MAFILIPI 3

iNdzia ya mutru uhakishiha mbeli za Mungu

1Yaɓaki, wananyangu wa shi uaminifu, namufurahi hari mwa uv̄umoja wanyu na Raɓi. Kaisunitaãɓisha umuangishiani trongo ɗe wizo-wizo, na hanyuju, iyo hifadhwi.

2Namuke hashiri na wao wadziv̄ingao mauri mbwa, namuke hashiri na warendrezi-mbovu wao, namuke hashiri na wakatrizi-mwili wao. 3Mana watahiriwa wa kweli ɗe wasi, wasi riãɓuduo ha iRoho ya Mungu, ridzifaharishao hari mwa uv̄umoja watru na Kristi-Insa, tsena rilio amba karisutria tama yatru hari mwa uɓinadamu. 4Na v̄ale, tsina furswa za utria tama yangu wajau hari mwa uɓinadamu.

Neka v̄wa wangina waonao amba wana furswa ya utria tama yawo hari mwa trongo za shimwili, ɓasi wami tsizidi furswa: 5tsitahiriwa isuku ya nane, Muisraila, wa udjama wa Ɓenyamini, Muheɓraniya nadzalwa na Maheɓraniya; yahusu iSharia, wami Mufarisayo; 6yahusu djitihadi, amba mutresa wa iDjama Ndziwaminifu; yahusu uhaki wa utuĩ iSharia, tsakana tuhuma.

7Ɓadi izo zaka amba faida hanguju, tsija tsiziono amba hasara ha siɓaɓu ya Kristi. 8Wala tsi tu, ɓadi nisuona raha piya amba hasara namoangalia ifaida yazidi ya umujua Kristi-Insa Raɓi wangu, alio amba ha siɓaɓu ya waye, tsilishi piya, tsena nisuziona piya mauri tsama, ne nimupare Kristi, 9niparihane hari mwa uv̄umoja na waye, wala tsi amba ha muhakisho wangu monyewe ujao ha ulawana na iSharia, ɓadi ɗe uwo ujao ha uaminifu na Kristi, muhakisho ulawao ha Mungu, tsena waketsi hari mwa uaminifu. 10iNia yangu ɗe wami umujua waye, na ushindzi wa umuregezeo hayi wahe, amma na urenga ushirika na waye hari mwa maondo yahe, na ulingana na waye hari mwa ufa wahe, 11ile neka trongo mukinishiha, niwaswili hari mwa umuregezeo hayi ulawa ha wao wafa.

Djitihadi ya uwaswili mupakaju

12Na v̄anu kaisi amba madza tsipara itrongo, au madza tsikamiliha, ɓadi nisusimamia ile niipare, iv̄o wami-wami naparihana na Kristi-Insa. 13Wananyangu, tsisudzihetsi amba madza tsiipara, ɓadi trongo moja ini ɗe niifanyao: ɗe ha udziɗelesa zile zav̄ira na ulembea ne nisike ile ilio mbeli, 14nisusimamia ne niwaswili mupakaju, ile nipare ihishima amma ɗe umuhirio wa Mungu pev̄oni hari mwa uv̄umoja na Kristi-Insa.

15Ɓasi v̄av̄o neka wasi rikamilishiha, nariɓaki hari mwa fikira iyo; na neka v̄wa trongo ilio amba musuiona namuna yangina, Mungu atsomuv̄enuliani wajau inamuna yayo. 16Namuna yotsi itsokao, v̄anu rawaswili, narendre mbeli na indzia wiyo-wiyo.

17Wananyangu, namurenge mufano wangu. Namuv̄elehe yamatso hari mwa wao waɗungao umufano muonao hatru. 18Mana wengi tu, madza tsimuambiani wakati mwengi na nisumuambiani raha av̄asa, tsena ha matsozi, ɗe wadziv̄ingao shi ãduwi wa umuri wa pawa|muri wa pawa wa Kristi. 19uMwiso wawo ɗe uangamifu; mungu wawo ɗe mimba zawo, wao uv̄a utukufu ile iwapatsao aĩɓu, na fikira zawo za shiulemenguni. 20Ɓadi wasi, uraĩa watru wa shipev̄oni, v̄ulio amba risulindra ulawa uMuhuyifu, ne ɗe Raɓi Insa-Kristi, 21alio amba atsogaudza mwili muv̄ungufu watru, aufanye mutukufu mauri ɗe wahe mwili, ha ushindzi umuruhusuo ahetsi zitru piya utsini na yezi yahe.

Currently Selected:

MAFILIPI 3: swb

Highlight

Copy