१ कोरीन्थी 16
16
चेन्ड दी़न यरुशलेम्ल च्यो़गेन् १-४
1को़न्ज्योक्की मी चङ्म घयेक्की ढीक्ल चेन्ड दी़च्च्येल ङ हीगो सीक्केन्। गलाती लुङ्बे छ्यो़ छो घयेत्ल ङे घङ् ॱङाब दी डस्सी खीत्रङ्गी इक् झ्यीज्यीत्। 2दी़न्डक् रीगी स ङीमे ङीन् दी खीत्रङ् ॱसोस्सोरङ्गी घङ् ॱसान यो़प्प दीनी छ्यक्चो़त् च्यीक् पी़त्न स्योक्च्यीत्। हुनी ङ युङे ॱङेस्स्यो चेन्ड दी़त् मीत् गो़ब युङ्गेन् बेत्। 3ङ हुदु ॱलीत्नी, खीत्रङ्गी टेप्पे चेन्ड हुगो यरुशलेम्ल च्यो़दु खीत्रङ्गी दम्बे मी घयेक्की लक्ल केन हुगी दल ङोस्स्यीन् टो़च्च्येल ङ यीगी च्यीक् ढीन तोङ्गेन्। 4ॱनी म दी ङरङ् अङ् डो गो़ झ्युङ्न ॱनी, हुब ङरङ्दङ् दल ठीक्न डोगेन्।
पावल्की ॱङक्सो ५-१८
5ङ मासीडोनीयागी लुङ्बल डोज्ये ॱनो़ब यो़त्। हुगो झ्युङ्न ॱनी, हुनी फल्ल खीत्रङ् च्याल ठेत्तु ॱलीत् योङ्। 6हुनी ङ खीत्रङ् च्यादु धोबा च्यीक् थुक् दो़क्केन्। हुदु ङ गी़न् यो़ यो़ थुक् दो़त् छुगो़ट्टो। हुनी ङ घल डो गो़ झ्युङ्न अक्, खीत्रङ्गी ङल गो़बे खोज्येत् घयेत् देन तोङ्गो़ट्टो। 7ङ हुन्दो ज्योक्पु झ्यीन खीत्रङ् च्याल युङ्न ॱनी, हुदु ॱरीप्चो़त् च्यीक्रङ् दो़च्च्ये ॱनोङ्गेन् बेत्। ॱनी अच्च्येत् तीङ्ला युङ्न, चोव ज्यीन्दक्की थुल डीक्न ॱनी, अच्च्येत् मङा दो़त् छुगो़ट्टो ॱनो़ब यो़त्। 8हुन्दो हीदु ङ एफीसस् सार्तु पेन्तीकोस्की धी़रीम् थुक् दो़क्केन्। 9घन्ड हीन् सीन्न ले ज्य छ्यीम्मु झ्यीच्च्येल हीन ङे ढीक्ल गोच्च पीक्न स्यक्तुक्। ॱनी थङ्गक् झ्यीक्केङ्गी ड घयेत् एत् गज्येन् दुक्।
10तीमोथी हुदु खीत्रङ् च्याल युङ्नी, हुगोल हुदु ज्यीब छीर मीत् युङे लेमु खीत्रङ्गी झ्यीज्यीत्। चोव ज्यीन्दक्की ले ङे झ्यीब डस्सी हुगी इक् झ्यीक्केन् बेत्। 11हुगो झ्यीनी ॱसी़ इक् हुगोल ॱनङ्ज्युङ्ल ॱमत् तोङ्ज्यीत्। ॱनी हुगो ङ च्याल ॱलोक्न तोङे यङ्ल गन्दीक्म झ्यीन तोङ्लेच्च्यीत्। हीन ङ धङ् ङे पी़न्ज्या घयेत् तीमोथी युङल गुक्को़त्।
12पी़न्ज्या अपोल्लोस्ल ङे खीत्रङ् च्याल पी़न्ज्या ॱयोङ्म घयेत्तङ् दल डोरो झ्यी सीन्न ॱउच्चु तङेन्। ॱनी डोज्ये ॱनो़ब झ्यीमोङ्। तीङ्ला रो खोम्न ॱनी, डोगेन् सीगुक्।
