MAHEƁRANIYA 5

1Kweli amba kula Muɓole wa Matolezi-Masadaka arengwa hari mwa uwanadamu, uv̄olwa djukuma la urumishia Mungu ha tanafu ya uwanadamu, ile awatoleye makafara na masadaka ha siɓaɓu ya madhambi. 2Waye ushindra aelewe wao walio amba kawaji, tsena walatsiha, iv̄o ilio amba waye-waye ne mulemevu. 3Ɗe ha siɓaɓu ya ulemevu uwo ɗe alazimu adzitoleye waye-waye masadaka ha siɓaɓu ya madhambi, atoleye na wanadamu masadaka ha siɓaɓu ya madhambi yawo.

4Na kav̄u mutru adziv̄ao monyewe isheo iyo, mutru uhiriwa na Mungu akaneyo, mauri ɗe Haruna waye-waye. 5Ɗe inamuna iyo wajau, Kristi kadziv̄a waye monyewe utukufu wa ufanyiha Muɓole wa Matolezi-Masadaka; aupara ha Uwo amuambia amba:

«Wawe Mwana wangu;

ileo ini tsifanyiha Ɓaɓaho.»#5:5 Namuangaliye Utende 2:7. Zizio za hale zisurongoa tsihudza.

6Mauri ɗe inamuna arongoao raha v̄ahanu v̄wangina:

«Wawe wa Mutolezi-Masadaka wa daima,

mauri ɗe inamuna ya Melkisedeki.»#5:6 Namuangaliye Utende 110:4.

7Uka yahe ha shimwili, av̄eleha mamilio na mirayilio ha shililo ɓole na matsozi ha Uwo akoshindra amuhuyi na ufa; na waye atakaɓaliwa ha siɓaɓu ya utuĩvu wahe. 8Ata ha iv̄o aka Mwana, afundriha utuĩ ha maondo ayaona. 9Na ɓaanda akamilishiha, afanyiha ha piya wao wamutuĩo koho la uhuyifu wa daima, 10ɓaanda Mungu amufanya Muɓole wa Matolezi-Masadaka, mauri ɗe inamuna ya Melkisedeki.

Mufahamisho hari mwa trongo ya ulatsa uaminifu

11Hari mwa trongo iyo, rina nyengi za urongoa zilio ndziro za ueledza, ha iv̄o mwafanyiha wadziro wa uelewa. 12Wala ukana ika ilazimu muke wasomedza iv̄o mida yiyo yav̄ira, ne musutsaha raha musomedzewe ziharufu za handra za marongozi ya Mungu. Mufanyiha amba musutsaha dzia raha, ɓadi tsi shahula mangavu. 13Na yotsi alio amba raha a hari mwa dzia, uwo kasina maãrifa ya urongozi wa haki: a mwanamutsa. 14Ɓadi shahula mangavu, ya watru waɓalihi, walio amba koho la unamuzi lawo lihodarishiha hari mwa trongo ya utafautisha indjema na imbovu.

Currently Selected:

MAHEƁRANIYA 5: swb

Highlight

Compare

Copy