MAHEƁRANIYA 11

Uaminifu wa watru wa hale

1Na uaminifu, uwo ɗe iyakini ya iyo mutru atumainiao, muhakikisho wa izo mutru kasuziona. 2Ɗe ha uwo ɗe uwadzaɗe wakorongolwa na sifa.

3Ha uaminifu ɗe rielewao amba ulemengu ufanyiwa ha urongozi wa Mungu, ha namuna amba izo zionehanao, kazalawa hari mwa zionehanao.

4Ha uaminifu, ɗe Haɓilu amutolea Mungu sadaka ɓorwa rahana la Kayinu. Na ha wilo apara ushahidifu wa mukuɓalisho wahe, iv̄o Mungu waye-waye akuɓali izo amutamaniazo. Na ha uaminifu wahe uwo, ata iv̄o afa, ne raha asulagua.

5Ha uaminifu ɗe Henoki arengwa, ha namuna amba asuone ufa. Kaparihana tsena, mana Mungu amurenge. Na kaɓula ya waye urengwa, apara ushahidifu amba akomujiv̄idza Mungu. 6Mana neka tsi ha uaminifu, tsi trongo mukinishiha amba mutru amujiv̄idze Mungu, mana uwo amukuruɓiao, alazimu aamini amba a v̄av̄o, tsena amba waye uv̄a thawaɓu wao wamuzunguhao.

7Ha uaminifu ɗe Nuhu ufahamishiwa yahe na Mungu na trongo zilio amba raha kazakoonehana, ha utuĩvu wahe, afanya djahazi ile ahuyi udjama wahe. Ɗe ha uwo ɗe ahukumu ulemengu, amwesa afanyiha muarithi wa umuhakisho uparihanao ha uaminifu.

8Ha uaminifu ɗe Iɓrahima atuĩ uhiriwa yahe andre v̄ahanu v̄ulio amba akoja av̄upare mwaratha. Alawa ɓila ujua v̄ahanu akwendra. 9Ha uaminifu ɗe aja aẽshi shi mudjeni hari mwa tsi aka atolewayo wahadi. Akoẽshi hari mwa maɓanga ya haima, amma na Isiaka na Yaãkuɓu, walio amba waka warithi v̄umoja na waye wahadi uwo-uwo. 10Mana akotumainia liɗago liliona misingi mihodari, lilio amba Mungu waye-waye ɗe aliɓunu tsena aliundra.

11Ɗe ha uaminifu ɗe Sara#11:11 Sara: Mutru atsojua aelewe iShigiriki amba v̄anu Iɓrahima ɗe arongolwao, yaãni, ha waye ukana uaminifu ɗe Iɓrahima av̄olwa ushindzi wa udza. waye-waye, wala ukana amba aka azidi maha, av̄olwa ushindzi wa madzazi, mana amuono amba muaminifu Monyewe utoa uwahadi. 12Iyo ɗe imana ata ha mutru moja, na uwo akokuruɓia ufa, v̄udzalwa indadi mauri ɗe zinyora za mbinguni, mauri ɗe umutsanga wa ɓaharini ulio amba kauhisaɓiha.

13Ɗe hari mwa uaminifu ɗe piya watru wao wafa, ɓila upara trongo waka watolewa wahadi, ɓadi wakoziona, tsena wakozishangiria rangu mbali, ha ukuɓali amba wa wadjeni na watru wav̄irao na ndzia shiv̄andreju mwa tsi. 14Watru walaguao namuna iyo, wasuonesa dhwahiri amba wasutsaha v̄ahanu v̄ulio hawo wenyewe. 15Na djeli wakana hamu na hule walawa, itsoka amba wapara nafasi ya uregea. 16Ɓadi hususwani wakotsaha v̄ahanu v̄ulio ɓorwa, yaãni v̄wa shipev̄oni. Iyo ɗe imana ata Mungu kaono haya uhiriwa Mungu wawo, mana awatayarishia ɗago.

17Ɗe ha uaminifu ɗe Iɓrahima wakati akodjereɓiwa, akomutoa Isiaka sadaka. Akotoa sadaka mwana moja-moja wahe, ule aka atolewa zinguwahadi, 18tsena ha waye ɗe aka aambilwa: «Ɗe ha Isiaka ɗe utsopariwao zilembwe.»#11:18 Namuangaliye Mwandro 21:12. 19Akodziambia amba Mungu ana ushindzi ata wa uregeza hayi mufu. Na ha ndzia ya shiurongozi, kweli amupara Isiaka ulawa ufaju.

