MUV̄ENULIO 16

Nida yahusu zizikombe saɓa za ihadhaɓu ya Mungu

1Wakati ule tsikia ji lendza nguvu lalawa hari mwa iNyumba Ndzitwaharifu, liambia zimalayika saɓa zile: «Namwendre mwaɓuhudze shiv̄andreju mwa tsi zizikombe saɓa za ihadhaɓu ya Mungu.»

2iMalayika ya handra yendre iɓuhudza shikombe yayo shiv̄andreju mwa tsi. Sa ile v̄uhea shondra mbovu yendza utungu hari mwa uwanadamu wakana iãlama ya ishinyama mbovu ile, tsena wakoãɓudu sanamwe layo.

3iMalayika ya v̄ili iɓuhudza ishikombe yayo ɓaharini, na wiyo ifanyiha damu mauri ya mutru afa. Ɓasi piya ziumbe zendza roho zaka ɓaharini zifu.

4iMalayika ya raru iɓuhudza ishikombe yayo hari mwa yimiro na yamatso ya maji, na yao yafanyiha damu. 5Wakati ule tsikia imalayika ya yamaji irongoa:

«Wawe wa haki, wawe ulio, tsena waka,

wawe uMutwaharifu, iv̄o wanamua namuna iyo.

6Mana watri idamu ya watwaharifu na yimitrume,

na wawe uwav̄a damu wanwe;

izo ziwastahiki!»

7Amwesa tsikia italatala ya masadaka irongoa:

«Ewa, Mwalatru Mungu, Monyewe Ushindzi,

yiminamuzi yaho ya kweli, tsena ya haki.»

8iMalayika ya nne iɓuhudza shikombe yayo hari mwa lijua, na wilo liv̄olwa livudze uwanadamu ha umoro. 9Ɓasi uwanadamu wavuwu ha itsav̄e ɓole yalo; na wao wakokufuru lidzina la Mungu aliona iyezi hari mwa yamaɓa yale, ɓadi kawandra toɓa waja wamutukuza.

10iMalayika ya tsano iɓuhudza ishikombe yayo hari mwa ishiri ya ufalume ya ishinyama mbovu, ata v̄ahanu yakotawala v̄ungia shidza. Ɓasi watru wakodzikamanyo uulimi ha utungu. 11Wakomukufuru Mungu Monyewe ziMbingu ha siɓaɓu ya ngutungu zawo na zizondra, ɓadi kawandra toɓa na zitrendrwa zawo.

12iMalayika ya sita iɓuhudza ishikombe yayo hari mwa umuro muɓole wa Efurati. Ɓas, maji yaha, ile indzia ya wafalume wajao ulawa Jua la Uhea itayarishihe. 13Amwesa tsiono v̄ulawa hanyoni ha ishinyama ɓole mufano wa vwayi ile, na hanyoni ha ishinyama mbovu, na hanyoni ha umutrume wa trambo, madjini maovu mararu yakofana na ziwatrotro. 14Yao madjini ya mazetwani yafanyao ãlama za midjuza na uendra ha uwafalume wa piya ishiv̄andre ya tsi iketsiwao, ile yawangulidze wa ikondro ya iSuku Ɓole ya Mungu Monyewe Ushindzi.

15Tsami nisuja mauri mwidzi. Aɓarikishiha uwo alio hashiri, tsena aliona nguo zahe ile asuke wadzi, iaĩɓu yahe isuonehane.

16Yawangulidza v̄ahanu v̄uhiriwao Harmagedoni Shiheɓraniya|Muheɓraniya.

17iMalayika ya saɓa iɓuhudza ishikombe yayo hawani. Ɓasi v̄ulawa moni na iNyumba Ndzitwaharifu ji lendza nguvu hari mwa ishiri ya ufalume, lirongoa: «Itsimidziha!» 18Wakati ule v̄uv̄ene peni, v̄ukilihana maji, maguguma, na mudridrimio muɓole wa ishiv̄andre ya tsi kawaparoka rangu mida wanadamu walio shiv̄andreju mwa tsi. 19liƊago ɓole liãnisiha mafungu mararu. yaMalago ya zinishani yatsapuha-tsapuha, na v̄ale Mungu anahana Ɓaɓiluna liBole, alinosa ishikombe ya ushi wa ihadhaɓu ɓole yahe. 20Ɓasi piya zisiwa zihiɓu, na yimilima kayaparihana tsena. 21Vua ɓole yafa ɓwe lilio amba kula moja likana udziro wa shiv̄imo moja ishukia wanadamu ulawa pev̄oni; na wanadamu wamukufuru Mungu ha siɓaɓu ya liɓa la ivua yafa ɓwe, mana lika dziro halisi.

Currently Selected:

MUV̄ENULIO 16: swb

Highlight

Compare

Copy