YAKOƁU 3

Mutru naziye ulimi wahe

1Mwasuke wengi wa utsaha amba musomedze, wananyangu, mana musujua amba wasi risomedzao, ritsopara hukuma ndziro zaidi. 2Wasi piyasi ukwala ha namuna nyengi. Neka mutru kasukwala ha urongozi, uwo mutru arahara, ashindrao aziye piya mwili wahe.

3Ramotria mahazamu moni na ihanyo ya farasi ile irituĩ, v̄av̄o risuendresa wajau piya umwili wayo. 4Namuangaliye wajau zimarikaɓu: wala ukana amba izo ɓole, na amba pev̄o ndziro uzisukuma, izo uendresewa na mwana usukani mutiti, ha uɗunga mav̄endzeleo ya umuv̄ingizi. 5Ɓasi ɗe namuna iyo wajau ulimi, iyo shiga titi hari mwa umwili, ɓadi uwo ushindrodzisifu na trongo ɓole. Namufikiri tu mwana moro namuna ushindrao uvudze shitsaha ha uɓole. 6Na ulimi wajau, uwo moro. Uwo dunia la upeu liliona ɓandza hari mwa ziga za umwili watru. Uwo utria pandra piya umwili, na uvudza piya maendreleo ya maẽsha ya mutru, wakati ulio amba uwo-uwo uvudzwa na umoro wa Djahanama.

7Piya aina za zinyama, rangu nyunyi, zirambao, na zinyama za ɓaharini, ushindra zitsungwe, tsena zitsungwa na umwanadamu, 8ɓadi ulimi, kav̄u mutru ashindrao autsunge. Uwo upeu kautrulia, wajaya sumu liulao.

9Ha uwo, wasi umusifu Mola amma Ɓaɓa, na ha uwo tsena wasi ulaãni wanadamu wafanyiwa mufano wa Mungu. 10Ha ihanyo wiyo-wiyo ulawa umusifio na umulaãnio. Wananyangu, kayalazimu yaka namuna iyo. 11Hali dzitso la maji utoa hari mwa foro wilo-wilo maji ya ɓaridi na maji ya shingo? 12Wananyanguni, hali mufigiye#3:12 mufigiye: Uwo aina ya muri udzao mbia ziliona ngizi zijiv̄ao. Shifarantsa muri uwo uhiriwa «figuier», na mbia zawo «figue». ushindra udze zaituni, au muzaɓiɓu udze mafigi? Ɓasi dzitso la maji ya shingo wajau, kalishindri utoa maji manoha.

Hikima ya kweli

13Uv̄i mengoni mwanyu alio mwendza hikima, tsena mwendza ujuzi? Ɓasi mutru uwo nav̄enuwe ha umuendreleo mwema wahe zitrendro zahe, ha umakini v̄umoja na hikima. 14Ɓadi neka rohoni hanyu muna uwivu muhali, na taɓia ya udziwanilia, ɓasi mwasudzifahari, wala mwasulaɓe ikweli. 15Hikima iyo tsi ɗe ilawao uju, ɓadi ya shiduniani, ya shiuɓinadamu, ya shiushetwani. 16Mana v̄ahanu v̄ulio uwivu na taɓia ya udziwanilia, v̄av̄o uka musadjadja na kula aina ya taɓia mbi.

17Hikima ya shi uju, iyo uka raɓuzi ndziraharifu, amwesa yendza amani, ndzitrulivu, tsena ndzielevu; iyo ujaya poreho, tsena ukana mavuna mema, ɓila uɓanguzi, wala unafiki. 18Na mavuna ya ihaki utsanywa hari mwa amani na matria-amani.

Currently Selected:

YAKOƁU 3: swb

Highlight

Compare

Copy