MUV̄ENULIO 2

Malagidzo ha iDjama Ndziwaminifu ya Efeso

1«Angishia imalayika ya iDjama Ndziwaminifu ya Efeso zini:

Zini ɗe zirongolwao na uwo asikao zinyora saɓa hari mwa umuhono wa hume wahe, uwo andrao hari-hari na zizihetsi-kombe saɓa za dhahaɓu:

2Wami ujua zitrendro zaho, ihazi yaho, na ustahamilivu waho. Nisujua amba wawe kushindri ustahamilia waovu. Uv̄imi wao wadzifanyao mav̄ingizi-risala ne kawasi, amwesa uwapara wanafiki. 3Wawe mustahamilivu, uondesheha ha siɓaɓu ya lidzina langu, tsena kwapuha ɓari.

4Ɓadi iyo nilionayo kinyume na wawe, ɗe iv̄o wajeledza uv̄endza yaho ya mwandro. 5Ɓasi nahana uka yaho kaɓula ya upuliha. Endra toɓa, urudi hari mwa zitrendro za handra zaho. Neka tsi namuna iyo nitsohujilia, tsena nitsotoa shihetsi-kombe yaho ɓandzaju hayo, ɓadi neka wendre toɓa. 6Ata wala ukana iyo, ne una ndjema ini, amba usutukiwa na zitrendrwa za Manikolayiti#2:6 Manikolayiti: Dzina lilo lisurongoa ɗe uwatru wakomuɗunga Ɓalahamu., zitrendrwa zilio amba wami-wami utikiwa nazo.

7Mwendza makio nakiye izo iRoho aambiao ziDjama Ndziwaminifu! Ha uwo ashindra, nitsomuv̄a aɗye mavuna ya umuri wa uhayati ulio hari mwa ipev̄o ya Mungu.»

Malagidzo ha iDjama Ndziwaminifu ya Smirna

8«Angishia imalayika ya iDjama Ndziwaminifu ya Smirna zini:

Zini ɗe zirongolwao na Monyewe wa Handra, amma wa Hwisa, afa, amwesa aregea hayi. 9Nisujua matreso yaho na usikini waho, wala ukana amba wawe tadjiri. Tsena nisujua zinaĩ urongolwaozo na wao wadzihirao Mayahudi wala kawasi, ɓadi walio djama iãɓuduo Shetwani. 10Usuriye trongo zijao zihupare. V̄anu Iɓilisa asuja apulise ɓaãdhwi mengoni mwanyu shiv̄ani ile pare mudjereɓihe; mutsopara suku kumi za matreso. Ɓaki muaminifu mupaka hari mwa ufa, na wami nitsohuv̄a likara la uhayati.

11Mwendza makio, nakiye izo iRoho aambiao ziDjama Ndziwaminifu! Uwo ashindra, katsodhurushiha na ufa ya v̄ili.»

Malagidzo ha iDjama Ndziwaminifu ya Pergamu

12«Angishia imalayika ya iDjama Ndziwaminifu ya Pergamu zini:

Zini ɗe zirongolwao na Monyewe ukana upanga utsindzao wendza nguso mbili: 13Nisujua v̄ahanu uẽshio: v̄av̄o ɗe v̄ulio ishiri ya yezi ya Shetwani. Ususika hodari lidzina langu, tsena kwalatsa uaminifu na wami, ata hari mwa zisuku Antipasi, shahidi muaminifu wangu akoulawa hanyu, v̄ahanu Shetwani#2:13 Shetwani: Yaãni, v̄ahanu watru wakoãɓudu umufalume wa tsiju v̄ale. aẽshio.

14Ɓadi tsina kinyume na wawe ɓaãdhwi ya zitru tsizini: haho una watru waɗungao musomo wa Ɓalahamu alio amba akomusariɓia Ɓalaki atsonge umukwaliso wa Israila ha uwasariɓia waɗye nyama yakotolewa sadaka masanamwe, na ufanya uzindzi. 15Na haho wajau, una watru wafungana na umusomo wa Manikolayiti. 16Ɓasi endra toɓa! Neka tsi namuna iyo nitsohujilia tsi hale, niwane na wao ha upanga wa ihanyo yangu.

17Mwendza makio nakiye izo iRoho aambiao ziDjama Ndziwaminifu! Uwo ashindra, nitsomuv̄a fungu hari mwa ishahula yatsitswa ihiriwao manna, tsena ɓwe djeu. Na hari mwa liɓwe lilo v̄uangihwa dzina pia lilio amba kav̄u mutru alijuao neka tsi ɗe uwo aliparao.»

Malagidzo ha iDjama Ndziwaminifu ya Tiyatira

18«Angishia imalayika ya iDjama Ndziwaminifu ya Tiyatira zini:

Tsizini izo zirongolwao na uMwana wa Mungu, Uwo aliona matso mauri jenge la moro, na yimindru yifanao na shaɓa iv̄ev̄enao hari mwa moro. 19Nisujua zitrendro zaho, uv̄endza yaho, uaminifu waho, urumishi waho, na ustahamilivu waho; na zitrendro za mwiso zaho zazidi za handra.

20Ɓadi trongo nilionayo kinyume na wawe, ɗe amba usulisha mutrumushe Djezaɓeli#2:20 Djezaɓeli: Dzina lini lisurongoa mutrumushe wa idini ya yaManikolayiti, alio amba akodzifanya mutru ashukidziwao marongozi ya shi mutrume ayajudze. ule adzifanyao amba asujudza marongozi ya shi mutrume ashukidziwao, asomedze na upoteza warumishi wangu wafanye taɓia mbi na uɗya nyama zatolewa sadaka masanamwe. 21Tsimuv̄a wakati amba andre toɓa, ɓadi kasutsaha andra toɓa na taɓia mbovu zahe. 22Tsami nisumuv̄eleha hari mwa shitrandra ya djondo, waye na wao wafanyao zitaɓia na waye, ɓadi neka wasendra toɓa na zitrendrwa zahe. 23Nitsoangamidza wana wahe ha uwaula. Na piya ziDjama Ndziwaminifu zitsojua amba wami ɗe nitsungiyao zifikira na ziroho, tsena nitsov̄a kula moja hari mwanyu ulawana na zitrendro zahe. 24Ɓadi yahusu wanyu piya wangina wa shi Tiyatira kamwaɗunga musomo uwo, wala kamwaparojua ‹zilindri za Shetwani›, mauri ɗe inamuna warongoao, ɓasi nisurongoa amba tsisumutrihisani mudzo wangina. 25Ɓadi iyo mulionayo, namuisike hodari ata mupaka nije.

26Ha uwo ashindra na usika ata mwiso zitrendro zangu, nitsomuv̄a yezi hari mwa zinishani.

27‹Atsowatsunga ha tsimbo#2:27 tsimbo: Iyo ãlama ya sheo na utawalizi. ya shuma,

mauri mutru apasuao ziya za ɗongo.›

Nitsomuv̄a ushindzi, mauri wami wajau namuna naupara ha Ɓaɓangu. 28Tsena nitsomuv̄a inyora ya alifadjiri. 29Mwendza makio nakiye izo iRoho aambiao ziDjama Ndziwaminifu.»

Currently Selected:

MUV̄ENULIO 2: swb

Highlight

Compare

Copy