YAKOƁU 2

Utsahulivu kawalazimu waka

1Wananyangu, v̄wasuke uɓanguzi wa sura hari mwa uaminifu wanyu na Raɓi mutukufu watru Insa-Kristi. 2Neka ha mufano v̄usungia mutru v̄ahanu mungulidzanao amba atria pere ya dhahaɓu na vao lendza sheo, amwesa v̄usungia wajau masikini apindra marandro, 3ɓasi amba musushapiha na ule apindra livao lendza sheo ha umuambia: «Wawe ketsi v̄anu hari mwa ɓandza la sheo lini», wakati ulio amba musuambia masikini ile: «Wawe hima hule», au: «Ketsi mindruni hangu», 4hali v̄av̄o kamusufanya uɓanguzi wa sura hari mwanyu, kamwafanyiha wanamuzi wendza fikira mbovu?

5Namuvulishiye wananya wa shi uaminifu wav̄endzewa wangu: afa Mungu katsahua wao walio masikini mbeli za ulemengu, amba waka matadjiri hari mwa uaminifu, tsena mawarithi wa utawalizi autolea wahadi ha wao wamuv̄endzao? 6Na wanyu musudharau zimasikini! Matadjiri yao tsi ɗe wamurendraoni nnayi na umuv̄ingani mbeli za mahakama mwa? 7Hali wao tsi ɗe wadhilio liDzina dzuzuri livumbulwao hanyuju?

8Ɓila shaka neka musutsimidza isharia ya shiufalume yalawana na uMuangishio amba: «Utsov̄endza munyaho mauri ɗe iwawe yaho»,#2:8 Namuangaliye Walawi 19:18. v̄av̄o musufanya ndjema. 9Ɓadi neka musufanya utsahulivu, v̄av̄o musuãswi, na iSharia isumunamuani amba mwa maãswifu. 10Na yotsi aɗungao piya iSharia, ne aja akwala hari mwa trundra moja tu, v̄av̄o afanyiha muãswifu hari mwa ukamilifu wayo. 11Mana Uwo arongoa: «Kutsofanya zina»,#2:11 Namuangaliye Mulawiyo 20:14; Munahanisidziyo wa iSharia 5:18. arongoa wajau: «Kutsoula».#2:11 Namuangaliye Mulawiyo 20:13; Munahanisidziyo wa iSharia 5:17. Ɓasi neka kusufanya zina, ɓadi usuula, v̄av̄o ufanyiha muãswifu wa iSharia.

12Namulaguwe na urendra shi watru watsohukumulwao ulawana na sharia ya shi unafasi. 13Mana hukuma kaikana poreho ha mutru kasuonesa poreho. Poreho, lilo ushindra hukuma.

Uaminifu kauna zitrendro kaukana faida

14Wananyangu, faida trini ha mutru arongoao amba ana uaminifu, ne kasina zitrendro? Hali uaminifu ushindra umuhuyi? 15Neka mwananya wa shi uaminifu mutruɓaɓa au mutrumama akosewa na ya upindra au kasina shahula ya umulela, 16ɓasi amba moja hari mwanyu asumuambia: «Endra ha usalama, upare joro, amwesa ukure fetre» ɓila umuv̄a izo zalazimu pare aẽshi, itsokana faida trini? 17Ɗe ha inamuna iyo na uaminifu: neka kausina zitrendro, uwo ufa dzawo monyewe.

18Mukinishiha amba v̄wa atsorongoao: «Wawe una uaminifu, wami tsina zitrendro». Ɓasi nionese uaminifu waho kawaɗungana na zitrendro, na wami ha zitrendro zangu nitsohuonesa uaminifu wangu. 19Usuamini amba Mungu moja? Usufanya fetre. Mazetwani uiamini wajau, tsena yasudridrima.

20Usutsaha udhiɓitifu, wawe shiumbe ndzijinga, amba uaminifu kawaɗungwa na zitrendro, uwo kauna mana? 21Mudzaɗe watru Iɓrahima, afa kapara muhakisho ha siɓaɓu ya zitrendro, amba akotamania umwana wahe Isiaka hari mwa talatala ya masadaka? 22Usuona v̄anu amba uaminifu uka uɗungwa na zitrendro zahe, na ha ulawana na zitrendro zizo, ɗe uaminifu wakamilishiha. 23Ɗe inamuna iyo ɗe urongozi wa uMuangishio unu watsimidziha: «Iɓrahima amuamini Mungu, na iyo itsongesha muhakikisho wahe»,#2:23 Namuangaliye Mwandro 15:6. amwesa ahirwa mwandzani wa Mungu. 24Musuona amba ɗe ha ulawana na zitrendro ɗe shiumbe mwanadamu ihakishihao, ɓadi tsi ha uaminifu tu ɓasi.

25 Rahaɓati lisusu kahakishiha wajau ha zitrendro iv̄o akariɓisa marengezi-haɓari, amwesa awaregeza ha uwav̄irisa ndzia yangina? 26Ɓasi mauri mwili kauna roho ukao amba ufu, ɗe inamuna iyo wajau, uaminifu kawaɗungwa na zitrendro ukao amba ufu.

Currently Selected:

YAKOƁU 2: swb

Highlight

Compare

Copy