MAHEƁRANIYA 12

Matso yatru nayake ha Insa

1Ɓasi ha izo wasi wajau, iv̄o razingidziwa na vingu ɓole namuna iyo la mazahidi, naritruwe kula mudzo na lidhambi liriv̄ambanisao ɓure-ɓure tu, amwesa rendre mbio v̄umoja na ustahamilivu hari mwa yamashindrano ralishiwayo. 2Narilishe matso yatru ha Insa alio koho la uaminifu watru, tsena monyewe uukamilisha. Waye alio amba ha ifuraha aka ahetsiwayo, astahamili umuri wa pawa|muri wa pawa na uonea iaĩɓu yawo, amwesa aketsi humeni mwa ishiri ya ufalume ya Mungu. 3Ɓasi namufikiri Uwo alio amba astahamili mukanyusho mauri ɗe uwo walawa ha maãswifu, ile mwasulemewe ha mupulio-ɓari.

4Hari mwa ushindrana yanyu kinyume na dhambi, raha kamwakingia ata mwatra damu. 5Afa muɗela umutrilio-ɓari mwav̄olwawo mauri wana amba:

«Mwana wangu, usudharau shiv̄ondro ya Mola,

tsena usupuhe ɓari wakati ahurudio.

6Mana Mola urudi uwo amuv̄endzao,

tsena urema shengwe kula amukuɓalio

amba mwana wahe.»#12:6 Namuangaliye Wasiya 3:11,12.

7Ɗe ha siɓaɓu ya murudio wanyu ɗe mustahamilio; Mungu asumurengani mauri wana. Mana uv̄i ɗe umwana ɓaɓahe kamurudi? 8Neka kamwarudiwa mauri piya uwana, v̄av̄o wanyu tsi wana wa kweli, ɓadi wana haramu. 9Na v̄anu ɓaanda ilio amba piyasi rina ɓaɓa ha shimwili arirudio na wasi umustehi, ha mara ngav̄i zaidi ralazimu ridzituĩse ha Ɓaɓa wa roho, ne raẽshi! 10Maɓaɓatru yakorirudi mwana muda ha uɗunga izo wakoona amba ndjema. Ɓadi Unu asurirudi ha faida yatru, ile rirenge fungu hari mwa utwaharifu wahe. 11Kweli amba murudio yotsi kauonehana mwandroni amba trongo ya furaha, ɓadi ya huzuni. Ɓadi mbeli-mbeli oho ɗe uv̄ao wao wakoupara mavuna ya amani, ne ɗe uhaki.

12Ɓasi namuhodarishe yimihono majele yanyu yiyo, na yamalondro malemevu. 13«Namutayarishiye ndzia zaondzoha yimindru yanyu»,#12:13 Namuangaliye Wasiya 4:26. ile uwo ulio goɓo wasuv̄erehe, ɓadi uangale.

Rasuhare urehema wa Mungu

14Namukane djitihadi ya uẽshi ha amani na watru piya, amwesa mukane utwaharifu ulio amba neka tsi ha uwo, kav̄u mutru atsomuonao Mola. 15Namuke hashiri amba v̄usuke ata mutru ahara urehema wa Mungu; v̄usuke ata muzi wendza nyongo wamea wataãɓisha, trongo ilio amba itsorandra, itupiye watru wengi. 16Namuke hashiri amba v̄usuke ata mutru afanyao uzindzi, au akufurishao, mauri ɗe Ĩzu alio amba ha muɗyio moja tu, audzu haki yahe ya mwana wa handra. 17Musujua amba mbeli-mbeli oho ɓaanda akotsaha awarithi umuɓarikisho, aharaliwa; kashindra apara mugaudzio utsokao yotsi, wala ukana akoutsaha ha matsozi.

18Kamwajilia trongo isikihao:#12:18 isikihao: Yaãni, uMulima wa Sinayi. tsi moro uvuao, ɓila tsi shidza, wala uɗu, wala tsi dharuɓa, 19ɓila tsi ngono ya ɓaragumu, wala tsi ji la marongozi ha namuna amba wao walikia, wakomia wasuengedzewe tsena kauli yangina. 20Mana kawakoshindrov̄inga ãmuri ini: «Yotsi atsopahao umulima, wala ukana shinyama, itsoangamidziwa ha mawe.»#12:20 Namuangaliye Mulawiyo 19:12,13. 21Trongo yakoonehana v̄ale yakorisidza ata Musa akorongoa: «Nisuria ata nisudridrima.»#12:21 Namuangaliye Munahanisidziyo wa iSharia 9:19.

22Ɓadi mujilia uMulima wa Siyuna|Mulima wa Siyuna na liɗago la Mungu alio hayi, iYerusalemu ya shipev̄oni, v̄ahanu v̄ulio amba mialifu na mialifu za malayika zingulidzana ha mufurahishio, 23ha idjama wa yamadzazi ya handra yaangihwa pev̄oni. Mujilia ha Mungu alio hakimu wa piya, ha ziroho za wendza haki wakamilishiha, 24mumujilia Insa, umuparanisa wa mukataɓa muv̄ia, na idamu yahe yatsambadziwa ilaguao trongo ndjema rahana ya Haɓilu.

25Namufahamu, musuharaliye uwo alaguao. Neka wao waharalia uwo akowafahamisha shiv̄andreju mwa tsi kawashindra watrala, ha mara ngav̄i zaidi wasi karitsoshindra ratrala, neka risudziɓausa na Uwo arifahamishao rangu pev̄oni! 26Uwo alio amba liji lahe ligudzusa wakati uwo ishiv̄andre ya tsi, na av̄asav̄anu atoa wahadi unu: «Mara moja raha nitsodridrimisa wala tsi ɗe ishiv̄andre ya tsi tu, ɓadi na uwingu wajau.»#12:26 Namuangaliye Hagayi 2:6. 27Marongozi yanu amba «mara moja raha», yao yasurongoa amba izo zagudzusiha, ne ɗe izo zaumbwa, zitsotolwa, ile zizo kazigudzusiha ziɓaki.

28Ha izo, iv̄o riparao utawalizi kaugudzusiha, narihimidiye ha umutolea Mungu ĩɓada imujiv̄iao yendza utuĩvu na staha. 29Kweli amba Mungu watru, waye moro ukomesao.

Currently Selected:

MAHEƁRANIYA 12: swb

Highlight

Compare

Copy