MUV̄ENULIO 1

1Shio ini isuv̄inga umuv̄enulio ha Insa-Kristi, ulio amba Mungu amuv̄a aonese warumishi wahe izo zijao zihidjiri tsi hale. Aujudza ha ndzia ya malayika yahe aiv̄eleha ha murumishi wahe Yuhani, 2alio amba alawa ushahidi piya izo aona, ne ɗe Urongozi wa Mungu na ushahidifu wa Insa-Kristi. 3Aɓarikishiha uwo asomao na wao wakiao yamarongozi ya shi mutrume yashukidziwa, tsena wasikao izo zaangihwa moni v̄av̄o, mana wakati ukuruɓia.

Salamu ha ziDjama Ndziwaminifu saɓa

4Wami Yuhani nisuangishia ziDjama Ndziwaminifu saɓa zilio hari mwa liɓavu la Aziya#1:4 Aziya: Wakati ule Aziya ika lidzina la ɓavu moni mwa uutawalizi wa Romu. Leo itsi ya Turiki ya hari mwa mukaɓala ule.: Urehema na amani nazimuendreleyeni ulawa ha Uwo alio, aka, amwesa ajao, tsena ulawa ha ziroho saɓa zilio mbeli za ishiri ya ufalume yahe, 5na ulawa ha Insa-Kristi, ushahidi muaminifu, udzazi#1:5 udzazi wa handra: Au: wa handra aregezewa hayi ulawa ha uwafu. wa handra wa uwafu, amma shitswa wa wafalume shiv̄andreju mwa tsi.

Ha Uwo ariv̄endzao, arikomboa hari mwa madhambi yatru ha idamu yahe, 6tsena afanya amba wasi ufalume wa Matolezi-Masadaka ha Mungu wahe amma Ɓaɓa, hahe nav̄uke utukufu na ushindzi mida ha mida. Amina.

7Tsuwo, asuja hari mwa mavingu

na piya watsomuona,

ata wao wamuforoa.

Na piya zikaɓila za shiv̄andreju mwa tsi

zitsoulula ha siɓaɓu ya waye.

Ewa! Amina.

8Mwalatru Monyezi Mungu asurongoa: «Wami ɗe uMwandro, amma uMwiso#1:8 uMwandro, amma uMwiso: iShigiriki v̄anu isurongoa Alifa, yaãni, iharufu ya handra ya ialifuɓe ya Shigiriki, na Omega, iharufu ya mwiso yayo. Namusome tsena yamaeledzo hari mwa zikandre za mwiso., Uwo alio, aka, tsena ajao, Monyewe Ushindzi.»

iNida ya Kristi Yuhani aiona

9Wami Yuhani, mwananyanyu nirengao fuvu hari mwa yamatreso, hari mwa ufalume na suɓira ha uv̄umoja watru na Insa, tsika hari mwa ishisiwa ya Patimosa ha siɓaɓu ya Urongozi wa Mungu, na ushahidifu wa Insa 10usikwa yangu na iRoho suku ya Raɓi#1:10 Suku ya Raɓi: Yaãni, Mufumov̄ili mengoni mwa yiMifumov̄ili. Mana, Mufumov̄ili ɗe isuku ya umuregezeo hayi wa Raɓi Insa.. Na v̄av̄o tsikia nyuma hangu ji lendza nguvu mauri ɓaragumu 11larongoa: «Trongo uionao, iangihe hari mwa shio#1:11 shio: iShigiriki isurongoa shio yav̄ambiwa., amwesa uiv̄elehe ha ziDjama Ndziwaminifu saɓa zini: Efeso, Smirna, Pergamu, Tiyatira, Sardesu, Filadelfiya, na Laodiseya.»

12Sa ile tsizingi nione monyewe liji lakolagua na wami. Uzinga yangu, tsiono zihetsi-kombe saɓa#1:12 saɓa: Hari mwa uMuangishio ihisaɓu ya saɓa, iyo ãlama ya shitru yarahara, yakamilishiha. za dhahaɓu. 13Na hari-hari mwa zihetsi-kombe zile, v̄uka mutru akofana na mwana wa mwanadamu. Aka apindri gondra ɗile, amwesa aka aɓanga mukandra wa dhahaɓu shifuɓani. 14Shitswa yahe na zinyole zahe zika ndjeu mauri uv̄amba, mauri pambafuma. Matso yahe yaka mauri jenge la moro, 15mindru yahe yika mauri shaɓa iv̄ev̄enao hari mwa moro, na ji lahe lika mauri ngono ya miro ya maji. 16Hari mwa umuhono wa hume wahe, aka asiki nyora saɓa, na hanyoni hahe v̄wakolawa upanga wakotsindza wakana nguso mbili. Sura yahe ika mauri lijua lamowala ha piya nguvu zalo.

17Wakati namuona, tsipuliha mindruni hahe mauri tsifu. Sa ile anikadza umuhono wa hume wahe ha urongoa: «Usuriye! Wami ɗe nilio wa handra, amma wa hwisa, 18Uwo alio hayi. Tsifu, na tsami tsa hayi mida ha mida, amwesa tsina yimifunguo ya ufa na ya Uzimu wa wafu.

19Ɓasi angiha izo waona, izo zilio, na izo zitsojao ɓaanda ya v̄av̄o. 20Yahusu iãdjaɓu ya nyora saɓa waziona hari mwa muhono wa hume wangu, na zizihetsi-kombe saɓa za dhahaɓu, ɗe ini: zinyora saɓa, izo ɗe zimalayika za ziDjama Ndziwaminifu saɓa, na zizihetsi-kombe saɓa, ɗe ziDjama Ndziwaminifu wizo saɓa.»

Currently Selected:

MUV̄ENULIO 1: swb

Highlight

Compare

Copy