MAHEƁRANIYA 4

1Ɓasi iv̄o raha uwahadi wa ungia hari mwa uv̄umuzi wahe ulio v̄av̄o, narifahamu v̄usuke ata moja mengoni mwanyu amba kaupara, 2mana rijudziwa iHaɓari Ndjema mauri ɗe watru wao. Ɓadi urongozi waukia kawawafayidisha na itsokao yotsi, iv̄o kawaukia ha uaminifu. 3Kweli amba wasi riaminio, risungia hari mwa uv̄umuzi Mungu aurongoa amba:

«Ɓasi tsilav̄a yamini ha hasera yangu:

Kawatsongia ata hata hari mwa uv̄umuzi wangu.»#4:3 Namuangaliye Utende 95:11.

Na v̄av̄o hazi zahe zika zimalidziha rangu lidunia laumbwa. 4Kweli v̄wa v̄ahanu arongoa yahusu isuku ya saɓa amba: «Mungu av̄umua na piya zihazi zahe isuku ya saɓa.»#4:4 Namuangaliye Mwandro 2:2. 5Na tsena, arongoa raha hari mwa mustari unu: «Kawatsongia ata hata hari mwa uv̄umuzi wangu.»

6Ɓasi ɓaanda yahetsiwa amba ɓaãdhwi ɗe watsoungiao, na wa handra wao wakia iHaɓari Ndjema kawaungia ha siɓaɓu ya umuharalio wa utuĩ wawo, 7Mungu ahetsi tsena suku yangina ihiriwao «Leo», ha urongoa ɓaanda ya muda mwengi ha ndzia ya Daudu marongozi yanu madza yarongolwa unyuma oho amba:

«iLeo ini, neka musukia ji lahe,

mwasukaidishe roho zanyu.»#4:7 Namuangaliye Utende 95:7,8.

8Kweli amba na djeli Yeshua aka awav̄a uv̄umuzi, Mungu katsorongoa ɓaanda ya v̄av̄o trongo ya suku yangina. 9Ha izo, v̄wa uv̄umuzi ha watru wa Mungu, mauri ɗe wahe isuku ya saɓa. 10Mana uwo angiao hari mwa uv̄umuzi wa Mungu, v̄av̄o asuv̄umua wajau na zihazi zahe, mauri ɗe Mungu na zahe. 11Ɓasi narifanye djitihadi ya ungia hari mwa uv̄umuzi uwo, ile v̄wasuke mutru apuliha ha namuna ɗe wiyo ile ha uhara utuĩ.

12Mana urongozi wa Mungu uwo wa hayi, wa hazini, tsena usutsindza rahana sembea lendza nguso mbili; uwo ungia ata utsapua umo na iroho, na zizifungo na yamatra ya miɓa; uwo unamua zifikira na zinia za iroho. 13Kav̄u shiumbe yamudzamishia: piya zitru za wadzi-wadzi matsoni ha Uwo alio amba irilazimu ridzieledze.

Insa Muɓole wa yaMatolezi-Masadaka

14Ɓasi ha iv̄o riliona Mutolezi-Masadaka azidi uɓole av̄ira zimbingu, Insa, uMwana wa Mungu, narisike hodari uaminifu riukuɓalio ha hadhwira. 15Mana karisina Mutolezi-Masadaka Muɓole kaelewa ulemevu watru; aka adjereɓiwa hari mwa piya zitrongo mauri ɗe wasi, ɓadi kaãswi. 16Ɓasi narijiliye v̄umoja na yakini ishiri ya yezi ya urehema, ile ripare poreho na urehema, risaidiwe hari mwa uwakati walazimu.

Currently Selected:

MAHEƁRANIYA 4: swb

Highlight

Copy