MUV̄ENULIO 5
5
Nida yahusu iShio na uMwana Ɓariɓari
1Amwesa tsiono moni na umuhono wa hume wa ule aketsi hari mwa ishiri ya ufalume shio yav̄ambiwa, yaangihwa moni na v̄ondze, tsena yaɓalwa hari mwa maɓandza saɓa na liti#5:1 liti: Hari mwa liti zile, v̄uka v̄utrilwa ãlama za pere za uonesa monyewe uv̄eleha ikiritasi ile, mauri mutru aremao muhuri. yaremwa muhuri. 2Tsiono tsena malayika yendza ushindzi yakoshelemedza ha ji lendza nguvu amba: «Mbani ɗe astahiki upua ziliti, aɓuwe ishio?» 3Ɓadi kav̄waka mutru yotsi, tsi mbinguni, ɓila shiv̄andreju mwa tsi, wala uzimu na ishiv̄andre ya tsi, akoshindra aɓuwe ishio, wala uiangalia. 4Ɓasi tsilili ha kusudi, mana kav̄waka ata mutru aonehana amba astahiki uɓua ishio, ɓila uiangalia. 5Sa ile moja hari mwa wadzaɗe wale aniambia: «Usulile! Tsini iSimba ya udjama wa Yuda, uMutse#5:5 iSimba... Daudu: Mengoni mwa yamadzina ya Insa-Kristi, uMutsahuliwa wa Mungu, v̄wa iSimba ya udjama wa Yuda, na uMutse wa Daudu. wa Daudu, ashindri: waye ushindra aɓuwe ishio#5:5 ishio: iShigiriki isurongoa shio yav̄ambiwa. Shifarantsa isurongoa parchemin. yav̄erwa na ziliti saɓa zayo.»
6Amwesa hari-hari na ishiri ya ufalume na ziumbe nne zendza roho zile, na hari-hari na wadzaɗe wale, tsiono Mwana Ɓariɓari ahima, aka mauri aka atsindzwa. Akana nyonga saɓa na matso saɓa, zilio ɗe roho saɓa za Mungu zav̄elehwa hari mwa piya ishiv̄andre ya tsi. 7Andre arenge ishio hari mwa umuhono wa hume wa ule aketsi hari mwa ishiri ya ufalume. 8Wakati arenga ishio, ziumbe nne zendza roho zile v̄umoja na uwadzaɗe shirini na wanne wale wasudjudia mbeli za uMwana Ɓariɓari. Kula moja aka asiki dzendze#5:8 dzendze: iShigiriki v̄anu isurongoa shombo ya lamiziki. Shifarantsa, iyo uhiriwa harpe. na zikombe za dhahaɓu zaka zajaya uɓani, ulio ɗe yamamilio ya watwaharifu. 9Wakohimba djimbo pia ha urongoa:
«Ustahiki urenge ishio,
tsena upuwe ziliti zayo.
Mana uka utsindzwa,
amwesa ha idamu yaho,
umununulia Mungu wanadamu wa kula kaɓila,
kula luha, kula umati, na kula nishani.
10Uwafanya wake ufalume
wa Matolezi-Masadaka wa Mungu watru,
tsena watsotawala hari mwa ishiv̄andre ya tsi.»
11Amwesa tsiangalia, tsikia ji la malayika nyengi zapara indadi ya mialifu na mialifu. iShiri ya ufalume ile ika izingidziwa na ziumbe zendza roho na wadzaɗe. 12Ha ji lendza nguvu wakorongoa:
«uMwana Ɓariɓari aka atsindzwa astahiki apare
ushindzi, utadjiri, hikima, nguvu,
hishima, utukufu, na sifa!»
13Amwesa kula shiumbe ilio mbinguni, uju na ishiv̄andre ya tsi, utsini na ishiv̄andre ya tsi na uju na iɓahari, piya zilio, tsizikia zakorongoa:
«Ha Monyewe uketsi hari mwa ishiri ya ufalume
na ha uMwana Ɓariɓari,
sifa, hishima, utukufu na ushindzi
daimani aɓada!»
14Na ziumbe nne zendza roho zile zakorongoa: «Amina», na uwadzaɗe wale wakosudjudia na uãɓudu.
Currently Selected:
MUV̄ENULIO 5: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
