MAHEƁRANIYA 10
10
1Kweli amba iSharia isuv̄inga muvuli wa zindjema zijao, ɓadi tsi sura swafi-swafi ya trongo zizo. Iyo ɗe imana amba ata dahari kaisushindra ha masadaka yao-yao yatolewao v̄av̄o na v̄av̄o, mwaha ata mwaha, yarahatsisa ha ukamilifu wao wamukuruɓiao Mungu ha umuãɓudu. 2Na djeli amba tsi ɗe namuna iyo, ɓasi hali kaitsoka amba watru wazia uyatoa? Mana wao wafanyao ĩɓada iyo, itsoka amba watwaharishiha mara moja ɓas, amwesa kawatsodzituhumia tsena na dhambi. 3Ɓadi ɗe ikinyume, ha masadaka yale, watru unahanidziwa kula mwaha yamadhambi. 4Mana tsi mukinishiha amba damu ya mahondzo na maɓeɓeru itowe yamadhambi.
5Iyo ɗe imana ata uja yahe ulemenguni, Kristi arongoa:
«Kwatsaha sadaka wala kafara,
ɓadi unitayarishia mwili.
6Kwajiv̄iwa na masadaka yavudzwa,
ɓila masadaka yatolewa ha swamaha la yamadhambi.
7Ɓasi tsirongoa: ‹Tsami nisuja ẽhẽ Mungu,
nifanye mav̄endzeleo yaho,
ha uɗunga iyo yaangihwa yahusuana na wami
moni na ishio yav̄ambwa.› »#10:7 Namuangaliye Utende 40:6-8.
8Asurongoa raɓuzi zini: «Kwatsaha, amwesa kwajiv̄iwa na makafara, ɓila masadaka yavudzwa, wala masadaka yatolewa ha swamaha la yamadhambi». Na v̄av̄o, yao masadaka yatolewao ha uɗunga iSharia. 9Amwesa aja asurongoa: «Tsami, nisuja nifanye mav̄endzeleo yaho.» Ɓasi v̄av̄o asuzima ĩɓada ya handra ile, pare ahetsi ya v̄ili. 10Ɗe ha mav̄endzeleo yao ɗe ratwaharishiwa ha lisadaka la umwili wa Insa-Kristi, mara moja ɓas.
11Kula mutolezi-masadaka uhima kula suku ile afanye urumishi wahe, na utolea mara na mara masadaka ɗe yao-yao yalio amba ata dahari kaishindri utoa yamadhambi. 12Ɓadi waye, ɓaanda atolea sadaka moja tu ha yamadhambi, aketsi ha daima humeni ha Mungu.#10:12 Namuangaliye Utende 110:1. 13Rangu v̄av̄o asulindra ata maãduwi yahe yafanyiwe shihetsi-mindru yahe,#10:13 Namuangaliye Utende 110:1. 14mana ha sadaka moja tu, akamilisha ha daima wao watwaharishiwao.
15Iyo ɗe itrongo iRoho Ndzitwaharifu irishadidishao wajau. Mana ɓaanda yarongoa zini:
16«Tsunu umukataɓa|mukataɓa nitsoufungao na wao
ɓaanda ya suku zizo, asurongoa Mola.
Nitsotria Sharia zangu rohoni hawo,
tsena nitsoziangiha fikirani hawo.»#10:16 Namuangaliye Yeremiya 31:33.
17«Ɓila madhambi yawo na mahosa yawo,
tsitsoyanahana tsena.»#10:17 Namuangaliye Yeremiya 31:34.
18Na v̄ahanu v̄ukao swamaha la madhambi, kav̄uka tsena sadaka ha lidhambi.
