीम् चङ्म खुर्न युङेन्। हीगी ढीक्ल सङ् ङेन् च्यो़त् ॱस्यीगेन् ङे ॱसीम्बे धक्पर् झ्यीक्केन् बेत्। हीगो कोलीमीगी झ्यी़रीक् रीक्पे मेम्ब, को़न्ज्योक्की थुज्यीगी बेत्। 13-14ङीक्की ढीन तङे यीगी घयेत्ल खीत्रङ्गी ॱह मीत् घोगेङ्गी केच्च्य घन्ड अक् मत् ढी। ङीत् घन्दुक् झ्यीब बेक्क हुगो खीत्रङ्गी हुन्दो अच्च्येत् च्यीक्रङ् ॱह घोदुक्। ॱनी तीङ्ला हस्सो़त् जेङ् ॱह घोगो़ट्टो ॱनो़बे रीगो यो़त्। हुनी हस्सो़त् चोव ज्यीन्दक् येशुगी ङीङ्गी यङ्ल ङीत्ल यो़प्पे ङोम्ज्येत् दी डस्सी खीत्रङ्ल आक् ङीक्की ढीक्ल ङोम्ज्येत् युङ्गेन् बेत्।
15ङे देङ्जो़त् हुल पीब खीत्रङ्ल ॱमेल्लम् ङीबक् थोप्च्ये यो़प्पल स्येन् ङ खीत्रङ् च्याल एल्ला युङ्ज्ये ॱनो़ब झ्यीबेन्। 16ङे ढो़ दील स्येन् ङ मासीडोनीया लुङ्बल डोये यङ्ल लम्ल खीत्रङ् च्याल स्युन डोज्ये ॱनो़ज्युङ्। हुनी यङ् ङ लोक्पे यङ्ल अक् खीत्रङ् च्यादुरङ् स्युन युङ्न, हुनी खीत्रङ्गी ङल गो़बे खोज्येत् घयेत् देन दगु झ्यीन तङ्न ॱनी, ङ यहुदीयाल डोज्ये ॱनो़ब झ्यीबेन्। 17ॱनी ङे हीगो मत् युङे छ्यीस्सदु खीत्रङ् यरीगी तेन्ज्ये मीन्दुक् सीगो़ट्टो। यरीगी यङ् कोलीमी ॱसीम्बे लेमु डस्सी हुगी कप्तोक् च्यीक्लरङ् हीन् सीगुक्। मेन् सीगुक् सीन्न सीगो़ट्टो।
18को़न्ज्योक् ज्युरुव मीप्प, तेम्बर् यो़प्प डस्सी ङीक्की केच्च्य आक् हीन् धङ् मेन् मेम्ब, हीन्न ॱनी, हीन् सीक्को़त् बेत्। मेन्न ॱनी, मेन् सीक्को़त् बेत्। 19खीत्रङ्ल ङ धङ् सीलास् धङ् तीमोथीगी ॱस्येत्न यो़प्पे को़न्ज्योक्की ॱरेबु येशु ख्रीष्ट्ल हीन् धङ् मेन् मीत् युङ्गेन् बेत्। खोङ्ल बेत् सीर च्यङ्ज्यङ् युङ्गेन् बेत्। 20को़न्ज्योक्की छ्यो़त्तुम् ॱनङ दी घजो़त् च्यीक् यो़दङ् हुगो कुरीक् ख्रीष्ट्की लम्नी झ्युङ्न, हुनी हस्सो़त् हुगो खुङ्देन् हीम्बल धक्केन् बेत्। हुगो झ्यीनी हुगी ढीक्ल को़न्ज्योक्ल तो़प्प पुबे यङ्ल ख्रीष्ट्की लम्नी हज्यरङ्गी आमेन् सीन्न सीर् छुगेन् बेत्। 21खीत्रङ् धङ् ङीत् कुरीक् ख्रीष्ट्तङ् मत् ढेबल थीरी दो़त् छुबल सोगेन् दी को़न्ज्योक् बेत्। ॱनी म दी ङीत् खोङ्गी ले झ्यीक्केल्ल गोल ॱनुम् ॱही़न्न को़ज्युङ्। 22हज्यरङ् फुगी ढीक्ल खोङ्गी मी हीम्ब युङ्ज्येल ङोत्तादङ् छ्येत्मीत् बयीनाल धम्बे थु हज्यरङ्गी ॱसीम्ल ॱनङ्न यो़क्केन् बेत्।
23ङ हुन्दो थुक्ल हुदु कोरीन्थ्ल मीत् युङ्ज्ये दी खीत्रङ्ल ङे लप्स्य नोङ् डोयेत् ॱनो़न ॱङीङ् छये, मत् युङ हीन्। हीगो खुङ् हीम्बे ढीक्ल को़न्ज्योक् पङ्दु डेङ्गेन् हीन्। 24खीत्रङ्गी छ्य स्यक्पे लेमुल ङीक्की खीत्रङ्ल ॱवङ्यो़त् तोङ्गेन् मेन्। खीत्रङ्ल ॱसीम् गव युङ्ज्ये यो़प्पल ङीक्की दगु झ्यीत्रो झ्यीक्केन् हीन्। खीत्रङ्गी छ्य स्यक्प दी त तेम्बुवरङ् दुक्।
Currently Selected:
२ कोरीन्थी 1: LHM
Highlight
Copy
Compare
Share
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