13ॱसीम् च्यङ्जो़त् झ्यीन दो़च्च्यीत्। खीत्रङ्गी छ्य स्यक्पे लम् दील थीरीय दो़च्च्यीत्। ॱआर् छ्यीजो़त् झ्यीज्यीत्। ॱलोप्स्यीक् छ्यीजो़त् झ्यीज्यीत्। 14खीत्रङ्गी घन्ड झ्यीत् गो़ झ्युङ्न अक्, झ्यम्बे ॱसीम् खुर्न झ्यीज्यीत्।
15उन अखैयागी लुङ्बदु गोम ॱएन्स्युक्ल छ्य स्योक्केन् दी इस्तीफनास्की मीजङ् घयेत् झ्युङ हीम्ब खीत्रङ्ल ॱस्यो़च्च्ये यो़क्केन् बेत्। हुबे को़न्ज्योक्की मी चङ्म घयेत्ल स्यप्च्यी़ ज्युक्पे लेल ॱलो़सीम् दीरङ् टेत्न झ्यीक्केन् बेत्। पी़न्ज्यासो, खीत्रङ्ल ङ ॱलोप्स हीगो ज्यक्केन् हीनो। 16हुब धङ् ॱनी हुब डस्सी टेत् च्येत्न ले झ्यीक्केन् हुबे छ्यीट्टो घयेक्की ॱवङ्गी होक्तु खीत्रङ् दो़च्च्यीत्। 17इस्तीफनास्, फोर्टुनाटस् धङ् अखैकस् झ्यीब हीदु युङ्नी, ङ गेसक्की खीत्रङ् घयेत् ढेम्बे ठेक्कीन् थेस्सी यो़प्प दी इक् येसोङ्। 18खीत्रङ्ल हुदु गेनङ् झ्युङ डस्सी हुब च्यानी ङल अक् हीदु गेनङ् झ्युङ्। हुगो डस्सीगी मील तो़प्प झ्यीत् गोगेन् बेत्।
19एशीया लुङ्बे छ्यो़ छो घयेक्की मी खीत्रङ्ल छ्यक्सुम् थेमु सीगुगो। अक्वीला, प्रीस्कीला धङ् हुबे खीम्दु जोम्गेन् छ्यो़ छोगी मी घयेक्की खीत्रङ् चोव ज्यीन्दक्तङ् मत् ढेब यो़प्प घयेत्ल गन्दीक्म छ्यक्सुम् थेमु यो़दो सीगुगो। 20हीन यो़क्केन् पी़न्ज्या घयेक्की इक् छ्यक्सुम् थेमु सीगुगो। खीत्रङ् च्यीक्तङ् च्यीक्ल ॱसीम् चङ्म खुर्न च्युप् झ्यीत्री चीज्यीत्।
21ॱनी ङ पावल्की लक्पे ढीबे यीगी दी ङरङ्गी छ्यक्सुम् थेमु यो़त् सीक्केन् हीगोरङ् क ढीबेन्। 22ॱनी चोव ज्यीन्दक्ल झ्यम्ब ॱमीत् खुर्केन् मी ॱसु यो़दङ् हुल ॱमो़त्मु सुक्ल ज्युक्च्यीत्। ॱवे चोव ज्यीन्दक् झ्यो़र्रो ॱनङ्। 23चोव ज्यीन्दक् येशुगी थुज्यी खीत्रङ् घयेत्ल थोप् थोब युङ्ज्ये यो़प्प स्योक्च्यीत्। 24ख्रीष्ट् येशुदङ् मत् ढेब यो़क्केन् खीत्रङ् घयेत्ल ङे झ्यम्ब यो़दो।
Currently Selected:
१ कोरीन्थी 16: LHM
Highlight
Copy
Compare
Share
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
