MUV̄ENULIO 6

Nida yahusu umuɓulio wa ziliti za ishio

1Tsiangalia, ɓasi tsiono wakati uMwana Ɓariɓari apua moja hari mwa ziliti saɓa, amwesa tsikia moja mengoni mwa ziumbe nne zendza roho zile irongoa ha ji mauri guguma: «Ko!» 2Tsiangalia, ɓasi tsiono farasi ndjeu. Mutru aka aipandra, aka asiki shombo ya fumo. Av̄olwa kemba, na waye alawa mushindrifu, akondroshindra.

3Wakati apua iliti ya v̄ili, tsikia ishiumbe ya v̄ili yendza roho irongoa: «Ko!» 4Amwesa v̄ulawa farasi yangina ndzukundru yaiva. Mutru aka aipandra av̄olwa ushindzi wa utoa iamani shiv̄andreju mwa tsi, ile watru waulane, tsena av̄olwa upanga muɓole.

5Upua yahe iliti ya raru, tsikia ishiumbe ya raru yendza roho irongoa: «Ko!» Tsiangalia, na tsio tsiono farasi ndziɗu. Mutru aka aipandra akana shombo ya uv̄ima muhononi. 6Na tsami tsikia mauri ji hari-hari na ziumbe nne zendza roho zile lakorongoa: «Shiv̄imo moja ya mele ha turuturu ya marike, na ziv̄imo traru za murama-mutsa#6:6 mele... murama-mutsa: iShigiriki v̄anu isurongoa aina za mbia zilio amba kaziparihana hatru hunu. Shifarantsa izo uhiriwa blé, na orge; Shingudja mutru urongoa unga wa ngano, na shayiri. ha turuturu ya marike. Ɓadi yahusu matra na maji ya zaɓiɓu, usuyadhuru.»

7Wakati apua iliti ya nne, tsikia liji la ishiumbe ya nne yendza roho yakorongoa: «Ko!» 8Tsiangalia na tsio, tsiono farasi yendza range djifu. Mutru aka aipandra akana lidzina la Wafati, na Uzimu wa uwafu uka umuɗungu. Wav̄olwa ushindzi hari mwa lifungu la nne la ishiv̄andre ya tsi, ile waangamidze wanadamu ha upanga, ha ndza, ha maradhi yaulao, na ha zinyama nyeha za shiv̄andreju mwa tsi.

9Upua yahe iliti ya tsano, tsiono utsini na italatala ya masadaka ziroho za wao waulawa ha siɓaɓu ya Urongozi wa Mungu|Urongozi na ushahidifu wakouv̄inga. 10Wakoshelemedza ha ji lendza nguvu ha urongoa: «Ata lini uhomao, Mola Monyewe Ushindzi, Mutwaharifu amma wa kweli, uhukumu na uɗiv̄ia damu yatru hari mwa uwakazi wa ishiv̄andre ya tsi?» 11Ɓasi kula moja hari mwawo av̄olwa nguo ndjeu, tsena waambilwa wasuɓiri raha mwana wakati, ata mupaka iindadi ya wanyawo warumishi na wananyawo wa shi uaminifu wajao waulawe mauri ɗe wao, ikamilishihe.

12Tsiono tsena upua yahe iliti ya sita amba v̄ufanyiha mudridrimio muɓole wa ishiv̄andre ya tsi. liJua lifanyiha dziɗu mauri nguo ya musiɓa, na umwezi ha ukamilifu wawo ufanyiha mauri damu. 13Na zinyora za mbinguni zakov̄aruha shiv̄andreju mwa tsi mauri muri wendza mbia uv̄arusao wamovudziwa na pev̄o yendza nguvu. 14Uwingu udzivuru mauri shio iv̄ambuao, na kula mulima na shisiwa zitolwa ɓandzaju hazo.

15Wafalume wa ishiv̄andre ya tsi, uwaɓole, makizi-mbeli ya madjeshi, matadjiri, washindzi, ɓasi piyawo, warumwa na wendza unafasi, wakwendra wadzame moni na magumbo na moni na yamadjaɓali ya milima. 16Ɓasi wakoambia yimilima na yamadjaɓali amba: «Namurishukiye, muridzamise na isura ya Uwo aketsi hari mwa ishiri ya ufalume, na ihadhaɓu ya uMwana Ɓariɓari! 17Mana isuku ɓole ya hadhaɓu yawo iwaswili, na mbani ɗe atsoshindrao akingiye?»

Currently Selected:

MUV̄ENULIO 6: swb

Highlight

Compare

Copy