MUV̄ENULIO 15

Nida yahusu malayika saɓa na yamaɓa saɓa ya mwiso

1Amwesa tsiono tsena ãlama ya midjuza yangina pev̄oni, ɓole itaãdjaɓisao: malayika saɓa zaka zasika yamaɓa saɓa ya mwiso, mana ha yao ɗe ihadhaɓu ya Mungu itsimidzihao. 2Tsiono tsena mauri ɓahari ya shiɗo yatsangana na moro, na wale washindra ishinyama mbovu na lisanamwe layo, na ihisaɓu ya lidzina layo, waka wahimi uju na iɓahari ya shiɗo ile, tsena waka wasiki yamadzendze ya Mungu. 3Wakohimba lidjimbo la Musa, umurumishi wa Mungu, na lidjimbo la uMwana Ɓariɓari:

«Zitrendro zaho ɓole zendza ãdjaɓu,

Mola Mungu, Monyewe ushindzi.

Ndzia zaho za haki, tsena za kweli,

wawe uMufalume wa zinishani#15:3 uMufalume wa zinishani: Nusu ya zizio za Shigiriki zisurongoa: Mufalume wa daima..

4Mbani katsoria,

wala katsotukuza dzina laho Mola?

Mana wawe weke ɗe Mutwaharifu.

Na piya zinishani zitsoja,

amwesa zitsosudjudia mbeli zaho,

mana uhaki waho uv̄enuha.»

5Ɓaanda ya v̄ale tsiono iNyumba Ndzitwaharifu|Nyumba Ndzitwaharifu, liƁanga la Haima la Ushahidi liɓulwa pev̄oni, 6na zimalayika saɓa zaka zasika yamaɓa saɓa zilawa hari mwa iNyumba Ndzitwaharifu. Zika zipindri nguo za kitani sahe-sahe zakowala, amwesa zika ziɓanga na mikandra ya dhahaɓu shifuɓani. 7Wakati ule moja mengoni mwa ziziumbe nne zendza roho zile iv̄a zimalayika saɓa zile zikombe saɓa za dhahaɓu zajaya na ihadhaɓu ya Mungu aẽshio mida ha mida. 8Ɓasi iNyumba Ndzitwaharifu ijaya mwesi ha siɓaɓu ya utukufu wa Mungu na ushindzi wahe, ata kav̄waka yotsi akoshindra angiye moni mwa iNyumba Ndzitwaharifu mupaka yamaɓa saɓa yale ya zimalayika saɓa yakome.

Currently Selected:

MUV̄ENULIO 15: swb

Highlight

Compare

Copy