Ilazimu risuɓiridze na uaminifu watru
19Ha izo wananyangu, rina yakini ya mungilio ha unafasi moni na liPa Dzitwaharifu rahana Dzitwaharifu ha idamu ya Insa. 20Aritsamilia ndzia pia yendza uhayati ha uv̄iria umusutru, yaãni, ha umwili wahe. 21Ɓasi rina Mutolezi-Masadaka Muɓole ahetsiwa shitswa hari mwa umuraɓa wa Mungu. 22V̄av̄o narikuruɓiye ha umo warahara na uaminifu mukamilifu, tsena na roho yarahatsiwa na tuhuma mbovu, v̄umoja na mwili ulio amba uhoswa ha maji maraharifu. 23Narisike hodari itama yatru riikuɓalio ha hadhwira ɓila rasujeledze, mana Uwo atoa uwahadi, waye muaminifu. 24Narike watsunga wasi na wasi, ritriyane ɓari hari mwa itrongo ya uv̄endza, na hari mwa zitrendro ndjema. 25Rasulishe ungulidzana na wanyatru wa shi uaminifu, mauri ɓaãdhwi waliona udzevu nayo, ɓadi naritriyane ɓari wasi na wasi, na zini hususwani iv̄o muonao amba iSuku#10:25 Suku: Yaãni, iSuku Ɓole Raɓi Insa atsojao. isukuruɓia.
26Mana neka risuãswi ha kusudi ɓaanda rapara ujuzi wa ukweli, ɓasi v̄av̄o kav̄usuɓaki tsena sadaka la utoa madhambi, 27ɓadi mulindrilio wendza trisidzo wa ihukuma ya Mungu, uhali wa umoro ujao uvudze wao wamukanyushao. 28Mutru alio amba atikadi iSharia ya Musa, waye uulawa ɓila poreho, mbeli za ushahidi wa watru waili au wararu. 29Ɓasi mara ngav̄i, musufikiri, utsokao udziro wastahiki ishiv̄ondro ya uwo itsokao amba agaɗa uMwana wa Mungu, atefua idamu ya umukataɓa ilio amba ha wiyo atwaharishiwa, aruhana iRoho ya irehema? 30Mana risujua uwo arongoa: «Kiswa, iyo yangu, wami ɗe nitsoliv̄isao.»#10:30 Namuangaliye Munahanisidziyo wa iSharia 32:35. Na tsena: «Mola atsohukumu umati wahe.»#10:30 Namuangaliye Munahanisidziyo wa iSharia 32:36. 31Iyo trongo irisidzao, upuliha mihononi ha Mungu alio hayi.
32Namunahane tu suku za handra ɓaanda mwaunishiwa, mustahamili kondro ɓole yendza maondo. 33Wakati mwakoelehwa dhwahiri mbeli za watru ha zilihidzo na matreso, na wakati wangina mwakoka ushirika moja na wao wakofanyiwa zitrendrwa mauri ɗe zizo. 34Kweli amba muono utungu v̄umoja na wao waka wafungwa, tsena ha furaha mukuɓali muv̄oshewe ndjema zanyu, iv̄o mwakojua amba muna utadjirifu wazidi utsokao dahari.
35Mwasulatse ɓasi uaminifu wanyu ulio amba usuv̄inga thawaɓu ɓole. 36Ilazimu mukane ustahamilivu, ile ɓaanda mwafanya mav̄endzeleo ya Mungu, mupare iyo yatolwa wahadi. 37Mana v̄uangihwa:
«Mwana muda raha, mushashi tu,
na Uwo alazimu aje atsoja, waye katsohoma.
38Na mwendza haki wangu atsoẽshi ha uaminifu,
ɓadi neka asudzivura, roho yangu kaijiv̄iwa na waye.»#10:38 Namuangaliye Haɓakuk 2:3,4; Maromu 1:17; Magalatwiya 3:11.
39Na wasi hatruju, karisi hari mwa wao wadzivurao wandra wadzipoteza, ɓadi hari mwa wao waliona uaminifu uhuyio roho zawo.
Currently Selected:
MAHEƁRANIYA 10: swb
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
