MAFILIPI 2

Uwekevu na uhu wa Kristi

1Ɓasi neka amba v̄wa mwana mutrilio-ɓari hari mwa uv̄umoja wanyu na Kristi, neka v̄wa mwana mutrulidzio alawao ha uv̄endza wahe, neka v̄wa uv̄umoja na iRoho, neka v̄wa mwana uwema na poreho, 2v̄av̄o namukamilishe furaha yangu ha wanyu ukana uv̄umoja: namukane uv̄endza moja, roho moja na nia moja. 3Musufanye itsokao yotsi ha mashindrano, wala ha udzirendra, ɓadi ha uwekevu, namuone wasalia ɓorwa rahana wanyu. 4Isuke amba mutru asuangalia ɗe zahe tu, ɓadi na za wanyahe.

5Namukane wanyu na wanyu inamuna Kristi-Insa akanayo:

6Waye alio amba aka hali moja na Mungu,

kaona uka yahe sawa na Mungu amba trongo ya usika,

7ɓadi adzitsuliawo waye monyewe ha udzifanya murumwa,

ha urendreha mufano wa wanadamu;

mutru amomuona, akoona mwanadamu.

8Adzishukidza waye ha waye

ha ufanyiha mutuĩvu ata mupaka ufaju,

ufa hari mwa muri wa pawa.

9Iyo ɗe imana ata Mungu amuhedza hari mwa liɓandza

la uju rahana piya,

amwesa amuv̄a lidzina lilio uju rahana kula dzina,

10ile ha lidzina la Insa

kula dondro liv̄erehe ha umusudjudia,

rangu mbinguni, shiv̄andreju mwa tsi, ata uzimu,

11tsena kula hanyo ikuɓali ha hadhwira

amba Insa-Kristi ɗe Raɓi,

ha utukufu wa Mungu amma Ɓaɓa.

Maaminifu nawawaliye ulemengu

12Ha izo wav̄endzewa wangu, mauri ɗe inamuna dahari mwatuĩ, ɓila tsi tu amba namoka v̄umoja na wanyu, ɓadi zaidi av̄asa ilio amba tsisi na wanyu, namuendreleye utria ndziani ha hofu na staha uhuyifu wanyu. 13Mana Mungu ɗe Monyewe utria moni hanyu iutsaha na iurendra ha ulingana na mav̄endzeleo yahe.

14Namufanye trongo piya pasipo ya unguruma ɓila mashindrano, 15ile musuparihane na tuhuma, ɓadi muke watru warahara, wana wa Mungu kawasina pandra mbeli za lidunia ɓovu dziãswifu lini, lilio amba moni halo musuwala mauri mwenge hari mwa ulemengu, 16ha uv̄inga urongozi wa uhayati. V̄av̄o nitsojua nidziɓuwe isuku ya Kristi#2:16 isuku ya Kristi: Yaãni, isuku Kristi atsoregeao., amba mbio zangu kazaka za ɓanaraju, na izo nadziruma nazo, tsi amba kazina mana. 17Ɓadi ata wala ukana idamu yangu isujotsomolwa amba kafara hari mwa lisadaka la urumishi wa uaminifu wanyu, ne nisufurahi nayo, tsena nisufurahi v̄umoja na wanyu piyanyu. 18Ɓasi ɗe inamuna iyo wajau, namufurahi wanyu, namufurahi v̄umoja na wami.

iTama ya Ɓaulusu ya umuv̄eleha Timutausu na Eɓafroditi ha yaMafilipi

19Nisutumainia hari mwa uv̄umoja wa Raɓi Insa, nimuv̄elesheyeni Timutausu hari mwa muda wa tsi hale, ile wami-wami nitrilihe ɓari namopara haɓari zanyu. 20Mana tsisina wangina alio fikira moja na wami, amba ashuhulihe ha kweli na izo zamuhusuni. 21Kweli amba wasalia piya wasuzunguha faida zawo wenyewe, ɓadi tsi ɗe za Insa-Kristi. 22Ɓadi musujua martaɓa yahe, namuna afanya hazi na wami mauri mwana na ɓaɓahe, ha uendresa mbeli iIndjili. 23Ɓasi nisutumainia nimuv̄elesheyeniwo namoona ha uzuri izo zanihusu. 24Na tsina uaminifu hari mwa uv̄umoja wa Raɓi amba wami-wami ne nitsoja tsi hale.

25Tsiono muhimu ya umurudisiani Eɓafroditi, mwananyangu wa shi uaminifu, mushangirizi wangu amma munyangu hari mwa uwanilia iIndjili mwaka mwaniv̄elesheawo amba muv̄ingizi-musada, ile anirumishiye hari mwa izo zakonikosea, 26mana ana ushauku muɓole wa umuonani piyanyu, tsena aka aremwa na hamu iv̄o mwakia amba akokodza. 27Kweli amba akokodza, ata aka kariɓu na ufa. Ɓadi Mungu akana poreho na waye, wala tsi na waye tu, ɓadi na wami wajau, ile nasukane huzuni uju na huzuni. 28Ɓasi iyo ɗe imana nazidi ukana inia ya umuv̄eleha, ile mufurahi mwamomuona raha, na wami niv̄unguhe huzuni. 29Namumurenge hari mwa uv̄umoja na Raɓi na furaha ndzikamilifu; namuhishimu watru mauri ɗe waye, 30mana ɗe ha siɓaɓu ya urumishi wa Kristi ɗe aka kariɓu na ufa. Ahatwarisha uhayati wahe ha urenga liɓandza lanyu la utsimidza urumishi hanguju, urumishi ulio amba wanyu wenyewe kamwakojua mwaniv̄ingia.

Currently Selected:

MAFILIPI 2: swb

Highlight

Copy