MUV̄ENULIO 12

Nida yahusu mutrumushe na shinyama ɓole mufano wa vwayi

1V̄uv̄enuha kudura ɓole pev̄oni: mutrumushe apindrisiwa lijua, akana umwezi utsini na yimindru yahe, na kemba ya nyora kumi na mbili shitswani hahe. 2Akana hamili, tsena akolatsa keme ha utungu wa madzazi. 3Ɓasi v̄uv̄enuha kudura yangina mbinguni: shinyama ɓole mufano wa vwayi yendza range ndzukundru yaiva. Ikana zitswa saɓa na nyonga kumi, na hari mwa zitswa zayo, kemba saɓa. 4uMushia wayo wakogogora lifungu la raru la zinyora za mbinguni, na uwo uzivutsu shiv̄andreju mwa tsi. Shinyama ile ihimi mbeli za mutrumushe ule akwendra adze, ile iɗye mwana wahe amohisodza. 5Aja adza mutruɓaɓa, mwana mume, akoja atsunge piya zinishani ha tsimbo#12:5 tsimbo: Iyo ãlama ya sheo na utawalizi. ya shuma. Na umwana wahe av̄elehwa ha Mungu na ishiri ya ufalume yahe. 6Ɓadi umutrumushe atrala, andre padzaju, v̄ulio amba Mungu aka amurengeledzea v̄ahanu, ile alisiwe muda wa suku alifu wa miyateni wa sitini.

7Wakati ule v̄uhimi kondro pev̄oni. Mikayilu#12:7 Mikayilu: Uwo ɗe shitswa wa zimalayika. na malayika zahe wawana na ishinyama ɓole ile. Na ishinyama ile wajau v̄umoja na zimalayika zayo iwana, 8ɓadi kayashindra, ata kav̄waparihana tsena ɓandza pev̄oni amba lawo. 9Ɓasi v̄ale ivutswa utsini, ishinyama ɓole, ne ɗe inyoha ya ãswili ihiriwao Iɓilisa amma Shetwani, uwo adanganyao ulemengu kamili. Avutswa shiv̄andreju mwa tsi, na zimalayika zahe v̄umoja na waye.

10Ɓas v̄ale tsikia ulawa pev̄oni ji lendza nguvu lakorongoa:

«Av̄asav̄anu ziwaswili uwokovu,

ushindzi, utawalizi wa Mungu watru,

na iyezi ya Kristi wahe.

Mana avutswa v̄ondze, umusingidza wa wananyatru

akowasingidza mbeli za Mungu watru uku na mutsana.

11Na wao wamushindri ha idamu ya uMwana Ɓariɓari,

na ha urongozi wa ushahidifu wawo;

mana kawav̄endza uhayati wawo

ata waka tayari ya ufa.

12Ɓasi namufurahi wanyu zimbingu,

na wanyu muziketsio!

Ɓadi djondo trini hanyuju

wanyu shiv̄andre ya tsi na iɓahari,

mana Iɓilisa amushukiani

na hasera mangavu,

iv̄o ajuao amba wakati wahe wa mushashi.»

13Wakati ishinyama ɓole yaona amba ivutswa shiv̄andreju mwa tsi, iɗungu mutrumushe ule adza mwana mutruɓaɓa. 14Ɓasi maɓawa maili ya kwezi ɓole yav̄olwa umutrumushe, ile av̄euhe, andre padzaju, v̄ahanu hahe atsolisiwao hari mwa muda, mida, na inusu ya muda, mbali na inyoha. 15iNyoha itowo maji mauri muro hanyoni mengoni ha umutrumushe, ile av̄ingwe ha umuro. 16Ɓadi ishiv̄andre ya tsi ihuyi umutrumushe, iɓua ihanyo yayo, imedze umuro ishinyama ɓole yaka yautoa hanyoni hayo. 17Ɓasi v̄ale ishinyama ɓole ile ihadhaɓiha kinyume na umutrumushe, ilawa yawane kinyume na zilembwe zasalia zahe, wale wasika ãmuri za Mungu na uv̄inga ushahidi wa Insa. 18Amwesa ilimbala#12:18 ilimbala: V̄wa na zio za Shigiriki zirongoao: na wami tsilimbala, amwesa zitsanganisa mustari unu na 13:1. hari mwa umutsanga wa iɓahari.

Currently Selected:

MUV̄ENULIO 12: swb

Highlight

Compare

Copy