20Ɗe ha uaminifu ɗe Isiaka amusopelea Yaãkuɓu na Ĩzu waɓarikishihe hari mwa zijao.

21Ɗe ha uaminifu ɗe Yaãkuɓu wakati akofariki, asopelea kula mwana wa Yusufu,#11:21 Yusufu: Yusufu unu aka moja mengoni mwa uwana watruɓaɓa kumi na waili wa Yaãkuɓu. amwesa amutukuza Mungu ha uɗemea hari mwa itsa ya mupweke wahe.

22Ɗe ha uaminifu ɗe Yusufu ondrofa yahe, alagua umulawio wa Maisraila ulawa Miswiri, amwesa atoa ãmuri yahusu yimiɓa yahe.

23Ɗe ha uaminifu ɗe Musa udzalwa yahe, adzamisiwa muda wa mezi miraru na wadzaɗe wahe, mana waono amba umwana aka muzuri, tsena kawaria iãmuri ya mufalume.

24Ɗe ha uaminifu ɗe Musa uɓalihi yahe ahara uhiriwa mwana wa umwana mutrumama wa Firiyauna#11:24 Firiyauna: Lilo dzina la mafalume ya Miswiri.. 25Aono ɓorwa arendrwe mbovu v̄umoja na umati wa Mungu, rahana ukana furaha ya muda hari mwa dhambi. 26Akoona amba udhilifu ha siɓaɓu ya Kristi,#11:26 Kristi: Yaãni, uMutsahuliwa wa Mungu, uMutsahuliwa watru wakomulindra ha tama. Namusome tsena yamaeledzo ju la Kristi hari mwa zikandre za mwiso za ishio ini. uwo utadjirifu rahana piya zidafine za Miswiri, mana akoangalia ɗe ithawaɓu yakoja. 27Ɗe ha uaminifu ɗe alawia iMiswiri, ɓila uria hadhaɓu za mufalume; asiki hodari, amba mutru aonao Uwo alio amba kaonehana. 28Ɗe ha uaminifu ɗe ahetsi uMutupio|Mutupio, na umutsanyio wa damu milongoju, pare uMuangamifu asuɓambe madzazi ya handra ya uwana wa Maisraila.

29Ɗe ha uaminifu ɗe wav̄ira hari mwa iƁahari Ndzukundru#11:29 iƁahari Ndzukundru: Ɓahari ini ujulihwana tsena ha lidzina la Ɓahari ya Damu. mauri hari mwa trotro kavu, ɓadi Mamiswiri udjereɓu yawo, waroro.

30Ɗe ha uaminifu ɗe zinguhura za Jeriko zakomoha, ɓaanda zazingidziwa muda wa suku saɓa.

31Ɗe ha uaminifu ɗe lisusu Rahaɓati kaangamia v̄umoja na wao kawakotuĩ, mana aka akariɓisa ha uzuri uwatunduzi wa Israila.

32Nirongowe trini raha? Nafasi kaiv̄o ya ulagua rangu Djĩdani, Ɓarak, Samsuna, Yefte, Daudu, Samueli na yimitrume, 33wao walio amba ha uaminifu, washindri ngufalume, wakorumishia uhaki, wapara yamavuna ya zinguwahadi, na uɓala hanyo zisimba; 34wazimi ushindzi wa moro, watrala mutsindzio wa upanga, wafanyiha wahodari ata wav̄iria ulemevu wawo, wahodarishiha kondroni, tsena watradza madjeshi wadjeni. 35V̄wa watrumama wapara wafu wawo ha muregezeo hayi. Ɓadi wasalia watreswa ɓila kawakuɓali ukombofu, ile wapare muregezeo hayi mwema zaidi. 36Wasalia waondesheha ha mashekedzo na shengwe, na wasalia raha ha silisili na shiv̄a. 37Waulawa ha mawe, wakutrulwa ha mishari, waulawa ha upanga; wakozingidza v̄av̄o na v̄av̄o ha upindra ngwezi za maɓariɓari na mbuzi, kawakana itsokao yotsi, wakorendrwa naĩ na utreswa, 38wao walio amba ulemengu kawaka wawastahiki. Wakozingidza hunu na hule mav̄adzani na milimani, moni mwa magumbo na ngama za ishiv̄andre ya tsi.

39Na piya wao walio amba waka wapara ushahidifu mwema ha siɓaɓu ya uaminifu wawo, kawapara iyo yaka yatolwa wahadi, 40iv̄o Mungu aka ariãzimia trongo ndjema zaidi, ile wasupare ukamilifu ɓila wasi.

Currently Selected:

MAHEƁRANIYA 11: swb

Highlight

Compare

Copy