MAHEƁRANIYA 6

1Ha izo, narilawe hari mwa ziharufu za handra za umusomo wahusu Kristi, ritsengeleye ata hari mwa ukamilifu wa umusomo, wala tsi ha utria misingi raha: ɗe uendra toɓa ha zitrendrwa mbovu ziv̄ingao hari mwa ufa, uaminifu na Mungu, 2musomo wa yimiɓaĩsho, mukadzio-mihono, muregezeo hayi wa uwafu, na hukuma ya daima. 3Iyo ɗe trongo rijao riifanye, neka Mungu av̄endze.

4Tsi mukinishiha amba wao waunishiwa suku, wapara ladha ya ineema ya shipev̄oni, warenga fuvu na iRoho Ndzitwaharifu, 5wapara ladha ya urongozi mwema wa Mungu na zingushindzi za ulemengu ujao, 6amwesa amba walatsa uaminifu, tsi mukinishiha amba wav̄ingwe wandre toɓa mara yangina. Mana v̄av̄o wao ha wao ɗe waremao raha mizumari uMwana wa Mungu hari mwa muri wa pawa, tsena wamupuao sheo ha hadhwira.

7Kweli amba wakati shiv̄andre ya tsi ilowao daima-daima ha maji ya vua, iv̄ao mimea yifayidishao walimizi wayo, iyo uɓarikishiwa na Mungu. 8Ɓadi neka isuv̄a zimea zendza miɓa v̄umoja na muri-muɓa, iyo ufanyiha amba kaina faida, uka kariɓu na ulaãniwa, ata mwisoni utrilwa moro.

9Wala ukana risulagua namuna iyo, yahusu wanyu wav̄endzewa, rina yakini amba mwa hari mwa indzia ndjema, ne ɗe ya uhuyifu. 10Mana Mungu tsi mudhuluma amba aɗele urumishi wanyu, wala uv̄endza mwauv̄enua ha siɓaɓu ya dzina lahe ha urumishia watwaharifu, tsena ata av̄asa. 11Ɓadi risutsaha amba kula moja hari mwanyu av̄enuwe djitihadi ɗe wiyo-wiyo ata mupaka mwisoni, ile itama mulionayo iyakinishihe. 12Musufanyihe wendza shiɗa, ɓadi mutiɓe wao walio amba, ha uaminifu na suɓira, wasupara umwaratha watolwa wahadi.

Mungu amotoa wahadi, waye uutsimidza

13Wakati Mungu akomutolea wahadi Iɓrahima, ha iv̄o kav̄u muɓole zaidi ya waye amba atsolav̄a na waye, alav̄a na iwaye yahe. 14Arongoa: «Ha yakini nitsohuɓarikisha ɓaraka ha uwengi, tsena nitsozidisha ndzao yaho.»#6:14 Namuangaliye Mwandro 22:17. 15Ha izo ɓaanda asuɓiridza, Iɓrahima apara iyo aka atolewa wahadi.

16Wanadamu ulav̄a na uwo alio muɓole rahana wao, na umulav̄io uwo ha uhakikisha marongozi yawo, utria kifu piya mashindrano. 17Na Mungu iv̄o akotsaha aonese mawarithi wa uwahadi amba inia yahe kaigauha, aishadidisha ha mulav̄io. 18Ha izo, trongo mbili kazigauha, zilio amba hari mwazo tsi mukinishiha Mungu urongoa trambo, zisuriv̄ingia mutrilio-ɓari muhodari, wasi rilio amba umuɓamio watru uka ɗe udzifungamanisa na itama rahetsiwayo. 19iTama iyo rinayo mauri nanga hodari tsena mangavu ya iroho. Iyo ungia ata uv̄iria umusutru, 20v̄ahanu Insa angia amba mutrangulia ha tanafu yatru. Afanyiha Muɓole wa Matolezi-Masadaka wa daima, mauri ɗe inamuna ya Melkisedeki.

Currently Selected:

MAHEƁRANIYA 6: swb

Highlight

Compare

Copy